އަތޮޅުތެރޭގެ 144ރަށެއްގައި ކުނި މެނޭޖްކުރާ ސެންޓަރު ޤާއިމުކޮށް، ކުނި މެނޭޖްކުރުމާއި ގުޅޭ އިތުރު 88 މަޝްރޫޢެއްގެ މަސައްކަތް މިހާރުވެސް ކުރިއަށްދާ ކަމަށް މިނިސްޓަރ އޮފް އެންވަޔަރަންމަންޓް ކްލައިމެޓް ޗޭންޖް އެންޑް ޓެކްނޯލޮޖީ އާއިނަތު ޝައުނާ ވިދާޅުވެއްޖެއެވެ. މިނިސްޓަރ މިހެން ވިދާޅުވީ ވެމްކޯގެ އަހަރީ ދުވަސް ފާހަގަކުރުމަށް ބޭއްވި ޙަފްލާގައި ވާހަކަފުޅުދައްކަވަމުންނެވެ.
ވެމްކޯގެ އަހަރީ ދުވަސް ފާހަގަކުރުމަށް ބޭއްވި ހަފްލާގައި ވާހަކަފުޅުދައްކަވަމުން މިނިސްޓަރ ޝައުނާ ވިދާޅުވީ ކުންޏާމެދު ދިވެހިން ދެކެމުން އައި ގޮތް ވެމްކޯއިން ބަދަލުކޮށްފައިވާކަމަށެވެ. ކުނި މެނޭޖްކުރުމަށް ޚާއްސަކޮށް ޤާއިމުކުރި ކުންފުންޏާއެކު، ރާއްޖޭގައި ކުނި މެނޭޖްކުރާ ގޮތްތައްވެސް ވަރަށް ބޮޑަށް ހަރުދަނާ ކުރެވިއްޖެކަމަށެވެ.
މާލޭގެ އިތުރުން ރ.ވަންދުއާއި، އައްޑުއާއި ފުވަމުލަކުގައިވެސް ކުނި މެނޭޖްކުރުމުގެ ޚިދުމަތް ދެނީ ވެމްކޯއިންނެވެ. މިނިސްޓަރ ވިދާޅުވީ ވެމްކޯއިން ކުރަމުންދާ މަސައްކަތަކީ ރާއްޖޭގެ ހުރިހާ ރަށަކަށްވެސް މިސާލެއްކަމަށެވެ. އަދި މިހާރު ކުރިއަށްދާ މަސައްކަތްތަކުގެ ތެރެއިން އައްޑޫ ސިޓީގައި ޤާއިމުކުރާ ވޭސްޓް ޓު އެނަރޖީ މަޝްރޫޢުގައިވެސް، އެ ފެސިލިޓީ މެނޭޖްކުރާނީ ވެމްކޯއިން ކަމަށް މިިނިސްޓަރ ވިދާޅުވިއެވެ. މިއީ ރާއްޖޭގެ އެންމެ ދެކުނުން ޒޯން 6،7ގެ ކުނި މެނޭޖުކުރުމަށް ޤާއިމުކުރާ ފެސިލިޓީއެކެވެ.
މިނިސްޓަރ ޝައުނާ ވިދާޅުވީ ރަށްރަށުގައި ރަށު ފެންވަރުގައި ކުނި މެނޭޖްކުރެވޭނެ ފެސިލިޓީ ޤާއިމުކުރުމަށްވެސް ގިނަ މަސައްކަތްތަކެއް ކުރިއަށްދާކަމަށެވެ. އެގޮތުން ކުނި ކޮށިތައް ހެދުމާއި، ރަށްރަށުގައި ޒަމާންވީ ކުނި ފުނިތައް ރަށުން ބޭރުކޮށް އަދި ރަށްރަށުގައި ކުނި މެނޭޖްކުރެވޭނެ ފެސިލިޓީތައް ޤާއިމުކުރުމަށް ގިނަ މަސައްކަތްތަކެއް ކުރިއަށްދާކަމަށެވެ.
”140އަށްވުރެ ގިނަ ރަށުގައި ކުނި މެނޭޖްކުރާ ސެންޓަރު ޤާއިމުކުރެވިއްޖެ. ވަރަށް ގިނަ ރަށްރަށުގެ ޒަމާންވީ ކުނި ފުނިތައް ރަށުން ބޭރުކުރެވިއްޖެ. އަދި މިހާރުވެސް ކުނި މެނޭޖްކުރުމާއި ގުޅޭ 88 މަޝްރޫޢެއްގެ މަސައްކަތް ކުރިއަށްދޭ.“ މިނިސްޓަރ ޝައުނާ ވިދާޅުވިއެވެ.
މިނިސްޓަރ ވިދާޅުވީ މުޅިން އަލަށް އެކުލަވާލި، ކުނި މެނޭޖުކުރުމުގެ ޤާނޫނާއެކު ކުނި މެނޭޖްކުރުމުގެ ޚިދުމަތަކީ އާއްމު ޚިދުމަތެއްގެ ގޮތުގައި ކަނޑައެޅިގެން ހިނގައްޖެކަމަށެވެ. އަދި ކުންޏާ ގުޅޭ ވަރަށް ގިނަ އުސޫލުތައް ކަނޑައެޅިގެން ހިނގައްޖެކަމަށެވެ.
”ޤާނޫނުން އެބަ ބުނެދޭ ޤައުމީ ފެންވަރުގައި، ސަރަޙައްދީ ފެންވަރުގައި ނޫނީ ރަށު ފެންވަރުގައި ކުނި މެނޭޖްކުރަން ޖެހޭނެ ގޮތްތައް. އަދި ޢަމަލީ މަސައްކަތްތައް ގެންދާނެ ގޮތާއި، ކުނި މެނޭޖްކުރުމުގެ މަސައްކަތްތައް އުނގަންނައިދިނުމާއި، އަދި މިކަމަށް އިހުމާލުވާ މީހުންނަށް ޖޫރިމަނާ ކުރެވޭނެ އުސޫލުވެސް ވަނީ ކަނޑައެޅިފައި.“ މިނިސްޓަރ ޝައުނާ ވިދާޅުވިއެވެ.
މިނިސްޓަރ ވިދާޅުވީ ކުނީގެ މައްސަލަ އަތޮޅުތަކުގައި ބޮޑުކަމަށެވެ. ސަރުކާރުން މި ގެންނަ ބަދަލުތަކަކީ، މި މައްސަލަ ޙައްލުކޮށްދިނުމުގެ މުހިންމު ފެށުމެއްކަމަށެވެ. ޚާއްސަކޮށް ރަށުގައި ލޯކަލް ޓުއަރިޒަމްފަދަ ވިޔަފާރިތައް ފުޅާވަމުން އަންނައިރު، ކުނީގެ މައްސަލައަކީ ކޮންމެހެން ޙައްލު ހޯދަންޖެހޭ މައްސަލައަކަށްވެފައިވާކަމަށްވެސް މިނިސްޓަރ ޝައުނާ ވިދާޅުވިއެެވެ.
