މިސްރުގެ މުސްކުޅި އަންހެނަކު އުމުރުން 80 އަހަރުގައި މާސްޓާސް ފުރިހަމަ ކޮށްފިއެވެ.
މާސްޓާސް ފުރިހަމަ ކުރި އަމާލު އިސްމާޢީލު މިހާރު ތައްޔާރު ވަމުން ދަނީ ޕީއެޗްޑީ ފުރިހަމަ ކުރުމަށެވެ.
ޕްރައިމަރީ ތައުލީމަށްފަހު އަމާލުގެ ކިޔެވުން މެދުކެނޑުނެވެ. އޭގެ ފަހުން އޭނާއަށް ޖެހުނީ ކައިވެނީގެ ހަޔާތެއް ފަށާށެވެ. ދަރީން ލިބި ދަރީން ތަރުބިއްޔަތު ކުރުމުގެ މަސައްކަތުގައި އުޅެނިކޮށް އުމުރުން 38 އަހަރުގައި އޭނާއަށް ކެންސަރު ޖެހުނެވެ.
ކެންސަރު ބައްޔަށް ފަރުވާކޮށް ރަނގަޅު ވީތާ އެތައް އަހަރެއް ފަހުން އާމާލު ކިޔެވުމުގެ ރޮނގުން ކުރިއަށްދާންފެށިއެވެ. އޭރު އޭނާގެ އުމުރަކީ 70 އަހަރެވެ.
އަމާލު އިސްމާއީލު ޑިސްޓިންކްޝަނާ އެކު މާސްޓާސް ޑިގްރީ ހާސިލުކުރީ ޤާހިރާގެ އުތުރުގައި އޮންނަ ސިޓީއެއް ކަމަށްވާ މަންސޫރާގެ ފެކަލްޓީ އޮފް އާޓްސް އިންނެވެ.
އަމާލު މާސްޓާސް ފުރިހަމަ ކުރުމުން އޭނާގެ މާމަދަރިން އުފައު ފާޅުކޮށް އޭނާ ލިއުނު ތީސީސްއާ މެދު ބަހުސް ކޮށްފައެވެ.
އަލް އަރަބިޔާ ޑޮޓް ނެޓަށް މައުލޫމާތު ދެމުން އަމާލު ބުނީ ތައުލީމު ކުރިއަށް ގެންދިއުމަށް ދިގު އަދި ހިތި ދުވަސްތަކެއް ކުރިމަތިވި ކަމަށެވެ.
އޭނާ ބުނި ގޮތުގައި ފިރިމީހާ މަރުވުމުން އެކަނި ދިރިއުޅެން ޖެހުމަކީ ވެސް ތައުލީމަށް އެޅުނު ހުރަހެއް ކަމަށެވެ.
އަމާލު ބުނިގޮތުގައި އުމުރުން 70 އަހަރު ފުރުމުން ސެކަންޑަރީ ސްކޫލަކަށް ވަދެ، ކިޔެވުމުގެ ތެރޭގައި ވަރަށް ގިނަ ދަތިތަކާ ކުރިމަތިލާން ޖެހުނެވެ. އަދި އެހެން މީހުންގެ ނުރުހުމުގެ އަމާޒަކަށް ވީކަމުގައި ވެސް ބުންޏެވެ.
”އެކަންތައްތަކުން އަހަރެންގެ އަޒުމު ވަރުގަދަވި.“ އޭނާ ބުނެފައިވެއެވެ.
އޭނާގެ ހައި ސްކޫލް ތައުލީމު ފުރިހަމަ ކުރީ މާމަދަރިންގެ އެހީގައެވެ. އެއަށްފަހު ފެކަލްޓީ އޮފް އާޓްސްއާ ގުޅިގެން ބެޗްލަރސް ޑިގްރީ ހާސިލުކުރިއެވެ. ދެން ފެކަލްޓީގެ ސޯޝިއޮލޮޖީ ޑިޕާޓްމަންޓާ ގުޅިގެން މާސްޓާސް ފުރިހަމަކުރިއެވެ.
”މާސްޓާސްއަށް ކިޔެވުމުގެ ތެރޭގައި އަޅުގަނޑަށް ސިއްހީ ދަތިތަކާ ކުރިމަތިލާން ޖެހުނު.“ އަމާލު ބުނެފައިވެއެވެ.
އަމާލު އިސްމާއީލުގެ ތީސީސް ބިނާކުރީ އޭނާގެ އުމުރުގެ މީހުންގެ މައްޗަށެވެ. މުސްކުޅި އުމުރުފުރާތަކުގެ އިޖުތިމާއީ އަދި ސަގާފީ ދިރިއުޅުމުގެ ވައްޓަފާޅީގެ މައްޗަށް ބިނާކޮށެވެ.
މާސްޓާސް ޑިގްރީ ހާސިލު ކުރުމަށްފަހު ތައުލީމީ ހުރިހާ އުންމީދެއް ފުރިހަމަ ކުރުމަށްޓަކައި އޭނާ މިހާރު ދަނީ އަދަބިއްޔާތުގެ ދާއިރާއިން ޕީއެޗްޑީ ފުރިހަމަ ކުރުމަށް މަސައްކަތް ކުރަމުންނެވެ.
އޭނާ ބުނިގޮތުގައި ޢިލްމުގެ ބޭނުންތެރިކަން އެއްވެސް އުމުރެއްގައި ހުއްޓިފައި އޮވެގެން ނުވާނެއެވެ. ”އަނެއްކޮޅުން ތަޖުރިބާތަކުން ސާބިތުވެފައިވާ ގޮތުގައި ދިރިއުޅުން ހުއްޓޭނީ އިލްމެއް ނެތުމުން.“ އޭނާ ބުނެފައިވެއެވެ.
އުމުރުން 80 އަހަރުގެ މުސްކުޅި އަމާލު ޒުވާނުންނަށާއި ދުނިޔެއަށް ދައްކަމުން ދަނީ ދިރިހުރި މިސާލެކެވެ.
