ސްޕާ ހިންގުމުގެ ގަވާއިދެއް ފުރަތަމަ ފަހަރަށް އެކުލަވާލައި, މިހާރު ހިންގަމުން އަންނަ އެފަދަ ވިޔަފާރިތައް އަލުން ރަޖިސްޓްރީ ކުރުމަށް އަންގައިފިއެވެ.
އިކޮނޮމިކް މިނިސްޓްރީން މިއަދު ވަނީ ”ސްޕާގެ ވިޔަފާރި ހަރަކާތް ރަޖިސްޓަރީކޮށް ހިންގުމުގެ ގަވާއިދު“ އާންމުކޮށްފައެވެ.
މި ގަވާއިދުގެ މަގުސަދަކީ ސްޕާގެ ވިޔަފާރި ހަރަކާތް ހިންގާ ތަންތަނުގައި ހުންނަންޖެހޭ އަސާސީ މިންގަނޑުތައް ބަޔާންކޮށް އެފަދަ ހަރަކާތްތައް ރަޖިސްޓްރީކޮށް ހިންގުމުގައި ޢަމަލުކުރަންޖެހޭ އުސޫލުތައް ކަނޑައަޅައި ބަޔާންކުރުމެވެ.
އެ ގަވާއިދުގައިވާ ގޮތުން މިހާރު ހިންގަމުން އަންނަ މިފަދަ ތަންތަން 90 ދުވަސްތެރޭގައި އަލުން ރަޖިސްޓްރީ ކުރަންޖެހޭނެއެވެ. ސްޕާގެ ވިޔަފާރި ހަރަކާތް ރަޖިސްޓަރީ ކުރެވޭނީ ގިނަވެގެން 2 އަހަރު ދުވަހުގެ މުއްދަތަށެވެ.
ގަވާއިދުގައިވާ ގޮތުން ރާއްޖޭގައި ހިންގާ ސްޕާގެ ވިޔަފާރި ހަރަކާތް ހިންގާ ތަނަކުންދޭ ޚިދުމަތަކާބެހޭ މަޢުލޫމާތު ނުވަތަ އެ ޚިދުމަތެއްގެ ވީޑިއޯ ނުވަތަ ފޮޓޯ މީސް މީޑިއާގެ އެއްވެސް ޒަރީޢާއެއް މެދުވެރިކޮށް އަންނަނިވި މިންގަނޑުތަކާ ޚިލާފަށް އިސްތިހާރުމަކީ މަނާކަމެކެވެ.
1.މުދާ ގަންނަ ފަރާތްތަކާއި ޚިދުމަތް ލިބިގަންނަ ފަރާތްތައް ހިމާޔަތްކުރުމުގެ ޤާނޫނާ ޚިލާފަށް އިސްތިހާރުކުރުން.
2.މުޖުތަމަޢުގެ އަދަބު އަޚްލާޤުގެ މިންގަނޑުކަމަށް އާންމުގޮތެއްގައި ގަބޫލުކުރާ މިންގަނޑުތަކާ ޚިލާފަށް އިސްތިހާރުކުރުން.
3.އިޖުތިމާޢީ މިންގަނޑުތަކަށް ނުފެތޭ ބަސްމަގާއި އިޝާރާތާއި އަޑު އިސްތިހާރުގައި ބޭނުންކުރުން ނުވަތަ ދެއްކުން.
4.ސްޕާގެ ވިޔަފާރި ހަރަކާތް ހިންގާ ތަން އިސްތިހާރު ކުރުމުގައި އެއްވެސް މީހަކު ހިމެނުން ނުވަތަ ދެއްކުން.
5.ރާއްޖޭގެ އެއްވެސް ޤާނޫނަކާއި ނުވަތަ ގަވާއިދަކާ ޚިލާފު އިސްތިހާރު ކުރުން.
މީގެއިތުރުން ވިޔަފާރި ހަރަކާތުގައި މަސައްކަތްކުރާ އެއްވެސް މުވައްޒަފަކު ސްޕާގެ ނުވަތަ ސްޕާއިން ފޯރުކޮށްދޭ ޚިދުމަތަކާ ގުޅޭ ގޮތުން އޯޑިއޯއެއް ނުވަތަ ވީޑިއޯއެއް ނުވަތަ ފޮޓޯ އަމިއްލަ ހައިސިއްޔަތުން ނަމަވެސް މީސްމީޑިއާގައި އާންމުކުރުމަކީ ވެސް މަނާކަމެކެވެ.
ސްޕާގެ ވިޔަފާރި ހަރަކާތް ހިންގާ ތަންތަނުގައި ހަމުގެ ބަލިތަކަށް ފަރުވާދިނުމާއި، ލެބޯރެޓަރީ ޓެސްޓު ހެދުމާއި، އެކްސްރޭގެ ޚިދުމަތް ދިނުމާއި، އެސިޑު ނުވަތަ މެޝިން ބޭނުންކޮށްގެން ހަމަށް އެއްވެސް ފަރުވާއެއް ދިނުމާއި، ބިހި ނުވަތަ ލަކުނު ނުވަތަ އުން ނައްތައިލުމާއި، އެފަދަ ފަރުވާއަކަށް އެއްވެސް ބާވަތެއްގެ ސާރޖިކަލް ޚިދުމަތެއް ދިނުމާއި، ސިއްހީ އެއްވެސް ޚިދުމަތެއް ނުވަތަ އޮޕަރޭޝަނުގެ ޚިދުމަތެއް ދިނުމާއި، ހަށިގަނޑުގެ އެތެރެއަށް ނުވަތަ ދެހަންދޭތެރެއަށް މާއްދާއެއް އެތެރެވާނޭފަދަ ގޮތަކަށް ނުވަތަ ނޮން އިންވޭސިވް ޓްރީޓްމަންޓަކަށް ނުވާ ގޮތަކަށް ސިއްހީ ޚިދުމަތް ދިނުމަށް ހުއްދަދޭ ފަރާތުގެ ހުއްދަނެތް ފަރާތަކުން މިފަދަ ޚިދުމަތެއް ދިނުމަކީ މަނާކަމެކެވެ.
ސްޕާގެ ވިޔަފާރި ހަރަކާތެއް މި ގަވާއިދުގެ ދަށުން ރަޖިސްޓަރީ ކުރުމަކާ ނުލައި އެއްވެސް ފަރާތަކުން ހިންގައިފިނަމަ އެ ފަރާތެއް 10000 ރުފިޔާއިން ޖޫރިމަނާ ކުރާނެއެވެ.
