ޝަރީއަތް ނިމެންދެން ބަންދުކުރެވޭ ފަރާތްތަކުގެ މައްސަލަތައް އަވަހަށް ނިންމެވުމަށާއި ބަންދުގައިވާ މީހުންނަށް އިޖުރާއީ އިންސާފު ލިބޭނެ ގޮތް ހަމަޖައްސަވައި ދެއްވުން އެދި މޯލްޑިވްސް ނެޝަނަލް ޕާޓީ (އެމްއެންޕީ) މިއަދު ރައީސުލްޖުމްހޫރިއްޔާއަށް ސިޓީއަކުން ދަންނަވައިފިއެވެ.
އެމްއެންޕީން އިއްޔެ ބުނީ ޝަރީއަތް ނިމެންދެން މީހުން ބަންދުކުރުމުގެ ސަގާފަތެއް ރާއްޖޭގެ ކޯޓުތަކުން ކުރިއަށް ގެންދާތީ އެ ސަގާފަތަށް ނިމުމެއް ގެންނަން ޖެހޭކަން ފާހަގަކޮށް، ޝަރީއަތް ނިމެންދެން ބަންދުކުރެވޭ ފަރާތްތަކުގެ މައްސަލަތައް އަވަހަށް ނިންމެވުމަށާއި ޖިނާއީ އިޖުރާއަތުގެ ގާނޫނުގެ 60 ވަނަ މާއްދާގެ (ވ) ގައި ކަނޑައަޅާފައިވާ އިޖުރާއަތް ހިންގޭނެ ފަހި އިންތިޒާމުތަކެއް ފަނޑިޔާރުގެއަށް ފަހިކޮށްދެއްވައިގެން ބަންދުގައިވާ މީހުންނަށް އިޖުރާއީ އިންސާފު ލިބޭނެ ގޮތް ހަމަޖައްސަވައި ދެއްވުން އެދި އެ ޕާޓީން އިއްޔެ ރައީސުލްޖުމްހޫރިއްޔާއަށް ހުށަހަޅާފައިވާނެ ކަމަށެވެ.
”މިކަން ހުށަހަޅައި މި ޕާޓީން މި މައްސަލައިގައި ރައީސުލްޖުމްހޫރިއްޔާއަށް ފޮނުވީ ޖިނާއީ އިޖުރާއަތުގެ ގާނޫނުގެ 60 ވަނަ މާއްދާ ކޯޓުތަކުން މަނާކުރައްވާފައިވާ ގޮތަށް ބަލައި⚳ މި މައްސަލައަކީ ގާނޫނީ އަދި އިދާރީ ހައްލުތަކެއް ބޭނުންވާ މައްސަލައެއް ކަމަށް ފާހަގަ ކުރެވޭތީ.“
މީގެ އިތުރުން މިއީ ރައްޔިތުންގެ އަސާސީ ހައްގާ ގުޅިފައިވާ ކަމަކަށްވާތީ މި މަސައްކަތަކީ ދައުލަތުގެ އެންމެ އިސްވެރިޔާގެ ހައިސިއްޔަތުންނާއި ގާނޫނުގެ ވެރިކަން ކުރިއެރުވުމުގެ ޒިންމާއާއި ރައްޔިތުންގެ ހައްގުތައް ރައްކާތެރިކޮށް ދިނުމުގެ ޒިންމާ ނަގަން ޖެހޭ ފަރާތުގެ ހައިސިއްޔަތުން ރައީސުލްޖުމްހޫރިއްޔާ އަދާކުރަންވަން ޖެހިވަޑައިގަންނަވާ މަސްއޫލިއްތެއް ކަމަށް ދެކިގެން ވެސް ކަމަށެވެ.
އެމްއެންޕީއިން ހުށަހެޅި ސިޓީގައި ބުނެފައިވަނީ ޝަރީއަތް ނިމެންދެން ބަންދުކުރެވިފައި ގާތްގަނޑަކަށް 343 މީހަކު ޖަލުތަކުގެ ހައްޔަރުގައި ތިބިއިރު, ޖިނާއީ އިޖުރާއަތުގެ ޤާނޫނުގެ 60 ވަނަ މާއްދާގެ (ވ) ގެ ދަށުން އެ ފަރާތްތަކުގެ ބަންދު ކޮންމެ 30 ދުވަހަކުން މުރާޖައާ ކުރުމުގެ އަޑުއެހުން ފަނޑިޔާރުގޭގައި ނުހިނގާތީ އެ މީހުންނަށް އިޖުރާއީ އިންސާފު ލިބުމުގެ މަގު ބަންދުވެފައިވާ ކަމަށެވެ. އަދި އޭގެ ތެރެއިން ބައެއް މިހުންގެ ޝަރީއަތް ނުހިނގާ އަހަރުތަކަކަށް ދިގުދެމިގެން ގޮސްފައިވާ ކަމަށާއި ބޮޑު މައްސަލައަކަށް ތުހުމަތުކުރެވުމަކީ އިޖުރާއީ އިންސާފުން މީހުން އެއްފަރާތް ކުރެއްވޭނެ ގާނޫނީ ހަމައެއް ނޫން ކަމަށެވެ.
މީގެއިތުރުން މި މައްސަލައާ ގުޅިގެން 7 މާރޗް 2023 ގައި ރައްޔިތުންގެ މަޖިލީހުގައި ދާޚިލީ ވަޒީރާ ސުވާލު ކުރެއްވުމުން ވެސް މީގެ އަސްލު މައްސަލަ ހައްލު ކުރެއްވުމަށް އެއްވެސް މަސައްކަތެއް ކުރެއްވި ވާހަކައެއް ވިދާޅެއްނުވާކަން ވެސް ސިޓީގައި ފާހަގަކޮށްފައިވެއެވެ.
އެމްއެންޕީއިން ބުނީ ރައްޔިތުންގެ އަސާސީ ހައްގުތަކަކާއި ގުޅިފައިވާ މި މައްސަލައަށް އަދިވެސް ހައްލެއް ގެނެވިފައެއް ނުވާ ކަމަށެވެ.
