އެމްޑީޕީގެ އުންމީދުގެ ހުޅުކޮޅު ނިއްވައިލުމަށް ބަޔަކު ބަލަބަލައި ތިބިކަން ހަނދާންކުރަންޖެހޭ ކަމަށް ޗެއާޕާސަން ފައްޔާޟް އިސްމާޢީލް ވިދާޅުވެއްޖެއެވެ.
އެމްޑީޕީގެ ރިޔާސީ ޓިކެޓް ރައީސް އިބްރާހިމް ޞާލިޙާ ހަވާލުކުރުމަށް ކާނިވަލުގައި މިރޭ ބޭއްވި ޚާއްސަ ޖަލްސާގައި ފައްޔާޟް ވިދާޅުވީ މީގެކުރިން ހުރިހާ ބާރެއް ހުރިހާ ޙައްޤެއް ހުރިހާ އިޚުތިޔާރެއް އޮންނަނީ އޭރު ހުންނަވާ ވެރިއެއްގެ އަތްޕުޅުގައި ކަމަށާއި, އެ ނޫން ގޮތެއް އޭރަކު ނެތް ކަމަށެވެ. އަދި އޭގެ ސަބަބުން އެތައް އަނިޔާއަކާއި ބޭއިންސާފެއް ތަހައްމަލު ކުރަން ޖެހުމުން އެ ގޮތް ބަދަލުކުރަން ދިވެހިން ބޭނުންވި ކަމަށާއި އެކަން ބަދަލުކުރަން ނުކުތް ބަޔަކީ އެމްޑީޕީ ކަމަށް ފައްޔާޟް ވިދާޅުވިއެވެ.
އަދި އޭރު ހާލަތު އޮތީ އެކެއް ދެ މީހަކަށް އެކަން ބަދަލުކުރެވޭ ހިސާބަކު ނޫން ކަމަށް ވެސް ފައްޔާޟް ވިދާޅުވިއެވެ.
”އެކަން ބަދަލުކުރުމަށްޓަކައި ނުކުމެ ބޯ ގިނަ ކުރި ބަޔަކީ އަޅުގަނޑުމެން. މި ފަޚުރުވެރި ޕާޓީން.“
ނަމަވެސް އޭރު އެކަމަށް ނުކުތް މީހުންނަށް ބޮޑެތި އަނިޔާތައް ތަހައްމަލު ކުރަން ޖެހުނު ކަމަށް އޭނާ ވިދާޅުވިއެވެ.
އެމްޑީޕީން އައީ ރައްޔިތުން ބޭނުންވާ ގޮތަށް ކަންކަން ގެންދަން ކަމަށާއި ރައްޔިތުން ބޭނުންވީ ބިރުވެރިކަމެއް ނެތިިިި މިނިވަންކަމާ އެއްކޮށް ދިރިއުޅުން ބިނާކުރަން ކަމަށާއި ތާހިރު ފުދުންތެރި ދިރިއުޅުމެއް ބިނާކުރަން ކަމަށް ވެސް ފައްޔާޟް ވިދާޅުވިއެވެ.
ފައްޔާޟް ވިދާޅުވީ އެ ކަންކަން ޙަޤީޤަތަކަށް ހަދަން 2008 ގައި އުންމީދުތަކެއް ލިބިގެންދިޔަ ނަމަވެސް އެ އުންމީދުތައް ބީވެގެންދިޔައީ ޒަމާންތަކެއް ވަންދެން ރާއްޖޭގައި ވަކި ހިއްޕާލައިފައި އޮތް އަނިޔާވެރިކަން އެ އުންމީދުތަކުގެ މައްޗަށް ގަދަވެގެން ދިއުމުން ކަމަށެވެ.
”މިއަދުގެ ވެސް ޙަޤީޤަތަކީ އެ އަނިޔާވެރިކަން މި އުންމީދުގެ ހުޅުކޮޅު ނިއްވައިލުމަށް ފުރުސަތުތަކަށް ބަލަބަަލައި އޮތްކަން. މި ޙަޤީޤަތް އަޅުގަނޑުމެން އަބަދުވެސް ގަބޫލުކުރަން އެބަޖެހޭ. އެކަން ދެނެހެރު އަޅުގަނޑުމެން ތިބެންޖެހޭ.“
ނަމަވެސް ހިތާމައަކީ ”އަޅުގަނޑުމެންގެ ތެރެއިން ބަޔަކަށް ވެސް އެ ހާލަތު ހަނދާން ނެތި ތިބިކަން“ ކަމަށް އޭނާ ވިދާޅުވިއެވެ.
”އަޅުގަނޑު ކުރިން ދެންނެވި އެމްޑީޕީގެ އެ އުނދަގޫ މަރުހަލާ މިހާރު ނިމިއްޖެ. އޭރު އެކަމަށް ނުކުތް ޢުމުރު މިއަދު ތިބީ ދޮށީ ޢުމުރުގަ. އޭރު ތިބި ނޫކަށި ޒުވާނުން މިއަދު މި ތިބީ ހަރު ޢުމުރަށް ފެށިފަ. އަލުން އަނބުރާ އެ ދުވަސް އިއާދަވުމަށް އެ މީހުން ބޭނުމެއް ނުވޭ.“
”އަޅުގަނޑުގެ އިލްތިމާސަކީ ބުރަ މަސައްކަތްތަކަކުން އެތައް ބައެއްގެ ލޭ އޮހޮރުވައިގެން މި ހޯދިފައިވާ މިނިވަންކަމާއި އިންސާފު އަޅުގަނޑުމެން އަތުން ބީވެގެން ދިޔަ ނުދިނުމަށްޓަކައި އަޅުގަނޑުމެން އެންމެން އެކައްޗެއް ކިޔައިގެން އެކުއެކީގައި ގޮސް އަޅުގަނޑުމެން ދާން ބޭނުންވާ މަންޒިލަށް ދިއުމަށްޓަކައި އަތް ގުޅައިލުމަށް.“
އެކަން ކުރެވޭނީ އެމްޑީޕީއަށް ވެރިކަމުގައި ދެމި ތިބެވިގެން މިދާ ގޮތަށް ގޮސް ރައީސް ޞާލިޙާއެކީ ރިޔާސީ އިންތިޚާބު ކާމިޔާބުކޮށްގެން ކަމަށާއި އެކަން ކާމިޔާބުވާނެކަމުގެ ފުރިހަމަ ޔަޤީންކަން އެބައޮތް ކަމަށް ވެސް ފައްޔާޟް ވިދާޅުވިއެވެ.
