އިސްލާމިކް މިނިސްޓްރީގެ ކުރީގެ ޕާރމަނަންޓް ސެކްރެޓަރީ މުޞްޢަބަށް ބަދަލު ދިނުމަށް އެންގި މައްސަލައިގައި ސިވިލް ސަރވިސް ކޮމިޝަނުން ކޯޓުގެ ބޭނުން ނަހަމަ ގޮތުގައި ހިފާފައިވާ ކަމަށް ހައިކޯޓުން މިއަދު ބުނެފިއެވެ.
ސިވިލް ސަރވިސް ކޮމިޝަނުން ބަލަމުންދިޔަ މައްސަލަތަކަކާ ގުޅިގެން ގިނަ ދުވަސްތަކެއްގައި ސަސްޕެންޝަނުގައި ބެހެއްޓުމަށްފަހު މުޞްޢަބު މަޤާމުން ވަކިކުރީ ސެޕްޓެމްބަރު 2019 ގައެވެ.
މުޞްޢަބު މަޤާމުން ވަކިކުރި މައްސަލައިގައި 1,187,666.60 ރ. ގެ ބަދަލެއް ދޭން މިދިޔަ އަހަރު ހައިކޯޓުން އެންގިއެވެ. ނަމަވެސް އެ ފައިސާ ނުދޭތީ ތިން ދުވަސްތެރޭގައި ފައިސާ ދައްކަން މިދިޔަ ނޮވެމްބަރުގައި ސިވިލް ކޯޓުން ޢަމުރެއް ނެރުނެވެ.
ސިވިލް ކޯޓުން ނެރުނު ޢަމުރު ސީއެސްސީގެ ފަރާތުން ހައިކޯޓުގައި އިސްތިއުނާފުކުރިއެވެ. އެ ގޮތުން މުޞްޢަބުގެ ފަރާތުން އެދުނީ ސީއެސްސީން މައްސަލަ އިސްތިއުނާފުކުރީ ޝަރީޢަތުގެ ނިޒާމު ނަހަމަ ގޮތުގައި ބޭނުން ހިފުމުގެ ގޮތުން ކަމަށް މަދަނީ އިޖުރާޢަތުގެ ޤާނޫނުގެ ދަށުން ކަނޑައަޅައިދިނުމަށެވެ.
ހައިކޯޓުން ކުރި ޙުކުމުގައި ބުނީ ކޯޓެއްގެ ޙުކުމަކަށް ޢަމަލުކުރުން ހުއްޓުވޭނީ މަތީ ކޯޓެއްގެ ޢަމުރު އޮވެގެން ކަމަށެވެ. ނަމަވެސް ޙުކުމާ އެއްގޮތަށް މުޞްޢަބަށް ދޭންޖެހޭ ފައިސާނުދީ ސީއެސްސީން ތިބީ އެފަދަ ޢަމުރެއްނެތި ކަމަށް ޙުކުމުގައިވެއެވެ. އަދި ސިވިލް ކޯޓުން އެ ފައިސާ ތިން ދުވަހުގެތެރޭގައި ދިނުމަށް ސީއެސްސީގެ މައްޗަށް ޢަމުރު ނެރުމުން، ޤާނޫނީ އެއްވެސް ބަހުސެއްނެތި އެ ކޮމިޝަނުން ސިވިލް ކޯޓުގެ ޢަމުރު އިސްތިއުނާފުކުރީ ހެޔޮ ނިޔަތެއްގައި ކަމަށް ނުބެލެވޭ ކަމަށް ވެސް ޙުކުމުގައިވެއެވެ.
”މި މައްސަލައިގައި ސިވިލް ސަރވިސް ކޮމިޝަނުން އަމަލުކޮށްފައިވާ ގޮތަށް ބަލާއިރު، އެ ފަރާތުން ޝަރީޢަތުގެ އިޖުރާޢަތުގެ ބޭނުން ނަހަމަ ގޮތުގައި ހިފާފައިވާކަމަށް ބުރަވެވޭތީ އިސްތިއުނާފުކުރި ފަރާތުގެ އެ އަމަލުގެ ސަބަބުން އިސްތިއުނާފު ރައްދުވި ފަރާތަށް ލިބުނު ގެއްލުމުގެ ބަދަލުގެ ގޮތުގައި މަދަނީ އިޖުރާޢަތުގެ ޤާނޫނުގެ 421 ވަނަ މާއްދާގެ (ބ) ގެ 4 ވަނަ ނަންބަރުގެ ދަށުން ޤާނޫނީ ވަކީލުގެ ފީ ނަގައިިދިނުމަށް އެދިފައިވާ އެދުމަށް ބަލާާއިރު ޤާނޫނީ ވަކީލުގެ ފީގެ ގޮތުގައި ޚަރަދުކުރި ކަމަށް ބުނާ 30000 ރ. އެ ގޮތުގެ މަތިން ޚަރަދުކޮށްފައިވާކަން ޝަރީޢަތައް ސާބިތުވާން ނެތަތީ މި މައްސަލައިގެ ތެރެއިން އެ ޚަރަދު ނަގައިދެވެން ނެތް ކަމަށް ކަނޑައަޅައި….“ ޙުކުމުގައިވެއެވެ.
ނަމަވެސް ޝަރީޢަތުގެ ޚަރަދު ހޯދުމަށް އެދި މުޞްޢަބު ސިވިލް ކޯޓަށް ހުށަހަޅައިފިނަމަ, މަދަނީ އިޖުރާޢަތުގެ ޤާނޫނުގެ 25 ވަނަ ބާބުގައި ބަޔާންކުރާ ޝަރީޢަތުގެ ޚަރަދު ނަގައިދިނުމާބެހޭ އުސޫލުގެ ދަށުން ސީއެސްސީގެ ކިބައިން ޝަރީޢަތުގެ ޚަރަދު ހޯދުމުގެ ޙައްޤު މުޞްޢަބަށް ލިބިގެންވާ ކަމަށް ވަނީ ކަނޑައަޅާފައެވެ.
މުޞްޢަބަށް 1.1 މިލިއަން ރުފިޔާގެ ބަދަލެއް ދިނުމަށް ހައިކޯޓުން ކުރި ޙުކުމުގެ މައްސަލަ މިހާރު އޮތީ ސްޕްރީމް ކޯޓުގައެވެ. އެ މައްސަލަ އެ ކޯޓުގައި އޮތުމުން ބަދަލުގެ ފައިސާ ދޫކުރުން މަޑުޖައްސައިލަން އެ ކޯޓުން ވަނީ ޢަމުރެއް ނެރެފައެވެ.
