ކުރީގެ ރައީސް ޔާމީން ޢަބްދުލްޤައްޔޫމްގެ މައްސަލަތައް ހަމަ ނިމުމާއެކީ އެ މައްސަލަ ނިންމަވާ ފަނޑިޔާރަށް ލިބޭ ޕްރޮމޯޝަނަކީ މިއަދު ކުރިމަތިވެފައި އޮތް ބޮޑު ބިރުވެރިކަމެއް ކަމަށް ޔާމީންގެ ގާނޫނީ ޓީމުގެ އިސް ވަކީލު, ކުރީގެ ނައިބު ރައީސް ޑރ.މުޙައްމަދު ޖަމީލު އަޙްމަދު ވިދާޅުވެއްޖެއެވެ.
ޖަމީލު މިހެން ވިދާޅުވީ ވ.އާރަށް ކުއްޔަށް ދޫކުރުމުގައި ޚިޔާނާތް ހިންގާފައިވާ މައްސަލައިގައި ކްރިމިނަލް ކޯޓުން ރައީސް ޔާމީނަށް އިއްވެވި ހުކުމުގެ އިސްތިއުނާފާ ގުޅޭ ގޮތުން މައުލޫމާތު ދެއްވުމަށް ގާނޫނީ ޓީމުން މިއަދު ބޭއްވި ނޫސްވެރިންގެ ބައްދަލުވުމުގައެވެ.
ޖަމީލު ވިދާޅުވީ ރައީސް ޔާމީންގެ ޝަރީއަތް ހިނގަނީ އިންސާފުވެރިކޮށެއް ނޫން ކަމަށާއި ރައީސް ޔާމީންގެ ޝަރީއަތުގައި ފޮރުވިފައިވާާ ކަންތައްތަކެއް އެބަހުރި ކަމަށެވެ. ރައީސް ޔާމީންގެ ޝަރީއަތް ހިންގާ ކޮންމެ ފަހަރަކު ސަރުކާރުން ނުފޫޒު ފޯރުވާ ކަމަށާއި ނުފޫޒު ފޯރުވަނީ ސިއްރަކުން ވެސް ނޫން ކަމަށް ޖަމީލު ވިދާޅުވިއެވެ.
”ރައީސް ޔާމީންގެ ޝަރީއަތް ހިންގާ ކޮންމެ ފަހަރަކު ދައުލަތުގެ ނުފޫޒު އެބަ ވަދެއޭ. ސަރުކާރުން ކަނޑައެޅިގެން ނުފޫޒު އެބަ ފޯރުވައޭ. ފޯރުވަނީ ސިއްރަކުން ވެސް ނޫނޭ. އަޅުގަނޑު މިއަދު ގަބޫލުކުރާ ގޮތުގަ ރާއްޖޭގެ ރައްޔިތުން މި ވާހަކަ ދައްކަންޖެހޭ.“
”ރައީސް ޔާމީންގެ މައްސަލަތަކުގަ ހަމަ މައްސަލަ ނިންމުމާއެކީގަ އެ ނިންމާ ފަނޑިޔާރަށް ލިބޭ ޕްރޮމޯޝަނަކީ އަޅުގަނޑުމެންނަށް މިއަދު އޮތް ވަރަށް ބޮޑު ބިރެއް. އޭގެ މާނައަކީ ކޮބައިތޯ. މާނައަކީ އަޅުގަނޑުމެން އެބަޖެހެއޭ މި ވާާހަކަ ދައްކަން.“ ޖަމީލު ވިދާޅުވިއެވެ.
ޖަމީލު ވިދާޅުވީ މިހެންވާނަމަ ގާނޫނު ނެގެހެއްޓޭ ކަމަކަށް ރައްޔިތުން ގަބޫލެއް ނުކުރާނެ ކަމަށެވެ. ޖުޑިޝަރީގެ އަމިއްލަ އިސްނެންގެވުމުގެ މަތިން މިވާާ ގޮތެއް ބަލަންޖެހިފައިވާ ކަމަށް ވެސް ޖަމީލު ވިދާޅުވިއެވެ.
އެމްއެމްޕީއާރްސީގެ ޚިޔާނާތުގެ މައްސަލައިގައި ރައީސް ޔާމިންގެ މައްޗަށް ފުރަތަމަ އުފުލި މަނީ ލޯންޑަރިންގެ ކުށުގެ ދަޢުވާގެ ޝަރީޢަތް ކްރިމިނަލް ކޯޓުގައި ކުރިއަށް ގެންދެވީ އެ ކޯޓުގެ ކުރީގެ ފަނޑިޔާރު އަޙްމަދު ހައިލަމެވެ. ނަމަވެސް ރައީސް ޔާމީންގެ މައްސަލައިގެ ހުކުމްކުރުމަށް ދެތިން ގަޑިއިރަށްވެފައި ވަނިކޮށް ހައިލަމް ސަސްޕެންޑްކުރުމަށްފަހު, ކްރިމިނަލް ކޯޓު ހިންގެވުން ވަގުތީ ގޮތުން ހަވާލުކުރެއްވީ ފަނޑިޔާރު ޢަލީ ރަޝީދާއެވެ.
ވޮޑަމުލާ މައްސަލައިގައި ރައީސް ޔާމީނަށް 5 އަހަރުގެ ޖަލު ހުކުމް އިއްވެވީ ވެސް ފަނޑިޔާރު ޢަލީ ރަޝީދެވެ.
އޭގެ ދުވަސްކޮޅެއް ފަހުން ފެނިގެންދިޔައީ ޢަލީ ރަޝީދު ސްޕްރީމް ކޯޓުގެ ފަނޑިޔާރުކަމަށް އައްޔަން ކުރެއްވި ތަނެވެ.
2021 ގައި ހައިލަމް އާންމުކުރެއްވި ބަޔާނެއްގައި ވިދާޅުވެފައިވަނީ އިދިކޮޅު ސިޔާސީ ލީޑަރެއްގެ ގޮތުގައި ހުރި ފަރާތެއްގެ ޝަރީޢަތް އަވަސް އަރުވާލައިގެން ކުރިއަށް ގެންދިޔަ އިސްތިއުނާފީ ކޯޓެއްގެ ތަޖުރިބާ ނެތް ފަނޑިޔާރަކަށް, ސުޕްރީމް ކޯޓުގެ ގޮނޑި ލިބިވަޑައިގަތީ އިއްތިފާގަކުން ނޫންކަން އޭނާއަށް އެ ގޮނޑި ދިން މީހުން ނޫން އެންމެން ގަބޫލުކުރާނެ ކަމަށެވެ.
