ރޯދަމަހަށް ޚާއްސަކޮށްގެން ހުޅުމާލެ ދެވަނަ ފިޔަވަހީގައި އެސްޓީއޯއިން ފިހާރައެއް ހުޅުވަން ނިންމައިފިއެވެ.
އެސްޓީއޯއިން މިއަދު ބުނީ ރޯދަމަހަކީ އަބަދުވެސް ބާޒާރުގައި ކާބޯތަކެތީގެ އަގުތައް އުފުލި، އެ ތަކެތި ލިބުމުގެ ދަތިކަން އިންތިހާއަށް އިހްސާސް ކުރެވޭ ދަނޑިވަޅެއް ކަމަށާއި، އާންމުންގެ މިފަދަ ޝަކުވާތަކާއި ނުތަނަވަސްކަމަށް ހައްލު ހޯދައިދިނުމަކީ 1964 ވަނަ އަހަރު ”އަތިރީ މާފަންނު“ ނަމުން އެސްޓީއޯ އުފެދުމުގެ މައިގަނޑު އެއް އަސްލު ކަމަށެވެ.
މިއަދާ ހަމައަށްވެސް އެސްޓީއޯ ހިންގަމުން އަންނަނީ މި އަސްލުގެ މަތީގައި ކަމަށާއި، އެއިރެއްގައި އާންމުންނަށް ދިމާވެފައިވާ ދަތިތަކަށް ޒަމާނީ ހައްލު ހޯދައިދިނުމަކީ އަމާޒެއް ކަމަށް އެ ކުންފުނިން ބުންޏެވެ. އަދި މާކެޓް ޓްރެންޑްތަކަށް އަންނަ ބަދަލުތަކާއި އެކު ދިމާވެދާނެ ކަންކަމަށް ތައްޔާރުވުމަކީ ވެސް އެހާމެ މުހިންމުކަމެއްކަން އެސްޓީއޯއިން ފާހަގަކުރިއެވެ.
”މި އަހަރުގެ ރޯދަމަސް ކައިރިވަމުން އައުމާއެކު އެސްޓީއޯއަށް ލިބެމުން އަންނަ އެންމެ ބޮޑު އެއް ޝަކުވާއަކީ ފިޔާ، އަލުވި އަދި ބިސް ފަދަތަކެތީގެ އަގުތައް އަރައިގެން ގޮސްފާނެކަމުގެ ޝަކުވާ. އަދި ހުޅުމާލޭގައި މިވަގުތު އެސްޓީއޯގެ ފިހާރަ މަރާމާތުކުރުމަށް ބަންދު ކޮއްފައި ހުރުމާއެކު އެސްޓީއޯއިން ޒަރޫރީ ބޭނުމަށް އެތެރެކުރާ ކާބޯތަކެތި ލިބޭނޭ އެސްޓީއޯގެ ފިހާރައެއް ނެތްކަމުގެ ޝަކުވާ. އެއީ ހުޅުމާލޭ ފަދަ ބޮޑު އާބާދީއެއްގައި އެސްޓީއޯގެ ފިހާރައެއް ނެތުމުން ތަކެތީގެ އަގު ބޮޑުވެގެން ގޮސްދާނޭކަމުގެ ޝަކުވާ.“
އެއާއެކު މާލެއަށް ދަތުރުކޮށް ކިއުގައި ޖެހެން ޖެހިދާނޭކަމުގެ ބިރު ވެސް އެބައޮތް ކަމަށާއި ރަނގަޅު ރޭޓެއްގައި ތަކެތިހޯދުމަށް ބާޒާރުމަތީ އެއްތަނުން އަނެއްތަނަށް ދުވަންޖެހިދާނޭ ކަމުގެ ނުތަނަވަސްކަން ވެސް އެބައޮޮތް ކަމަށެވެ.
މިފަދަ މުހިންމު ޝަކުވާތައް ދެނެގަނެ ޒަމާނީ ހައްލު ހޯދައިދިނުމުގެ ގޮތުން ހުޅުމާލޭ ދެވަނަ ފިޔަވަހީގެ ވިނަރެސް ފްލެޓް ތިރީގައި ރޯދަމަހަށް ޚާއްސަ ކޮށްގެން ފިހާރައެއް ހުޅުވުމުގެ މަސައްކަތް ފަށާފައިވާ ކަމަށް އެސްޓީއޯއިން ބުންޏެވެ.
”ބޭނުމަކީ އެސްޓީއޯގެ މުދާ ރަނގަޅު ރޭޓެއްގައި ރައްޔިތުންނަށް ފަސޭހަކަމާއެކު ފޯރުކޮށްދިނުން.“
ފިހާރަ ހުޅުވުމުގެ މަސައްކަތް ބާރު ދުވެލީގައި ކުރެވެމުން އަންނަ ކަމަށާއި، އަންނަ މާޗުމަހުގެ ނިޔަލަށް ފިހާރަ ހުޅުވޭނެ ކަމަށް ލަފާކުރެވޭ ކަމަށް އެސްޓީއޯއިން ބުންޏެވެ.
އެސްޓީއޯއިން ބުނި ގޮތުގައި ފިހާރައިން ރީޓެއިލް އަދި ހޯލްސޭލްގެ ޚިދުމަތް ވެސް ލިބިގެންދާނެއެވެ. އަދި އެސްޓީއޯއިން އާންމުކޮށް އެތެރެކުރެވޭ ބާވަތްތައް ފިހާރައިން ލިބޭނެ ކަމަށާއި، މީގެ އިތުރުން ރޯދަމަހަށް ޚާއްސަކޮށްގެން އެތެރެކުރެވޭ ފިޔާ, އަލުވި އަދި ބިސް ވެސް ލިބޭނެ ކަމަށެވެ.
އެސްޓީއޯއިން ބުނީ އަންނަ މަހުގެ ކުރީކޮޅުގައި އެސްޓީއޯއަށް ފިޔާ، އަލުވި އަދި ބިހުގެ ސްޓޮކް ލިބިގެންދާނެ ކަމަށެވެ. އެ އަގުތައް ހިފެހެއްޓުމުގެ ގޮތުން ހުސްވިޔަ ނުދީ އާންމުންނާ ހަމައަށް ފޯރުކޮށްދިނުމަށް މިހާރު ތައްޔާރުވެފައިވާ ކަމަށް ވެސް އެސްޓީއޯއިން ބުންޏެވެ.
