ތުރުކީވިލާތުގެ ދެކުނާއި ސޫރިޔާގެ އުތުރުގެ ސަރަޙައްދަށް ބާރުގަދަ ބިންހެލުމެއް އައިސްފައިވަނީ ފެބްރުއަރީ 6 ގެ ދަންވަރުގެ ވަގުތުގައެވެ.
ރިކްޓަރ މިންގަނޑުން 7.8 ގެ ބާރުމިނުގައި އައި ބިންހެލުމާއެކު އެތައް ސަތޭކަ ޢިމާރަތެއް ފުނޑުފުނޑުވެ ބިމާހަމަވިއެވެ. ވެއްޓި ސުންނާފަތިވިއެވެ. ބިންހެލުން އައި ވަގުތަކީ ގިނަ މީހުން ގެތަކުގައި ނިދާފައި ތިބި ވަގުތެވެ. މިއާއެކު ޢިމާރާތްތަކުގައި ތާށިވެ، އިމާރާތްތަކުގައި ދަށުގައި އެތައް ހާސް ބަޔަކު އަދިވެސް ތިބީ ތާށިވެފައެވެ.
ތުރުކީވިލާތުގެ ދެކުނާއި ސޫރިޔާގެ އުތުރުގެ ސަރަޙައްދަށް އައި ބާރުގަދަ ބިންހެލުންތަކުގައި އަނިޔާވި މީހުންނަށް އެހީތެރިވުމާށާއި މީހުން އިމާރާތްތަކުގެ ދަށުން ނެރުމަށްޓަކައި ދުނިޔޭގެ އެކި ކަންކޮޅުތަކުން އަންނަނީ އެ ޤައުމަށް އެހީތެރިވަމުންނެވެ. މީގެ ތެރޭގައި ދިވެހި ރާއްޖެވެސް ހިމެނެއެވެ.
ބިންހެލުންތަކުގައި އެތަކެއް ބަޔަކު ގެދޮރު ގެއްލި ހާލުގައި ޖެހިފައިވާއިރު ދުނިޔޭގެ އެކި ކަންކޮޅުތަކުން އަންނަނީ އެހީތެރިކަން ފޯރުކޮށްދެމުންނެވެ. ޚާއްސަގޮތެއްގައި އެތަކެއް ބަޔަކު ޒަޚަމްވެފައިވުމުގެ ސަބަބުން ހޮސްޕިޓާތަކަށްވެސް ވަނީ ބާރުބޮޑުވެފައެވެ. އެހެންކަމުން އެކި ޤައުމުތަކުން ސިއްޙީ އެހީތެރިކަންވެސް އަންނަނީ ފޮރުކޮށްދެމުންނެވެ.
މި ޤައުމުތަކުގެ ތެރޭގައި ދިވެހި ރާއްޖެވެސް ހިމެނެއެވެ. އެޤައުމުގެ ރައްޔިތުންނަށް އެހީތެރިވުމުގެ ގޮތުން ދިވެހި ރެޑް ކްރޮސަންޓުން ވަނީ ބީއެމްއެލްއާއި އެމްއައިބީގައި އެކައުންޓް ހުޅުވާ ފައިސާ ޖަމާކުރުމުގެ ފުރުޞަތު މިމަހުގެ 14 އަށް ހުޅުވާލާފައެވެ. މީގެ އިތުރަށް ސިއްޙީ އެހީތެރިކަން ފޯރުކޮށްދިނުމަށްޓަކައި އެތެރެ ހަށީގެ ޚާއްސަ ޑޮކްޓަރ ޑރ. މުޙައްމަދު އަލީ ވަނީ ތުރުކީވިލާތަށް ފުރާފައެވެ. މުޙައްމަދު އަލީ އެޤައުމަށް ފުރާފައިވަނީ އިންޓަނޭޝަނަލް އެއިޑް ކެމްޕެއިން (އައިއީސީ) އާއެކުގައެވެ.
ފުރުމުގެ ކުރިން ޑރ. މުޙައްމަދު ޢަލީ ސޯޝަލް މީޑިއާއަށް ދޫކޮށްލި ވީޑިއޯއެއްގައި ވިދާޅުވީ ތުރުކީގެ އެންމެ ފަހުގެ ޙާލަތު ބެލުމަށާއި، ޙާލުގައި ޖެހިފައި ތިބި ރައްޔިތުންނަށް އެހީތެރިވުމަށް އެ ޤައުމަށް ފުރާ ކަމަށެވެ. ބޭނުމަކީ ކިތަންމެ ކުޑަ ނަމަވެސް އެހީއެއް އަޅުގަނޑުމެންގެ ފަރާތުން ވެދެވެން އޮތްނަމަ ދެވެން އޮތް މިންވަރަކަށް އެހީ ދިނުންކަމަށް އެ ވީޑިއޯގައި އޭނާ ވިދާޅުވިއެވެ.
އަމިއްލަ ބިޒީ ޝެޑިއުލް އެއްފަރާތްކޮށްލުމަށްފަހު ޑރ. މުޙައްމަދު ޢަލީގެ ހުރިހާ ވަގުތެއް ހުސްކުރަން ބޭނުންވީ މި ބިން ހެލުމުގައި ހާލުގައި ޖެހުނު ފަރާތްތަކަށް އެހީތެރިކަން ފޯރުކޮށްދިނުމަށެވެ. ޞީއްޙީ އެހީތެރިކަން ބޭނުންވެފައިތިބި މުސްލިމު އަޚުންނާއި އުޚުތުންނަށް ހިތާއި ވަގުތު ހުސްކުރުމަށެވެ. އިންސާނިއްޔަތަށް ކުޑަނަމަވެސް ޚިދުމަތްކޮށްދިނުމަށެވެ.
ދިވެހިރާއްޖެއަކީ ކިތަންމެ ކުޑަ ޤައުމެއް ކަމުގައި ވިޔަސް ހާލުގަ ޖެހިފައި ތިބި ބަޔަކަށް އެހީތެރިވުމަށް އިސް ސަފުގަ ތިބޭ ބައެކެވެ. އަވަށްޓެރި ޤައުމުތަކާއި މުސްލިމް ޤައުމުތަކުގެ އިތުރަށް އެހެނިހެން ޤައުމުތަކަށް ކުރިމަތިވާ މިފަދަ އެތަކެއް ހާދިސާތަކުން އަރައިގަތުމަށްޓަކައި ރާއްޖެއިން އަންނަނީ ފައިސާގެ އެހީތެރިކަމާއި މިނޫނަސް އެތަކެއް އެހީތަކެއް ފޯރުކޮށްދެމުންނެވެ.
އިންސާނިއްޔަތުންކަން އިސްކޮށް، އެހީތެރިކަން ފޯރުކޮށްދިނުމުގައި ދިވެހިން އަންނަނީ އަބަދުވެސް ނަމޫނާ ދައްކަމުންނެވެ. މިގޮތުން އައި.އީ.ސީއާއެކު މީގެ ކުރިންވެސް މުޙައްމަދު ޢަލީ ވަނީ އެކި ޤައުމުތަކަށް ދަތުރުކޮށް ޞިއްޙީ އެހީތެރިކަން ފޯރުކޮށްދިނުމަށް ތަފާތު ކޭމްޕުތައް ހިންގާފައެވެ.
ތުރުކީވިލާތުގެ ދެކުނާއި ސޫރިޔާގެ އުތުރުގެ ސަރަޙައްދަށް އައި ބިންހެލުންތަކުގައި މަރުވި މީހުންގެ ޢަދަދު މިހާރު ވަނީ 19,000 އަށްވުރެ މައްޗަށް އަރާފައެވެ. މިއަދަދު އަދިވެސް އިތުރުވާނެކަމަށް ބެލެވޭކަމަށް މީހުން ސަލާމަތްކުރުމުގައި ހަރަކާތްތެރިވާ ފަރާތްތަކުން އަންނަނީ ބުނަމުންނެވެ.
ވެއްޓިފައިވާ ޢިމާރާތްތަކުގެ ކޮންކްރީޓްތަކުގެ ދަށުވެފައިވާ އެތަކެއް ހާސް މީހުންނަށް ހޯދައި، އެ މީހުން ސަލާމަތް ކުރުމަށް އޮފިޝަލުން ދަނީ ކެނޑިނޭޅި ރޭއާއި ދުވާލު މަސައްކަތް ކުރަމުންނެވެ. އެ މީހުންނަށް އެހީވުމަށް ޢާންމުންވެސް ދަނީ ހަރަކާތްތެރިވަމުންނެވެ. ޢާއިލާގެ މެންބަރެއް ނުވަތަ އަވަށްޓެރިއެއް ދިރިހުއްޓާ ފެންނާނެ ކަމުގެ ކުޑަނަމަވެސް އުންމީދުގައެވެ.
