އާސިރު ފެނުނީ އެއާޕޯޓު ޓާމިނަލްތެރެއިން: ގެއަށް އައިފަހުން މާ ގިނަ ވާހަކައެއް ނުދައްކާ

ގެއްލިގެން ހޯދަމުން އަންނަތާ 13 ދުވަސްވީ ފަހުން މިދިޔަ ބުރާސްފަތި ދުވަހުގެރޭ މުޙައްމަދު އާސިރު އިސްމާޢީލް ފެނުނީ ވެލާނާ އިންޓަނޭޝަނަލް އެއާޕޯޓުގެ ޓާމިނަލް ތެރެއިން ކަމަށް އޭނާގެ ޢާއިލާއިން މިއަދު ބުނެފިއެވެ.

ސ.މަރަދޫފޭދޫ /ގަސްކަރަ މުޙައްމަދު އާސިރު އިސްމާޢީލަށް ވީނުވީއެއް ނޭނގި ގެއްލުމުން ޢާއިލާގެ ފަރާތުން ފުލުހުންނަށް އެކަން ރިޕޯޓުކުރީ މި މަހުގެ 5 ވަނަ ދުވަހުގެ 16:30 ގައެވެ.

ފުލުހުން ބުނެފައިވަނީ އާސިރު ހޯދަން 150 ގަޑިއިރަށްވުރެ ގިނަ ސީސީޓީވީ ފުޓޭޖު ބަލާފައިވާ ކަމަށެވެ.

އެ ގޮތުން ބެލިބެލުމުން ފެބުރުއަރީ 04 ވަނަ ދުވަހުގެ 19:20 ހާއިރު ބޮޑުތަކުރުފާނުމަގު، ހުޅުމާލެ ފެރީ ޓާމިނަލް ކައިރިން ހުދުކުލައިގެ ޓެކްސީއެއްގައި އެއާޕޯޓަށް ގޮސް އެއާޕޯޓު ޓާމިނަލަށް އާސިރު ވަންނަކަން ފުލުހުންގެ ސީސީޓީވީއިން ލިބިފައިވާ ފުޓޭޖްތައް އެނަލައިޒް ކޮށްގެން ހޯދިފައިވާކަމަށް ފުލުހުން ބުނެފައިވެއެވެ. ނަމަވެސް އޭނާ އެއާޕޯޓަށް ވަންނަ ސަހަރަހައްދުގައި އިތުރު ކެމެރާއެއް ނެތުމުން ދެން ދިޔަ ހިސާބެއް ދެނެގަނެވިފައެއްނުވާ ކަމަށް ފުލުހުން ކުރިން ބުނެފައިވެއެވެ.

މިދިޔަ ބުރާސްފަތިރޭ އާސިރު ފެނުނުކަން ހާމަކުރެއްވީ ހޯމް މިނިސްޓަރު އިމްރާނެވެ. އިމްރާން ވިދާޅުވީ ފުލުހުން ކުރި މަސައްކަތުން އާސިރު ފެނިފައިވާ ކަމަށެވެ.

”ދިޑެއިލީ“ އަށް މަޢުލޫމާތު ދެއްވަމުން އާސިރުގެ ބޭބެއަކު މިއަދު ބުނުއްވީ އެއާޕޯޓު ޓާމިނަލް ތެރެއިން އާސިރު ފެނިގެން ފުލުހުންނަށް ރިޕޯޓުކުރީ އެއާޕޯޓުގައި ރެޕަކަށް އުޅޭ މީހެއް ކަމަށް އޭނާއަށް މަޢުލޫމާތު ލިބުނު ކަމަށެވެ.

އޭނާ ބުނުއްވި ގޮތުގައި އާސިރުގެ ގެއަށް އައިފަހުން މާގިނަ ވާހަކައެއް ނުދައްކައެވެ.

”އެކަމާ ގުޅިގެން އޭނައާ ސުވާލުކުރުމުން އެއްވެސް އެއްޗެއް ނުބުނޭ, އެއްވެސް ޖަވާބެއް ނުދޭ. އަނެއްހެން ނޯމަލްކޮށް ދައްކާ ވާހަކައަކަށް ނޫނީ އެއްޗެއް ނުބުނޭ. ދެން މި ވަގުތު ތަންކޮޅެއް އަވަސްވީމަ އޭނާގެ ސިކުނޑިއަށް ޕްރެޝަރ އައިސްދާނެކަމަށް ބަލާފައި އަޅުގަނޑުމެން މިތިބީ މާ ގިނަ ސުވާލުނުކޮށް.“

އޭނާ ބުނުއްވީ އާސިރު އިއްޔެ އައިޖީއެމްއެޗަށް ޑޮކްޓަރަށް ދައްކާފައިވާނެ ކަމަށާއި ޓެސްޓު ހެދުމަށްފަހު, ނަފްސާނީ ބަލިތަކާބެހޭ ޚާއްސަ ޑޮކްޓަރަކަށް ދައްކަން އެޕޮއިންޓްމެންޓް ދީފައިވާ ކަމަށެވެ. ޑޮކްޓަރު ވެސް ލަފާ ދެއްވަނީ އެކަމާ ގުޅިގެން އާސިރާ މާ ގިނައިން ސުވާލު ނުކުރުމަށް ކަމަށް އޭނާ ބުނުއްވިއެވެ.

އާސިރު ގެއްލުނު ހާދިސާއާ ގުޅޭ ގޮތުން އެހެން މީހެއްގެ ފަރާތުން ވެސް އަދި އެއްވެސް މަޢުލޫމާތެއް ނުލިބޭ ކަމަށް އޭނާ ބުނުއްވިއެވެ.

އާސިރަކީ ހުޅުމާލޭގައި ހުންނަ ގާމެންޓްސް ފިހާރައެއްގައި މަސައްކަތްކުރާ މީހެކެވެ. ހާދިސާގެ ފަހުން އާސިރު އަދި ވަޒީފާއަށް ނުނިކުންނަ ކަމަށް އާސިރުގެ ބޭބެ ބުނުއްވިއެވެ.

ފުލުހުން މިއަދު މީޑިއާތަކަށް ފޮނުވި މެސެޖެއްގައި ބުނީ އާސިރު ގެއްލުނު މައްސަލަ އިތުރަށް ބަލަމުންދާ ކަމަށެވެ.