މާލެ ސަރަޙައްދުގެ ރައްޔިތުން ދަތުރު ދިޔުމަށް ތަރައްޤީކުރާ ކުޑަގިރި ޕިކްނިކް އައިލެންޑްގެ މަޢުލޫމާތު އެނގޭނެ މޯބައިލް އެޕްލިކޭޝަނެއް ތަޢާރްފްކޮށްފިއެވެ. އެޕް ސްޓޯރުންނާއި، ޕްލޭ ސްޓޯރުން މި އެޕްލިކޭޝަން މިހާރު ޑައުންލޯޑްކުރެވޭނެއެވެ.
މާލެ ސަރަޙައްދުގެ ރައްޔިތުން ދަތުރު ދިޔުމަށް ތަރައްޤީކުރި ކުޑަގިރި މިމަހުގެ 11 ވަނަ ދުވަހު ރަސްމީކޮށް ހުޅުވަން ސަރުކާރުން ވަނީ ނިންމާފައެވެ.
ކުޑަގިރި ޕިކްނިކް އައިލަންޑް ހުޅުވުމުގެ އެންމެ ފަހުގެ ތައްޔާރީތައް ކުރަމުންއަންނަ އިރު އެޗްޑީސީން މިވަނީ ކުޑަގިރިއަށް ޚާއްސަ އެޕްލިކޭޝަނެއް ތަޢާރަފްކޮށްފައެވެ. އެޗްޑީސީން ވިދާޅުވީ ކުޑަގިރި އެޕްލިކޭޝަން ޑައުންލޯޑް ކޮށްގެން، އެ ރަށާ ގުޅޭ އެންމެ ފަހުގެ މައުލޫމާތާއި ޚިދުމަތްތައް ބަލާލެވޭނެކަމަށެވެ.
މި އެޕްލިކޭޝަނަކީ ކުޑަގިރީގެ ޚިދުމަތްތައް ވީހާ ވެސް ލުއިފަސޭހަ ގޮތަކަށް ޢާންމުނަށް ދިނުމަށް ތައްޔާރުކޮށްފައިވާ އެޕްލިކޭޝަނެއް ކަމަށްވެސް އެ ކުންފުނިން ވިދާޅުވިއެވެ. މި އެޕްލިކޭޝަން މެދުވެރިކޮށް ބުކިންއަށް އަދި ހުޅުވާލާފައި ނުވިޔަސް، އެޕްލިކޭޝަންގައި ރަޖިސްޓާކުރުމުން ކުޑަގިރިއާ ބެހޭ ވަރަށް ގިނަ މައުލޫމާތު ލިބޭނެ ކަމަށް އެޗްޑީސީން ވިދާޅުވެއެވެ.
މިގޮތުން އެތަނުން ލިބޭނެ ޚިދުމަތްތަކާއި ބުކް ކުރެވޭނެ އަގުތަކާއި ޤަވައިދުތަކާއި އުޞޫލްތައް ފެންނަން ހުންނާނެއެވެ. އެޗްޑީސީން ވިދާޅުވީ އެޕްލިކޭޝަނުގެ ޒަރިއްޔާއިން ބުކިންނަށް ހުޅުވާލުމުން ނޮޓިފިކޭޝަން އަންނާނެކަމަށާއި، ވަރައަވަހަށް ބުކިން ހެއްދުމަށްވެސް ހުޅުވާލާނެކަމަށެވެ.
މި މަހުގެ 11 ގައި ކުޑަގިރި ހުޅުވަން ހާއްސަ ރަސްމިއްޔާތެއް ބޭއްވުމަށް ވަނީ ހަމަޖެހިފަ އެވެ. އެ ރަސްމިއްޔާތު ޝަރަފުވެރިކޮށް ދެއްވާނީ ރައީސް އިބްރާހީމް މުހައްމަދު ސޯލިހު ކަމަށް ވިދާޅުވި އެވެ.
މާލެ ސަރަހައްދުގެ ރައްޔިތުން ދަތުރުދާން ހާއްސަކޮށްގެން ހިއްކައިގެން ތަރައްގީކުރި ކުޑަގިރި ހުޅުވާނެ އިރަކަށް އެތައް ބަޔަކު އަންނަނީ އިންތިޒާރުކުރަމުންނެވެ. އެތަން ހުޅުވަން އެންމެ ފުރަތަމަ ޕްލޭންކުރީ މިދިޔަ އަހަރުގެ މިނިވަން ދުވަހާ ދިމާކޮށް ޖުލައި 26 ގަ އެވެ. ނަމަވެސް މަސައްކަތްތައް ނިންމަން ވަގުތު ބޭނުންވާތީ ހުޅުވަން ލަސްކުރީ އެވެ.
މާލޭން ލޯންޗެއްގައި ފުރައިގެން 15 ވަރަކަށް މިނިޓުން ދެވޭ ހިސާބުގައި އޮތް ކުޑަގިރި އަކީ ދަތުރުދާ މީހުންނަށް ބޭނުންވާ މައިގަނޑު ހުރިހާ ވަސީލަތްތަކާ އެކީ ކުޑަގިރު އަންނަ މަހު ރަސްމީކޮށް ހުޅުވަން ތައްޔާރީތައްވެފައިވާ އިރު، އަށް ހެކްޓަރުގެ ރަށުގައި 1.5 ހެކްޓަރުގެ ފިނޮޅެއް ވެސް ހަދާފައިވެ އެވެ. ރަށް ބަލަހައްޓާ އޮފީހަކާއި މިސްކިތާއި ފާޚާނާބަރިއަކާއި، ކެފޭ އާއި ފިހާރަ އަދި ހަޓުތަކާއި ކުޅިވަރު ކުޅެވޭނެ ގިނަ ވަސީލަތްތައް މި ރަށުން ލިބެން ހުންނާނެ އެވެ.
ކުޑަގިރި އަކީ ސަރުކާރުގެ ފަސް ކުންފުންޏެއް ގުޅިގެން ތަރައްގީކުރި ރަށެކެވެ. އެއީ އެމްޓީސީ އާއި އެޗްޑީސީ އާއި އެމްޑަބްލިއެސްސީ އާއި ފެނަކަގެ އިތުރުން ސްޓެލްކޯ އެވެ.
