ސިޓީ ކައުންސިލުގައި ތަކުރާރުކޮށް އެދުމުން ވެސް އައު ޓްރާންސްފޯމަރުތައް ބަހައްޓަން ބިމެއް ނުދިން: ސްޓެލްކޯ

މާލޭގެ ތިން ސަރަހައްދަކުން ކަރަންޓު ކެނޑުމުގެ ފުރުސަތު އެބައޮތް ކަމަށާއި، އެ ގޮތުން އައު ޓްރާންސްފޯމަރު ބަހައްޓަން ބޭނުންވާ ބިން ހަމަޖައްސައިދިނުމަށް މާލޭ ސިޓީ ކައުންސިލަށް އެދިފައިވީ ނަމަވެސް ޖަވާބެއްދީފައިނުވާ ކަމަށް ސްޓެލްކޯއިން ބުނެފިއެވެ

ސްޓެލްކޯއިން މިއަދު ނެރުނު ބަޔާނެއްގައި ބުނީ މާލޭގެ ތިން ސަރަހައްދެއްގައި ބަހައްޓާފައިވާ ތިން ސަބްސްޓޭޝަނެއްގައި އިތުރު ޓްރާންސްފޯމަރުތަކެއް ބެހެއްޓުމަށް ބޭނުންވާ ބިން ހަމަޖައްސައިދިނުމަށް ސިޓީ ކައުންސިލްގައި އެކި ފަހަރު މަތިން އެދިފައިވާ ކަމަށެވެ.

އެ ތިން ސަބްސްޓޭޝަނަކީ:

ގާކޮށި, ސިނަމާލޭ 2 ގޯތި ތެރޭގައި ހަދާފައިވާ ސަބްސްޓޭޝަން.

މަޖީދިއްޔާ ސްކޫލު ކުރިމައްޗަށްވާ ގޮތައް ހުރި ޕާކިން ޒޯނާއި ދިމާގައި ހަދާފައިވާ ސަބްސްޓޭޝަން.

ވިޔަފާރިވެރިންގެ މިސްކިތާއި އިންވެގެން އޮތް ޕާކިން ޒޯނުގައި ހަދާފައިވާ ސަބްސްޓޭޝަން.

އޭގެތެރެއިން ސިނަމާލޭ 2 ގޯތި ތެރޭގައި ބަހައްޓާފައިވާ 630 ކޭވީއޭގެ ޓްރާންސްފޯމަރަކީ މިހާރު ވެސް އޯވާލޯޑްވުމުގެ ސަބަބުން ކައިރީގައި ހުރި އެހެން ޓްރާންސްފޯމަރުތަކަށް އޭގެ ބައެއް ލޯޑް ޓްރާންސްފާރ ކުރަންޖެހިފައިވާ ޓްރާންސްފޯމަރެއް ކަމަށާއި، މިހާރު އެ ލޯޑް ޓްރާންސްފާރ ކުރި ޓްރާންސްފޯމަރުތަށް ވަނީ އޯވާލޯޑް ވުމާއި ގާތަށްގޮސްފައި ކަމަށް ސްޓެލްކޯއިން ބުންޏެވެ.

”މި ސަބްސްޓޭޝަނުގައި އިތުރު ޓްރާންސްފޯމަރެއް ބެހެއްޓުމަށްޓަކައި އެ ސަބްސްޓޭޝަނަށް ބޭނުންވާ ބިން ހޯދުމަށް 2 މެއި 2021 ގައި ވަނީ ސިޓީ ކައުންސިލްގައި ރަސްމީކޮށް އެދިފައި. އެ ސިޓީއަށް ޖަވާބެއް ނުލިބުމާއި ގުޅިގެން އިތުރު ސިޓީތަކެއް ވެސް ފޮނުވި އެ ސިޓީތަކަށް ވެސް ޖަވާބު ލިބިފައެއް ނުވޭ.“

އަދި ވިޔަފާރިވެރިންގެ މިސްކިތާއި އިންވެގެން ހުރި ޕާކިންޒޯން ހުރި ބިމުގައި ބަހައްޓާފައިވާ 630 ކޭވީއޭގެ ޓްރާންސްފޯމަރަކީ 81 އިންސައްތަ ޔުޓިލައިޒް ކުރެވިފައިވާ ޓްރާންސްފޯމަރަކަށްވުމާއެކު އިތުރު ޓްރާންސްފޯމަރެއް ބެހެއްޓުމަށްޓަކައި އެ ސަބްސްޓޭޝަން ބޮޑު ކުރުމަށް ބޭނުންވާ ބިން އެތަނުން ހަމަޖެއްސައިދިނުން އެދި ސިޓީ ފޮނުވީ 13 ސެޕްޓެމްބަރ 2021 ގައި ކަމަށާއި ނަމަވެސް އެ ސިޓީއަށް ވެސް ޖަވާބެއް ލިބިފައެއް ނުވާކަމަށް ސްޓެލްކޯއިން ބުންޏެވެ.

މީގެއިތުރުން މަޖީދިއްޔާ ސްކޫލް ކުރިމަތީ ޕާކިން ޒޯން ކައިރީގައި ބަހައްޓާފައިވާ 630 ކޭވީއޭގެ ޓްރާންސްފޯމަރުގެ 73 އިންސައްތަ ޔުޓިލައިޒް ކުރެވިފައިވާއިރު އެ ސަބްސްޓޭޝަނުގައި އިތުރު ޓްރާންސްފޯމަރެއް ބެހެއްޓުމަށްޓަކައި އެ ސަބްސްޓޭޝަނާއި އިން ވެގެން އޮތް ހުސް ބިންކޮޅެއް ހަމަޖައްސައިދިނުމަށް 23 މެއި 2021 ގައި ރަސްމީކޮށް ހުށަހަޅާފައިވާ ކަމަށާއި, އަދި އެ ސިޓީގެ ޖަވާބު ހޯދުމަށް އޭގެ ފަހުން ފޮނުވާފައިވާ ސިޓީތަކަށް މިއަދާ ހަމަޔަށް އެއްވެސް ޖަވާބެއް ލިބިފައެއްނުވާ ކަމަށެވެ.

ސްޓެލްކޯއިން ބުނީ މި ސަބްސްޓޭޝަންތަކުގެ ހާލަތު ބަޔާންކޮށް ސިޓީކައުންސިލަށް ފޮނުވާފައިވާ ސިޓީތަކުގައި އެ ޓްރާންސްފޯމަރުތައް އަވަސް ގޮތެއްގައި ނުބެހެއްޓިއްޖެނަމަ އެ ސަރަހައްދުތަކުގައި ދިރިއުޅޭ ރައްޔިތުންނަށް ކުރިއަށް އޮތް ދުވަސްތަކުގައި ކަރަންޓު ކެނޑުންފަދަ ދަތިތަކާއި ކުރިމަތިލާން ޖެހުމަކީ އެކަށީގެންވާ ކަމެއްކަން ފާހަގަކޮށްފައިވާނެ ކަމަށެވެ. އަދި މި ޓްރާންސްފޯމަރުތަށް ބެހެއްޓުމަށްޓަކައި ބޭނުންވާ ބިންތަކުގެ ކުރެހުންތައްވެސް ހިއްސާކޮށްފައިވާނެ ކަމަށް ބުންޏެވެ.

ކުރިއަށް މިއޮތް ދުވަސްތަކަކީ ހޫނު މޫސުމުގެ ދުވަސްތަށް ކަމަށްވާތީއާއި، ރޯދަމަހު މި ޓްރާންސްފޯމަރުތައް އޯވާރލޯޑްވެ ކަރަންޓު ކެނޑުންފަދަ ކަންކަން ދިމާވެދާނެތީ މި ބިންތައް ހަމަޖެހި މި ޓްރާންސްފޯމަރުތައް ވީއެންމެ އަވަހަކަށް ބެހެއްޓުމަށް ބޭނުންވާ ކަމަށާއި, މިކަމަށްޓަކައި ބޭނުންވާ ޓްރާންސްފޯމަރުތަކާއި އެހެނިހެން އާލާތްތައް ކުންފުނީގައި މިހާރު ހުރިކަމަށް ވެސް ސްޓެލްކޯއިން ބުންޏެވެ.

ސްޓެލްކޯއިން ބުނީ އެ ކުންފުނިން ތަކުރާރުކޮށް ފޮނުވާފައިވާ ސިޓީތަކަށް އެއްވެސް ޖަވާބެއް ލިބިފައިނުވާއިރު ސިޓީ ކައުންސިލްގެ އިސްނެންގުވުމުގެ މަތިން މާލޭގެ 9 ނަންބަރު ކޮށި (ހ. ދޫވެހި ހުންނަ) ސަރަހައްދުގައި އިމާރާތްކުރަމުންދާ ފަރާތްތަކުން އެ ފަރާތްތަކަށް ކަރަންޓު ކަނެކްޝަން ހެދުމަށް ބޭނުންވާ ޓްރާންސްފޯމަރެއް ބަހައްޓައިދިނުމަށް އެދެމުންދާ ކަމަށް ބުނެ އާޓިފިޝަލް ބީޗްގައިވާ ވޮލީކޯޓާއި އިންވެގެން އޮތް ސަރަހައްދުން ކަނޑައަޅުއްވައި 24 އޮކްޓޯބަރ 2022 ގައި ސިޓީ ކައުންސިލްގެ ސިޓީއެއް ކުންފުންޏަށް ލިބިފައިވާ ކަމަށެވެ. އެހެންނަމަވެސް އެ ސަރަހައްދުން ކަރަންޓަށް އެދި ހުށަހަޅާ އެއްވެސް ފަރާތަކަށް ކަރަންޓު އެ ކުންފުނިން ނުދެވޭނެ އެއްވެސް ސަބަބެއް ނެތްކަމަށް ސްޓެލްކޯއިން ބުންޏެވެ.

”މި ކުންފުނީގެ ސަބްސްޓޭޝަންތަކަށް ބިން އިތުރު ކުރުމަށް އެދި ހުށަހަޅާފައިވާ ބިންތައް މިކުންފުންޏަށް ހަމަޖައްސައިދިން ނަމަވެސް އެކަމުގެ ސަބަބުން އެއްވެސް ބަޔަކަށް ނުވަތަ ބައެއްގެ ބިމަކަށް ވެސް ގެއްލުމެއް ވެސް އަދި އަސަރެއްވެސް ނުކުރާނެކަން ފާހަގަކޮށްލެވޭ.“

އެހެންކަމުން އެ ކުންފުނީގެ އެދުމަކީ ރައްޔިތުންނަށް އެ ކުންފުނިން ދެމުންގެންދާ ޚިދުމަތް އޭގެ އެންމެ ފުރިހަމަ ގޮތުގައި އަދި މެދު ނުކެނޑި ފޯރުވައިދިނުމަށް ކަމާބެހޭ އެންމެހާ ފަރާތްތަކުން ވެސް އެއްބާރުލުން ދެއްވައި، ޒިންމާދާރުކަމާއެކު އެ ކުންފުންޏާއި ގުޅިގެން އެކީގައި މަސައްކަތް ކުރުން ކަމަށް ސްޓެލްކޯއިން ވަނީ ބުނެފައެވެ.