ސަލްމާން ރުޝްދީއަށް ވަޅިއަކުން ހަމަލާދީ އޭނާއަށް ބޮޑެތި ގެއްލުންތަކެއް ދިން 24 އަހަރުގެ ޒުވާނާ ހާދީ މުޠަރަށް 1000 އަކަމީޓަރުގެ ބިމެއް ދިނުމަށް އީރާނުގެ ޖަމާއަތަކުން ނިންމައިފިއެވެ.
އީރާނުގެ ރަސްމީ މީޑިއާއިން ބުނި ގޮތުގައި ޚުމޭނީގެ ފަތުވާތައް ތަންފީޒުކުރާ ފައުންޑޭޝަންގެ ސެކްރެޓަރީ މުޙައްމަދު އިސްމާޢީލް ޒާރީ ވަނީ އިނާމެއްގެ ގޮތުގައި އުމުރުން 24 އަހަރުގެ ހާދީ މުޠަރަށް 1،000 އަކަމީޓަރުގެ ދަނޑު ބިމެއް ދިނުމަށް އިއުލާން ކުރައްވާފަ އެވެ.
މުޙައްމަދު އިސްމާޢީލް ޒަރީ ވިދާޅުވީ ހާދީގެ ހަމަލާއަށް ފަހު ސަލްމާން ރުޝްދީގެ ހާލު މަރުވުމަށް ވުރެ ވެސް ގޯސް ކަމަށެވެ. އޭނާ ވަނީ ހިނގައިބިނގާވެ އުޅޭ މަރުވެފައިވާ މީހަކަށް ވެފައެވެ. އެހެންކަމުން އެ ޒުވާނާއަށް އިމާމް ޚުމޭނީގެ ފަތުވާއަށް ތަބާވުމުގެ އިނާމު ލިބެންޖެހޭނެ އެވެ.
މިދިޔަ އަހަރުގެ އޮގަސްޓް މަހު ނިއު ޖާޒީގެ ޒުވާން ހާދީ، ސަލްމާން ރުޝްދީއަށް ވަޅިއަކުން ހަމަލާދިނުމުގެ ސަބަބުން، ސަލްމާން ރުޝްދީގެ އެއްލޮލުގެ އަލިކަން ގެއްލި އެއް އަތް ވަނީ ވާވެފައެވެ.
ހަމަލާ ދިން ވަގުތު ސަލާމަތީ މުވައްޒަފުން އެ ޒުވާނާ ހިފެހެއްޓި ނަމަވެސް އެ ޒުވާނާ ވަނީ ސަލްމާން ރުޝްދީއަށް ވަރަށް ބޮޑަށް ގެއްލުންދީފަ އެވެ.
އެމެރިކާއަށް އުފަން އެ ޒުވާނާ ވަނީ ފުލުހުންގެ ބެލުމުގެ ދަށަށް ގެންގޮސް ހައްޔަރުކޮށްފައެވެ. އަދި އޭނާގެ މައްސަލައިގެ ޝަރީޢަތް ކޯޓުގައި ހިނގަމުން އެބަދެއެވެ.
މީގެ 33 އަހަރު ކުރިން ސަލްމާން ރުޝްދީ، ހެއްދެވި ފަރާތަށާއި ކީރިތި ރަސޫލާއަށް ފުރައްސާރަކޮށް ލިއުނު ފޮތަކާ ގުޅިގެން އޭނާ މަރާލުމަށް އީރާނުގެ ދީނީ ލީޑަރ ޚުމޭނީ ވަނީ ފަތުވާ ނެރުއްވާފައެވެ. ނަމަވެސް 1997 އިން 2005 އަށް އީރާނުގެ ރައީސްކަން ކުރެއްވި މުޙައްމަދު ޚާތަމީގެ އިސްލާހީ ސަރުކާރުން އިމާމް ޚުމޭނީގެ މި ފަތުވާއާ ބާތިލު ކުރައްވާފައި ވަނިކޮށް ޚާމަނާއީ ވަނީ ސަލްމާން ރުޝްދީ މަރާލުމާ ގުޅޭ ފަތުވާ ބާތިލު ނުކުރެވޭނެ ކަމަށް ކަނޑައަޅުއްވާފައެވެ.
”އަހަރެމެން އުފާވޭ އޭނާ އެކަން ކުރި ކަމަށްޓަކައި.“ ސަލްމާން ރުޝްދީއާ ދެކޮޅު މީހުން ބުނެފައި ވެއެވެ.
ޒަރައި ވިދާޅުވީ ސަލްމާން ރުޝްދީއަށް ހަމަލާދިން ހިތްވަރުގަދަ ޒުވާނާއަށް 1000 އަކަމީޓަރުގެ ފަހި އަދި އަގުހުރި ދަނޑުވެރި ބިންތަކެއް ލިބުން ހައްގުކަމަށެވެ.
ހާދީ މަޠަރު ބަންދުގައި ހުރުމުން އިނާމު އޭނާގެ އާއިލާގެ ކޮންމެ ވެސް މީހަކާ ނުވަތަ އޭނާގެ ގާނޫނީ މަންދޫބަކާ ހަވާލު ކުރާނީ ހާއްސަ ރަސްމިއްޔާތެއްގައެވެ.
މުރުތައްދުވެފައިވާ ސަލްމާން ރުޝްދީއަށް ދިން ހަމަލާ އީރާނުގެ އިސްމާޢީލް އަޒާރީ ސިފަކުރީ ހިތްވަރުގަދަ އަމަލެއްގެ ގޮތުގައެވެ.
ސަލްމާން ރުޝްދީއަށް ހަމަލާދީފައި ވަނީ 2022 ވަނަ އަހަރުގެ އޮގަސްޓް މަހުގެ 12 ވަނަ ދުވަހުގައެވެ.
ސަލްމާން ރުޝްދީ ލިޔެ 1989 ވަނަ އަހަރުގެ ފެބްރުއަރީ މަހު ނެރުނު ”ޝައިޠާނީ އާޔަތްތައް“ މި ފޮތް މުޅި އިސްލާމީ ދުނިޔެއިން ކުފުރުގެ ފޮތެއްކަމަށް ބުނެ އެ ފޮތާއި ސަލްމާން ރުޝްދީއާ ދެކޮޅަށް ވަރަށް ބޮޑަށް މުޒާހަރާ ކުރި އެވެ. އޭނާގެ ހިމާޔަތުގައި ނިކުތީ މުސްލިމުންގެ ދުޝްމަނުންނެވެ.
އާއްމުތަންތަނަށް އާއްމުކޮށް ނިކުމެ ނޫޅޭ ސަލްމާން ރުޝްދީއަށް ހަމަލާދިން ހާދީ މަޠަރަކީ އެމެރިކާގެ ރައްޔިތެކެވެ. އޭނާގެ މައިން ބަފައިންނަކީ ލުބުނާންގެ ބައެކެވެ.
