މި ވޭތުވެދިޔަ ދިގު ތާރީޚުގައި ދުވަހަކުވެސް ނުހިނގާވަރަށް ފާއިތުވެދިޔަ 4 އަހަރު މާޅޮސްމަޑުލު އުތުރުބުރީ ރަސްމާދޫގައި ތަރައްޤީގެ މަޝްރޫޢުތައް ހިންގާފައިވާކަމަށް ރަސްމާދޫ ކައުންސިލުން ވިދާޅުވެއްޖެއެވެ.
ރަސްމާދޫ ކައުންސިލުން މިކަން ފާހަގަކުރީ ރަސްމާދޫ ކައުންސިލާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީއާއެކު ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު އިއްޔެ ބޭއްވި ބޭއްވެވި ބައްދަލުކުރެއްވުމުގައެވެ.
ރައީސުލްޖުމްހޫރިއްޔާގެ އޮފީހުގައި އިއްޔެ މެންދުރުފަހު އޮތް މި ބައްދަލުކުރެއްވުމުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވަނީ ރަސްމާދޫ ކައުންސިލާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީއާ ބައްދަލުކުރައްވައި، ރަށުގެ ތަރައްޤީގެ މުހިންމު ކަންކަމާއި ގުޅޭގޮތުން މަޝްވަރާ ކުރައްވާފައެވެ.
މި ބައްދަލުކުރެއްވުމުގައި ރ. ރަސްމާދޫ ކައުންސިލުން ވަނީ ވޭތުވެދިޔަ އަހަރުތަކުގައި ރަސްމާދޫގައި ނުހިންގާވަރަށް މި ފާއިތުވެދިޔަ ހަތަރު އަހަރުގައި އެ ރަށުގައި ތަރައްޤީގެ މަޝްރޫޢުތައް ހިންގާފައިވާކަން ފާހަގަކުރައްވާފައެވެ. އަދި، މި ސަރުކާރާމެދު އިތުރު އުންމީދުތަކެއް އޮތް ކަމަށް ކައުންސިލުން ފާހަގަކުރެއްވިއެވެ.
ރަސްމާދޫ ތަރައްޤީއަށް މިވަގުތު އެންމެ ބޭނުންވާ ކަންކަން ފާހަގަކުރައްވަމުން ކައުންސިލުން ވަނީ ރަސްމާދޫގައި ބޯހިޔާވަހިކަމުގެ ދަތިކަން ބޮޑުކަން ފާހަގަކުރައްވައި، ފްލެޓް އެޅުމަށް ބޭނުންވާކަން ހިއްސާކުރައްވާފައެވެ. މީގެ އިތުރުންވެސް ރަށުގެ މަގުތައް ނުހެދި އޮތުމުން ދިމާވާ ދަތިތަކާއި، އުންސިލް އިދާރާގެ ޖާގައިގެ ދަތިކަމާއި، ބަޖެޓުގެ ދަތިކަމުގެ އިތުރުން ޞިއްޙީ ދާއިރާގެ ފެންވަރު ރަނގަޅުކުރުމަށް ބޭނުންވާކަން ކައުންސިލުން ފާހަގަކުރެއްވިއެވެ. އަދި، ބަނދަރުގައި ރޭމްޕެއް އެޅުމާއި، މޫދަށް އެރޭ ސަރަޙައްދެއްގެ އިތުރުން، ކުޅިވަރު ކުޅުމަށް ބޭނުންކުރަން ފުޓްބޯޅަ ދަނޑު ތަރައްޤީކުރުމަށް ރައްޔިތުން ބޭނުންވާކަން ކައުންސިލުން ފާހަގަކުރެއްވިއެވެ.
މި ބައްދަލުކުރެއްވުމުގައި ރަސްމާދޫ އަންހެނުންގެ ތަރައްޤީއަށް މަސައްކަތްކުރާ ކޮމެޓީން ވަނީ ބަޖެޓުގެ ދަތިކަން ކުރިމަތިވާކަން ފާހަގަކުރައްވާފައެވެ.
ރައީސުލްޖުމްހޫރިއްޔާ ވަނީ ރަސްމާދޫ ކައުންސިލާއި އ.ތ.މ. ކޮމިޓީއިން ފާހަގަކުރެއްވި ކަންކަމުގެ ތެރެއިން ކުރިޔަށްގެންދެވޭނެ ކަންކަމަކީ ކޮބައިތޯ ބައްލަވާނެ ކަމަށާއި، އަދި މި ބައްދަލުކުރެއްވުމުގެ ބައިވެރިން ފާހަގަކުރެއްވި ކަންކަމުގައި ކަމާގުޅޭ ސަރުކާރުގެ އިދާރާތަކާ މަޝްވަރާކުރައްވައިގެން އެދެވޭ ގޮތަކަށް ކަންކަން ނިންމަވައިދެއްވާނެ ކަމުގައި ވިދާޅުވެފަވެ.
މީގެ އިތުރުން ވެސް ރަށްރަށުގެ ރައްޔިތުންނަށް އެންމެ ބޭނުންވާ އަސާސީ ކަންކަމާއި ތަރައްޤީގެ މުހިންމު ކަންކަން ސަރުކާރުން ކުރިޔަށް ގެންދަނީ ރަށްެރަށުގެ އިޤްތިޞާދު ކުރިއަރުވައި އާމްދަނީ އިތުރުކުރުމުގެ މަޤްޞަދުގައިކަން ރައީސުލްޖުމްހޫރިއްޔާ ވަނީ ފާހަގަކުރައްވާފައެވެ.
ރަސްމާދުއަކީ އާބާދީގައި 800 އަށްވުރެ ގިނަ މީހުން ދިރިއުޅެމުން އަންނަ ރަށެކެވެ. ރަސްމާދޫގައި މި ސަރުކާރުން ކުރިއަށްގެންގޮސްފައިވާ ތަރައްގީގެ މަޝްރޫޢުތަކުގެ ތެރޭގައި ރަށުގެ ބަނދަރުގެ މަސައްކަތާއި، އާ އިންޖީނުގޭގެ މަސައްކަތާއި ސްކޫލަށް ޖާގަ އިތުރުކުރުން، ފެނާއި ނަރުދަމާ ފަދަ ތަރައްޤީގެ މަޝްރޫޢުތައް ހިމެނެއެވެ.
ރައީސުލްޖުމްހޫރިއްޔާ އިބްރާހިމް މުހައްމަދު ސާލިހުގެ ސަރުކާރުގެ އެންމެ ފާހަގަކޮށްލެވޭ ސިޔާސަތެއްގެ ގޮތުގައި ލޯކަލް ކައުންސިލްތަކުން ފާހަގަކުރަނީ އެއްވެސް ތަފާތުކުރުމެއް ނެތި، އާބާދީއަށް ނުވަތަ އޮންނަ ސަރަހައްދަށް ނުބައްލަވާ، ސިޔާސީ ވިސްނުމާއި ދުރުން ތަރައްްޤީގެ މަޝްރޫޢުތައް ރާއްޖޭގެ ހުރިހާ ހިސާބެއްގައިވެސް ހިންގެވުމެވެ. މި ސިޔާސަތު ތަންފީޒުކުރަން ފެށުމާއެކު ރާއްޖޭގެ ގިނަ ސަރަހައްދުތަކުގެ ރައްޔިތުންގެ މީގެކުރިން އުއްމީދުނުކުރާވަރުގެ އުމްރާނީ އަދި އިޤްތިޞާދީ ކުރިއެރުންތައް ދަނީ ލިބެމުންނެވެ.
