ރާއްޖެއަށް މަސްތުވާތަކެތި އެތެރެކުރުމަކީ ދައުލަތުގެ ތެރެއިން ރޭވިގެން ހިންގަމުން އަންނަ ޖަރީމާއެއް ކަމަށް ތުހުމަތު ކުރައްވައި މާފަންނު އުތުރު ދާއިރާގެ މެންބަރު އިމްތިޔާޒު ފަހުމީ (އިންތި) ކަންބޮޑުވުން ފާޅުކުރައްވައިފިއެވެ.
ރާއްޖެއަށް ޑްރަގް ޓްރެފިކްކުރާ ބިދޭސީން އަނބުރާ ފޮނުވައިލެވޭ ގޮތަށް އަލަށް އެކުލަވައިލި ގަވާއިދު އިސްލާހުކުރަން ގޮވާލައްވައި ހެންވޭރު ހުޅަނގު ދާއިރާގެ މެންބަރު ޙަސަން ލަޠީފް ހުށަހެޅުއްވި ކުއްލި މައްސަލައަށް ބަހުސްކުރައްވަމުން އިންތި ވިދާޅުވީ ޙަސަން ހުށަހެޅުއްވި މައްސަލައަކީ ވަރަށް ބޮޑު ވަރަށް ސީރިއަސް މައްސަލައެއް ކަމަށެވެ. ނަމަވެސް މިއަދުގެ ޖަލްސާއިން ފެނުނީ ޖަވާބުދާރީ ކުރުވަނިވި ދައުލަތެއް ބިނާކުރުމުގެ އުސޫލު ނެތިކޮށްލުމުގެ ތުރީލައިން ރެޑް ވިޕެއް ނެރުނު މަންޒަރު ކަމަށާއި އެކަމާ ކަންބޮޑުވެވަޑައިގަންނަވާ ކަމަށް އިންތި ވިދާޅުވިއެވެ.
”…ވެރިކަންކުރާ ޕާޓީން, އެމްޑީޕީން, ސަރުކާރުގެ ސްޕަރމެޖޯރިޓީ އޮތް މަޖިލީހަކުން ޖަވާބުދާރީ ކުރުވަނިވި ބިނާކުރުމުގެ އުސޫލު ނެތިކޮށްލުމުގެ ތުރީލައިން ރެޑް ވިޕެއް ނެރުނީތީވެ އަޅުގަނޑު ކަންބޮޑުވޭ. އެއީ މާ ސީރިއަސް މައްސަލައެއްގެ ގޮތުގަ އަޅުގަނޑު ފާހަގަކުރަން.“
ޙަަސަންގެ ކުއްލި މައްސަލަ ހުށަހެޅުއްވީ މި މަހުގެ 6 ވަނަ ދުވަހު ރާއްޖެއަށް މަސްތުވާތަކެތި އެތެރެކުރި މަސްތުވާތަކެތި އަތުލައިގަތުމަށްފަހު, އެ ގެނައި އަންހެން މީހާ ވަގުތުން އަނބުރާ ފޮނުވައިލުމާ ގުޅިގެންނެވެ. އޭނާ ފޮނުވައިލީ ”ވައިގެ މަގުން ދިވެހިރާއްޖެއަށް އަންނަ ބިދޭސީއަކު ދިވެހިރާއްޖެއަށް މަސްތުވާތަކެތި އެތެރެކުރަން އުޅޭކަމަށް ޝައްކުކުރެވޭ ހާލަތްތަކުގައި އެ ފަރާތަކާމެދު ޢަމަލުކުރާނެ ގޮތުގެ ގަވާއިދު“ އާ އެއްގޮތްވާ ގޮތުގެ މަތިންނެވެ. އެ ގަވާއިދަކީ މިދިޔަ ޖަނަވަރީގައި ގެޒެޓްކުރި ގަވާއިދެކެވެ.
”ރާއްޖެއަށް ޑްރަގް އެތެރެކުރި އަންހެން މީހާ ފޮނުވައިލި މައްސަލައިން ސެޓް ކުރި ސްޓޭންޑަޑަކީ ފަޅާ ނާރާ ގޮތަކަށް އޮމާންކަމާއެކު ޑްރަގް ޓްރެފިކް ކުރެވިއްޖެ ނަމަވެސް އެ މީހާ ސަލާމަތްވީ. އަދި ފަޅާ އަރައްޖެނަމަ ވެސް އެ މީހާ ސަލާމަތްވީ. އެހެންވީމަ މި ސްޓޭންޑަޑް އެ ސެޓްކުރެވުނު ކަމަށް އަޅުގަނޑު ދެކެނީ. އެހެންވީމާ މި ދެންނެވި ގަވާއިދު ބާތިލުކުރަން މި ޖެހެނީ.“ އިންތި ވިދާޅުވިއެވެ.
އިންތި ވިދާޅުވި ގޮތުގައި ގިނަ އަދަދެއްގެ މަސްތުވާތަކެތި ރާއްޖެއަށް އެތެރެވެ, އެ ތަކެތި އަތުލައިގަނެއްޖެނަމަ އެ މައްސަލައެއްގައި ދުވަހަކު ވެސް ރަނގަޅަށް ތަޙްޤީޤެއް ހިންގިފައިނުވެއެވެ. އަދި ޝަރީޢަތެއް ހިންގި ކާމިޔާބުވެފައެއް ވެސް ނެތް ކަމަށެވެ.
”އެހެންވީމަ މީ އޯގަނައިޒްޑް ދައުލަތެއްގެ ތެރެއިން ވެސް އޯގަނައިޒްޑް ސިފައެއްގަ ކުރާ ޖަރީމާއެއް ގޮތުގަ އަޅުގަނޑަށް ހަމަ ގަބޫލުކުރަން އެބަޖެހޭ. ބޮޑެތި ބޮޑެތި މައްސަލަތަކަށް ސަރުކާރުން ހައްލެއް ނުހޯދައިދެވުނު. ފަސް އަހަރުގެ ދައުރެއް ނިމުނީ. ބޮޑު އެއްވެސް މައްސަލައެއްގަ ސިޔާސަތެއް ވެސް ނެތް, ސްޓޭންޑަޑެއް ވެސް ނެތް, ސްޓްރެޓަޖީ އެއްވެސް ނެތް.“
އިންތި ވަނީ މިފަދަ ކަންކަމާމެދު އިންތިހާއަށް ކަންބޮޑުވެވަޑައިގަންނަވާ ކަމަށާއި މި ނޫން ގޮތެއް ރައްޔިތުން ބޭނުންވާ ކަމަށް ވެސް ވިދާޅުވެފައެވެ.
