އިންޑިއާގެ ކޮންގްރެސް ޕާޓީގެ ލީޑަރު ރާހުލް ގާނދީ އިންޑިއާ އާއި އެމެރިކާއާ ދެމެދު ފުޅާ ދާއިރާއެއްގައި ގުޅުން ބަދަހި ކުރުމަށް ގޮވާލައްވައި، އިންޑިއާއަކީ ޗައިނާއަށް ވުރެ އުފެއްދުންތެރި ގައުމަކަށް ހެދުމަށް ދެ ގައުމުން މަޝްވަރާ ކުރަން ޖެހޭ ކަމަށް ދާދިފަހުން ވަނީ ވިދާޅުވެފައެވެ.
ވޮޝިންޓަންގެ ނޭޝަނަލް ޕްރެސް ކްލަބުގައި ކަޝްމީރާ ބެހޭ ގޮތުން ވޮއިސް އޮފް އެމެރިކާގެ އުރުދޫ މީޑިއާއިން ދެންނެވި ސުވާލަކަށް ޖަވާބު ދެއްވަމުން ރާހުލް ވިދާޅުވީ އޭނާގެ ކޮންގްރެސް ޕާޓީން އިންޑިއާގެ ކޮންމެ ރައްޔިތެއްގެ ޑިމޮކްރެޓިކް ހައްގުތައް ގަބޫލުކުރާ ކަމަށާއި ޖައްމޫ-ކަޝްމީރުގެ ޑިމޮކްރެޓިކް އަސާސްތައް ރަނގަޅު ކުރައްވާނެ ކަމަށެވެ.
”ރަނގަޅު ކުރަން ޖާގަ އެބައޮތް.“ އޭނާ ވިދާޅުވިއެވެ.
ކަޝްމީރުގެ ރައްޔިތުން ގަބޫލު ކުރަނީ ބޮޑު ވަޒީރު ނަރެންދުރަ މޯދީގެ ވެރިކަމުގައި އެމީހުންނަށް ލިބެމުން ދަނީ ތާރީޚު ކުރިން ދެކެފައި ނުވާ ފަދަ އަނިޔާތަކެއް ކަމަށެވެ.
ބޮޑުވަޒީރު ނަރެންދުރަ މޯދީ ސަރުކާރުގެ އިގުތިސާދީ އަދި ސިޔާސީ ސިޔާސަތުތަކަށް ރާހޫލް ވަނީ ވަރަށް ބޮޑަށް ފާޑުވިދާޅުވެފައެވެ.
ރާހުލް ގާނދީ ވިދާޅުވީ 2024 ވަނަ އަހަރުގެ އިންތިހާބުގެ ނަތީޖާ ނިކުންނާނީ ހައިރާން ކުރުވަނިވި ގޮތަކަށް ކަމަށެވެ. ބޮޑުވަޒީރު މޯދީގެ އަބުރުގެ މައްސަލައިގައި ރާހުލް ގާނދީ ވަނީ އެގައުމުގެ ލޯކް ސަބާއިން ވަކިކޮށްފައެވެ.
އިންޑިއާގެ ބޮޑު ވަޒީރު ނަރެންދުރަ މޯދީގެ ވެރިކަމުގައި ހިންދޫންނާއި އިންޑިއާގެ ބައިމަދު އެހެން މަޒުހަބުތަކުގެ މީހުންގެ މެދުގައި ނަފުރަތާއި ހަމަނުޖެހުން އުފެދި ގައުމުގެ ދާޚިލީ ހަމަނުޖެހުމަށް ވަނީ ނުރައްކާ ވެފައެވެ.
ކޮންގްރެސް ޕާޓީގެ ލީޑަރު ރާހުލް ގާނދީ ވިދާޅުވީ ކޮންގްރެސްގެ ވެރިކަމެއްގައި ނަފުރަތުގެ ބާޒާރުގައި ލޯބީގެ ފިހާރައެއް ހުޅުވަން ބޭނުންވާ ކަމަށެވެ.
އިންޑިއާގެ ކަޝްމީރާއި ޕަންޖާބާއި މަނިޕޫރުން ވަކި ގައުމެއް އުފައްދައި މިނިވަން ވުމުގެ ހަރަކާތްތައް ހިންގަމުން އެބަ ދެއެވެ.
”އަންނަ އަހަރުގެ އިންތިހާބުގެ ނަތީޖާއިން މީހުން ހައިރާން ވާވަރުގެ ކަންތައްތަކެއް ފެނިގެން ދާނެ ހެން އަޅުގަނޑަށް ހީވަނީ.“ އަންނަ އަހަރުގެ އިންތިހާބާ ބެހޭ ގޮތުން އޭނާ ވިދާޅުވި އެވެ.
ރާހުލް ވިދާޅުވީ އަންނަ އަހަރުގެ އިންތިޚާބު ބޮޑުވަޒީރު މޯދީގެ ބާރަތިޔާ ޖަނަތާ ޕާޓީ ކާމިޔާބު ކުރާނެ ކަމަށް ގަބޫލު ނުކުރައްވާ ކަމަށެވެ. އަދި އިންޑިއާގެ އިދިކޮޅު ފަރާތްތަކަކީ އެއްބައިވަންތަ ބައެއް ކަމަށާއި ބީޖޭޕީ ބަލިކުރާނެ ކަމަށް ވެސް އޭނާ ވިދާޅުވިއެވެ.
ރާހުލް ގާނދީ ވަނީ މި އަހަރު ކަރްނާޓަކާގައި ބީޖޭޕީއާ ދެކޮޅަށް ކޮންގްރެސްއިން ހޯދި އާދަޔާ ޚިލާފު ކާމިޔާބީއަށް ވެސް އިޝާރާތް ކުރައްވާފައެވެ.
އުމުރުން 52 އަހަރުގެ ރާހުލް ވިދާޅުވީ އިންޑިއާގެ އިގުތިސާދު ވަރަށް ރަނގަޅަށް ކުރިއަށްދާ ކަމަށް ދެކޭ ތަސައްވުރަކީ ގިނަ ކަންތައްތަކަކަށް އަޅާނުލައި ދައްކާ ވާހަކައެއް ކަމަށެވެ. އެ ކަމާ ގުޅޭގޮތުން އޭނާ ވިދާޅުވީ ގައުމުގައި ވަޒީފާނެތް މީހުންގެ ނިސްބަތް ވަރަށް މަތީ ރޭޓެއްގައި އޮތްއިރު އިންފްލޭޝަން ވެސް ވަރަށް މަތި ކަމަށެވެ.
މިނިވަން ނޫސްވެރިކަމާ ބެހޭ ގޮތުން އޭނާ ވިދާޅުވީ އިންޑިއާގައި ނޫސްވެރިކަމުގެ މިނިވަންކަން ބޮޑު ވަޒީރު މޯދީގެ ވެރިކަމުގައި ވަރަށް ބޮޑަށް ދަށަށް ގޮސްފައިވާ ކަމަށެވެ.
އިންޑިއާގައި މިނިވަން މުއައްސަސާތައް ބޭނުންވާ ކަމަށް ވިދާޅުވެ، މިހާރުގެ ސަރުކާރަށް އިޝާރާތް ކުރައްވައި ގައުމުގެ މިނިވަން މުއައްސަސާތައް ސަރުކާރުން ކޮންޓްރޯލް ކޮށްފައިވާ ކަމަށް ވެސް ރާހުލް ވިދާޅުވި އެވެ.
އިންޑިއާއާއި އެމެރިކާގެ ދެގައުމުގެ ގުޅުމާ ގުޅޭގޮތުން ރާހުލް ގާނދީ ވިދާޅުވީ މި ގުޅުންތައް ވާންޖެހޭނީ ފުޅާ ދާއިރާއެއްގައި ދެކޮޅަށް ދަތުރު ކުރެވޭ ހައިވޭއެއް ފަދައިން ކަމަށާއި ދިފާއީ ދާއިރާގެ އިތުރުން އެކި ދާއިރާތަކުން ދެގައުމުން އެއްބާރުލުން ދޭންޖެހޭ ކަމަށެވެ.
ޗައިނާއާ ގުޅޭގޮތުން ރާހުލް ވިދާޅުވީ އުފެއްދުންތެރިކަމުގެ ދާއިރާއިން އިންޑިއާއަށް ޗައިނާއާ ކާމިޔާބުކަމާއެކު ވާދަކުރެވޭނެ ކަމަށް ގަބޫލުކުރައްވާ ކަމަށެވެ. އަދި އެކަން ކުރެވޭނީ އުފެއްދުންތެރިކަމާއި އެކްސްޕޯޓްގެ ދާއިރާއިން ވެސް ކުރިއެރުންތަކެއް ހޯދައިގެން ކަމަށް ވެސް އޭނާ ވިދާޅުވި އެވެ.
ބީޖޭޕީގެ ވެރިކަމުގައި އިންޑިއާއަށް ކުރިއެރުންތަކެއް ލިބިފައިވާކަމަށް ގައުމުގެ އެތައް މިލިއަން ބަޔަކު ގަބޫލުކުރާގޮތަށް ބީޖޭޕީގެ ވެރިކަމުގައި ގައުމުގައި ކޮރަޕްޝަނާއި ނަފުރަތާއި ހަމަނުޖެހުން ވެސް ފެތުރިފައި ވާކަމަށް އިންޑިއާގެ އެތައް މިލިއަން ބަޔަކު ގަބޫލު ކުރެއެވެ.
