ސަމަދުބެ ރާއްޖެ އަތުވެއްޖެ، ބޭނުންވަނީ ގެއްލުމުގެ ބަދަލު ހޯދަން

މިދިޔަ ހޮނިހިރު ދުވަހު އިންޑިއާގެ އިމިގްރެޝަންގެ ބެލުމުގެ ދަށަށް ގެންދިޔަ ޕީޕީއެމްގެ ހުޅުމާލެ ދާއިރާގެ ރައީސް ޢަބްދުއްޞަމަދު (ސަމަދުބެ) ޑީޕޯޓުކޮށްލުމުން މިއަދު ރާއްޖެ އަތުވެއްޖެއެވެ.

އަނބިދަރިން ގޮވައިގެން ބޭސް ފަރުވާ ކުރުމަށް ސަމަދުބެ އިންޑިއާއަށް ދިޔައީ މި މަހުގެ 10 ވަނަ ދުވަހުއެވެ. އެ ގޮތުން ބެންގަލޫރުގެ މަނިޕާލް ހޮސްޕިޓަލުގައި ހުއްޓައި, އިންޑިއާގެ އިމިގްރެޝަންގެ ބެލުމުގެ ދަށަށް ސަމަދުބެ ގެންދިޔައީ ހޮނިހިރު ދުވަހުއެވެ.

އިންޑިއާއިން ޑީޕޯޓުކޮށްލުމުން ސަމަދުބެ ރާއްޖެއައީ މިއަދު މެންދުރުފަހު 13:55 ގައި ބެންގަލޫރުން އައި އެއަރ އިންޑިއާގެ ފުލައިޓެއްގައެވެ.

ރާއްޖެ އައުމަށްފަހު ޗެނަލް 13 އަށް ދިން ބަސްދީގަތުމެއްގައި ސަމަދުބެ ވަނީ އޭނާއަށް ކުރެވުނު ތަޖުރިބާ ހިއްސާކޮށްފައެވެ.

ސަމަދުބެ ބުނި ގޮތުގައި އޭނާ އިންޑިއާގެ އިމިގުރޭޝަންގެ ބެލުމުގެ ދަށަށް ގެންދިޔައީ އިނގިލީގެ ނިޝާނުގެ މައްސަލައެއް އުޅޭކަމަށް ބުނެ ކަމަށެވެ. ނަމަވެސް ރާއްޖޭގެ ފޮރިން މިނިސްޓްރީން ބެލިއިރު އޭނާގެ އެއްވެސް މައްސަލައެއް ނެތް ކަމަށް ބުނި ކަމަށާއި އިމިގުރޭޝަންގެ ބެލުމުގެ ދަށަށް ގެންދިޔައީ އޮޅުވާލައިގެން ކަމަށެވެ.

”އޮޅުވާލައިގެން މަކަރާއި ހީލަތުން ގެންގޮސްފަ 18 ގަޑިއިރު ހޭ ވެސް އަހައިނުލައި ބައިންދަ ބައިންދާފައި.. އަޅުގަނޑު ސުވާލުކޮށްފިން ކިހިނެއްތޯ ވީ. ބުނިހާއިރުން ބުނީ ތިހިރީ ކުށްވެރިވެފައޭ. ޔޫއަށް އިންޑިއާގެ ތެރޭ އުޅުން މަނަލޭ. އިންޑިއާއަށް އެރުމަކީ މަނާކަމެކޭ. އެހެންވީމާ ޖަލަށޭ ދާންޖެހޭނީ ފުރަތަމަ. ދެން އަޅުގަނޑު ބުނިން ޖަލަށް ދާނީ.. ކުރި ކުށެއް އަޅުގަނޑު ކައިރީ ބުނާށޭ.“

އެއަށްފަހު އަތުގައި އޮތް ފޯނު ވެސް އަތުލައިފި ކަމަށާއި އޭގެކުރިން އޭނާއަށް ހެޔޮއެދޭ ފަރާތްތަކަށް މެސެޖު ފޯރުކޮށްދީފައިވާނެ ކަމަށް ސަމަދުބެ ބުންޏެވެ.

”އަޅުގަނޑަށް އެނގޭ އަޅުގަނޑު ސީދާ މިގެންދަނީ ޑީޕޯޓުކޮށްލަންކަން. އެނގިއްޖެ އެމީހުންގެ ފުރަތަމަ ހަރަކާތްތައް ހުރިގޮތުން. ފުރަތަމަ އަޅުގަނޑު ބަލާދިޔައީ އިމިގުރޭޝަނުން. އެކަމު އަޅުގަނޑު ފުލުހުންގެ ކާރުގަ ދާންޖެހުނީ. ކާރުގަ ގެންގޮސްފަ އެއާޕޯޓުގަ އަޅުގަނޑާ ބައްދަލުކުރީ ކޯޓު ފަޓުލޫނުގަ ތިބި ބޮޑު ސިންގާ ފޯސްއެއް. ސީދާ ރޯ އެޖެންޓުން އަޅުގަނޑު ގޮވައިގެން ގޮސްފަ އެތާގެ އަޅުގަނޑަށް ލަފާކުރެވެނީ މުޅި އިމިގުރޭޝަނުގަ ވެސް ތިބީ ހުސް ރޯ މީހުން ކަމަށް. ގެންގޮސް ވަރަށް ރޫޑްކޮށް ވަރަށް ހަރުކަށިކޮށް އަޅުގަނޑާ ދޭތެރޭގަ ކަންތައްތައް ކުރީ.“

”18 ގަޑިއިރު ކޮށްފަ އަޅުގަނޑު ބުނެފިން އަޅުގަނޑު ބަނޑުފައިވެއޭ އެބަ. ބުނިހާއިރުން ބުނެފި ވާހަކަ ނުދައްކާ މަޑުކުރާށޭ. ތިމަންނަމެން އެއާލައިނާ އެބަ ވާހަކަ ދައްކަމޭ. އެއާލައިނުން އެ ރޭ ދަންވަރު 3:30 ގަ މީހަކު އައީ. އައިސްފަ އަޅުގަނޑު ސުވާލުކޮށްފިން އަޅުގަނޑު ވަރަށް ބަނޑުހައިވެގެންނޭ. ބުނީމަ އޭނަ 4:30 ގަ ކާ އެއްޗެއް ހިފައިގެން އައީ. އަޅުގަނޑު ފުރަތަމަ ކަސްޓަޑީގަ މީހުން ބައިތިއްބާ ތަނެކޯ ކިޔާފަ ވެއްދީ ސިޓިންރޫމެއް ކަހަލަ ތަނަކަށް. އެތާ އެތެރޭގަ ފިނިކަމުން. އެއާޕޯޓުތެރެ އެހާ ފިނި. ހަމަ ފެށުނީއްސުރެ އަނިޔާދެމުން އައިސްފަ އަޅުގަނޑަށް ރަޖައެއް ވެސް ލިބުނީ އެތާގަ އޮތް އެފްރިކާ މީހަކު ފުރައިގެން ދިޔައިމަ.“ ސަމަދުބެ އިތުރަށް ކިޔައިދިނެވެ.

ސަމަދުބެ ބުނި ގޮތުން އޭނާއަކީ ހިތުގެ ބައްޔާއި ލޭމައްޗަށް ދިއުމާއި ކޮލެސްޓްރޯލަށް ބޭސްކުރާ މީހެކެވެ. ނަމަވެސް އެކަމުގެ ތެރޭގައި 4 ދުވަސްވީއިރު ބޭސް ނުލިބުނު ކަމަށެވެ.

ސަމަދުބެ ބުނީ ނަފްސާނީ ގޮތުން އަދި ޖިސްމާނީ ގޮތުން ލިބުނު ގެއްލުމުގެ ބަދަލު އިންޑިއާ ސަރުކާރުން ހޯދަން ބޭނުންވާ ކަމަށެވެ.