މުޅިރާއްޖެއަށް ހުޅުވާލެވިގެން ގޯލްޑަން ފުޓްޝެލް އެސޯޝިއޭޝަނުން ހުޅުމާލޭގައި މިހާރުކުރިއަށް ގެންދާ ގޯލްޑަން ފުޓްޝެލް ފުޓްބޯޅަ މުބާރާތުގައި ފޯކައިދޫ ޓީމުގެ އަމާޒަކީ އަތޮޅު ޗެމްޕިއަންކަން ފަހަނައަޅާ ދިޔުންކަމަށް ފޯކައިދޫ ފުޓްބޯޅަ ކުލަބުގެ ޒުވާން ކޯޗް ހުސައިން ސައިފު ވިދާޅުވެއްޖެއެވެ.
ރޭ ށ.ޅައިމަގާއިއެކު ކުޅުނު މެޗަށްފަހު ދިޑެއީލީއާއި ވާހަކަ ދައްކަމުން ހުސައިން ސައިފު ވިދާޅުވީ، ފޯކައިދޫއަކީ އަތޮޅު ޗެމްޕިއަންގެ ގޮތުގައި އަބަދުވެސް އޮންނަ ރަށެއްކަމަށާއި، އެލަގަސީ ހިފަހައްޓަން ބޭނުންވާކަމަށެވެ.
“ އަޅުގަނޑުމެންނަށް އިރާދަކުރެއްވިޔާ އަތޮޅު ޗެމްޕިއަންކަން ހޯދުމަކަށް ހުރަހެއް ނެތް،“ ފުރަތަމަ މެޗުގައި ފީވަށް ބަލިކުރި ޓީމުގެ ކޯޗު ހާމަކުރިއެވެ.
މިހާރު ފޯކައިދޫޓީމު ވަނީ ގްރޫއްޕު ސްޓޭޖް ފަހަނަ އަޅާ ސެމީފައިނަލަށް ދަތުރުކޮށްފައިކަން
ހާމަކުރަމުން ސައިފު ވިދާޅުވީ، މިކަމުގައި ރަށުގެ ހުރިހާ ރަށްޔިތުންގެ އެއްބާރުލުން ނިހާޔަތަށް ބޭނުންވާކަމަށެވެ.
ހުސައިން ސައިފުއަކީ، 1996 ގައި ފޯކައިދޫ ސްކޫލުގެ އިންޓަހައުސް ފުޓްބޯޅަ މުބާރާތްތަކާއި ހަމައިން ފުޓްބޯޅައިގެ ތެރެއަށް ވަދެފައިވާ ޒުވާނެކެވެ. ވަރަށް އުމުރުން ޅައިއިރު ހައުސްކެޕްޓަންކަން ކުރުމަށްފަހު، އުމުރުން އެންމެ 15 އަހަރުގައި ފޯކައިދޫ ފުޓްބޯޅަ ފުލްޓީމުގެ ފުރަތަމަ 11 އިންވެސް ޖާގަ ހޯދާފައިވެއެވެ. އަދި އަތޮޅާއި، ޒޯން ފުޓްބޯޅަ މުބާރާތްތަކުގައި ށ.އަތޮޅާއި ނޫން އަތޮޅާއި ހދ.ގައިވެސް ކުޅެ ތަޖުރިބާ ހޯދާފައިވެއެވެ. މީގެ އިތުރުން ފޯކައިދޫ ފުރަތަމަ 11 އިން ޖާގަ ހޯދުމަށްފަހު ޓީމުގެ ކެޕްޓަނެއްގެ ގޮތުގައި ގިނަ ކާމިޔާބީތައް ހޯދާފައިވެއެވެ.
ކާމިޔާބީއަކަށްފަހު، ކާމިޔާބީއެއް ފުޓްބޯޅައިގައި ހާޞިލުކުރަމުން ޅައުމުރުގަައި ކުރިއަށް ދަނިކޮށް ފަައިގެ ކަކުލު ހުޅަށް ލިބުނު އަނިޔާއެއްގެ ސަބަބުން ފުޓްބޯޅަ ކުޅުމާއި ދުރަށް ދާން މަޖުބޫރިވިއެވެ. އެހެންނަމަވެސް ސައިފު ހިތުގައި ފުޓްބޯޅައަށާއި ފޯކައިދޫއަށް އޮތް ލޮތްބެއްްގެ ސަބަބުން ފުޓްބޯޅަައާއި ދުރަށް ނުދެވުމުގެ ނަތީޖާއެއްގެ ގޮތުން، 2016 ވަނަަ އަހަރު ރެފްރީކޯސް ފުރިހަމައަކޮށް ފުޓްބޯޅަ ދަޑަށް އެރިއެވެ. އަދި ތަފާތުއެކި ހިސާބުތަކުގައި ފުޓްސެލްއާއި ފުޓްބޯޅައިގެ ބޮޑެތި މުބާރާތްތަކުގައި ރެފްރީކަންކޮށް އެރޮގުންވެސް ގިނަ ތަޖުރިބާތަކެއް ހޯދާފައިވެއެވެ. އަދި 2019 ވަނަ އަހަރު ފުޓްބޯޅަ ކޯޗިން ސީލެވެލް ފުރިހަމަކޮށް ޓީމުތައް ތަމްޞީލުކުރުމަށް ބޮޑެތި ޓީމުތަކާއި ހަވާލުވެ ދަޑުމަތީގައި ސައިފުއަށް ލިބިފައިވާ ތަޖުރިބާގެ ބޭނުން ހިފަން ފެށިއެވެ.
ނަތީޖާއެެއްގެ ގޮތުން ފޯކައިދޫ ފުޓްބޯޅަ ޓީމުގެ ހެޑްކޯޗެއްގެ ގޮތުގައި ގިނަ މުބާރާތްތަކުގައި މަސައްކަތްކުރުމުގެ ފުރުޞަތުލިބި ގިނަ ކާމިޔާބީތަކެއް ފޯކަައިދޫއަށް ހޯދަދިނެއެވެ. ފޯކައިދޫޓީމުގެ މުހިންމު ކުޅުންތެރިއެއްކަމަށްވާ އަބް ﷲ މާލިކު ހާމަކުރިގޮތުގައި ސައިފުއަކީ އެކުގައި މަސައްކަތްކުރަން ވަރަށް ފަސޭހަ ފުޓްބޯޅަައިގެ ކޮންމެ ކަމަކަށްވެސް ފިޓް ކޯޗެކެވެ.
މިހާރު ފޯކަައިދޫ ޓީމުގެ އަމާޒަކީ އަތޮޅު ޗެމްޕިއަންކަން ހޯދުމަށްފަހު، އަތޮޅުން ބޭރު ޓީމުތަކާއި ކުރިމަތިލުމެވެ. މިއީ ޒުވާން ކޯޗު ހުސައިން ސައިފުއަށް ގިނަ ތަޖުރިބާތަކެއް ކުރަންޖެހޭނެ އަދި ފަސޭހަ ކުރިމަތިލުންތަކަކަށް ނުވާނެކަން ޔަޤީނެއެވެ. އެހެންނަމަވެސް ސައިފުގެ ތަޖުރިބާ ބޭނުންކޮށް ކާމިޔާބީއާއި ހަމައަށް ވާޞިލުވުމަކީ އެންމެންގެ އެދުމެކެވެ.
