ހުޅުމާލޭ ދެވަނަ ފިޔަވަހީގައި ޢިމާރަތްކޮށްފައިވާ ވިނަރެސް ފުލެޓުތައް ލިބުނު މީހުންގެ ދާއިމީ ލިސްޓު ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީން) ޢާންމުކޮށްފިއެވެ.
ދެވަނަ ފިޔަވަހީގައި ޗައިނާގެ މެޝިނަރީ އިންޖީނިއަރިން ކޯޕަރޭޝަނާއި ހަވާލުކޮށްގެން ޢިމާރަތް ކުރަން ފެށި ފުލެޓުތައް ނިންމައި އެޗްޑީސީއާ ހަވާލުކުރީ 2022 ޖޫން 20 ގައެވެ. ވިނަރެސް މަޝްރޫޢުގެ ދަށުން ހެދީ 13-11 ބުރީގެ 10 ޓަވަރެވެ. އެއީ ޖުމްލަ 1344 ފުލެޓެވެ. އެއީ ތިން ކޮޓަރީގެ ތަންތަނެވެ. އެ ތަންތަނުގެ އަގު އުޅެނީ 2.5 މިލިއަން ރުފިޔާއާއި 03 މިލިއަން ރުފިޔާއާ ދެމެދުއެވެ.
ފުލެޓުތައް ގަތުމަށް އެޗްޑީސީން ހުޅުވައިލީ 2022 ޖުލައި 18 ގައި.
ފުލެޓް ލިބުނު މީހުންގެ ވަގުތީ ލިސްޓު ޢާންމުކުރީ 2022 ނޮވެމްބަރު 27 ގައި.
ވަގުތީ ލިސްޓުން ދައްކާ ގޮތުން ފުލެޓަށް އެދި 1413 މީހުން ފޯމު ހުށަހެޅި, ޝަރުތު ހަމަވީ އޭގެތެރެއިން 723 މީހުން.
މި މަޝްރޫޢުގެ ދަށުން 100 ފުލެޓު ކަނޑައަޅާފައިވަނީ މާލޭގައި ރަޖިސްޓްރީވިތާ 15 އަހަރު ނުވާ މީހުންނަށް އަދި މާލޭގައި ދިރިއުޅޭތާ 15އަހަރަށްވުރެ ގިނަ ދުވަސްވީ މީހުންނަށް.
އެޗްޑީސީން މިއަދު ވަނީ ދާއިމީ ލިސްޓު ޢާންމުކޮށްފައެވެ. އެ ލިސްޓު ނެރުނީ ވަގުތީ ލިސްޓަށް ހުށަހަޅާފައިވާ ޝަކުވާތަކައް ބެލުމަށްފަހު މިނިސްޓްރީ އޮފް ނޭޝަނަލް ޕްލޭނިންގް ހައުސިންގ އެންޑް އިންފްރާސްޓްރަކްޗަރުން މުރާޖަޢާ ކުރުމަށްފަހު ކަމަށް އެ ކޯޕަރޭޝަނުން ބުންޏެވެ.
”ޝާއިއުކޮށްފައިވާ ލިސްޓްގައި ސީލައިފް, ހިޔާ, އަދި ގުޅީފަޅު ކެޓެގަރީގެ އެއްވެސް ފަރާތެއް ނުހިމެނޭނެކަން މަޢުލޫމާތަށްޓަކައި ދަންނަވަން.“
އެ ލިސްޓުގައިވާ ގޮތުން 1094 މީހަކު ޝަރުތު ހަމަވެއެވެ. އޭގެތެރޭގައިމާލޭގައި ރަޖިސްޓްރީވިތާ 15 އަހަރުނުވާ 267 މީހަކު ޝަރުތު ހަމަވެއެވެ.
”އެ ލިސްޓުގައި ހިމެނޭ ފަރާތްތަކުގެ ތެރެއިން މައި-އެޕްލިކަންޓް އަދި ކޯ-އެޕްލިކަންޓް ގޮތުގައި އެއް ފޯމަށްވުރެ ގިނަ ފޯމުގައި ނަން ހިމަނާފައިވާ ފަރާތްތަކަށް ކުރިއަށް ދެވެނީ އެންމެ ފޯމަކާއި އެކު. ދެމަފިރިން ވަކިން ފޯމު ހުށަހަޅާފައިވީ ނަމަވެސް އެފަދަ ފަރާތްތަކަށް ދެވޭނީ އެންމެ ފްލެޓެއް ގަތުމުގެ ފުރުސަތު އެހެންކަމުން މި ފަރާތްތަކަށް މިކަން ހައްލުކުރުމުގެ ފުރުސަތު ހުޅުވާލާނަން.“
އެޗްޑީސީން ބުނީ ވިނަރެސް މަޝްރޫޢުއިން އެޕާޓްމަންޓް ގަތުމުގައި ދެން ކުރިއަށް އޮތް މަރުހަލާއަކީ ޢާންމު އުސޫލުގެ ދަށުން އަލަށް ޝަރުތުހަމަވެފައިވާ ފަރާތްތަކުގެ މާލީ ގާބިލިއްޔައްތުކަން ބެލުމަށް ބޭނުންވާ ލިޔެކިޔުންތައް ހަމަކުރުމުގެ މަރުހަލާ ކަމަށެވެ. އަދި މި މަރުހަލާ ފުރިހަމަވުމުން ބުކިންގ ފީ ނެގުމާއި ވިނަރެސް ފުލެޓު އިޚުތިޔާރު ކުރުމުގެ ކަންތައް ކުރިއަށް ގެންދާނެ ކަމަށެވެ.
”އެޕާޓްމެންޓު އިޚްތިޔާރު ކުރުމަށްފަހު ލީސް-ޓު-އޯން އަދި ފުލް ޕޭމަންޓަ މޮޑެލް ހިޔާރުކޮށްފައިވާ ފަރާތްތަކަށް މިކޯޕަރޭޝަނުން ބެލުމަށް ކަނޑައަޅާފައިވާ އުސޫލުތަކާއި އެއްގޮތަށް މާލީ ގާބިލިޔަތުކަން ކަށަވަރު ކުރުމަށް ތާރޑްޕާޓީއެއް މެދުވެރިކޮށް އިވެލުއޭޝަން ކުރިއަށް ގެންދެވޭނެ. އަދި މި ޕޭމަންޓަ މޮޑެލްތައް ހިޔާރުކުރެއްވި ފަރާތަކަށް ވިނަރެސް އެޕާޓްމެންޓު ކަށަވަރުވާނީ ހުށަހަޅާފައިވާ ލިޔެކިޔުންތައް ބެލުމަށްފަހު މި ކޯޕަރޭޝަނުން މާލީ ގާބިލިއްޔަތުކަން ބެލުމަށް ކަނޑައަޅާފައިވާ އުސޫލުތަކާއި އެއްގޮތަށް މާލީ ޤާބިލުކަން ފުރިހަމަވާކަން ތާރޑްޕާޓީ އިވެލުއޭޓަރުން ނިންމުމުން.“ އެޗްޑީސީން ބުންޏެވެ.
މީގެއިތުރުން އެންޑް ޔޫސަރ މޮޑެލް ޚިޔާރު ކޮށްފައިވާ ފަރާތްތައް ބުކިންގ ފީ ދައްކައި ފުލެޓު އިޚްތިޔާރުކުރުމުގެ މަރުހަލާ ނިމުމުން މާލީ އިދާރާތަކަށް ހުށަހަޅަންޖެހޭ ލިޔެކިޔުންތައް އެ ފަރާތްތަކާއި ހިއްސާ ކުރާނެ ކަމަށާއި, މި ޕޭމަންޓަ މޮޑެލްގެ ދަށުން ވިނަރެސް ފުލެޓު ކަށަވަރުވާނީ މާލީ އިދާރާއަކުން ލޯނު ހަމަޖެހުނުކަމުގެ ލިޔުން އެ ކޯޕަރޭޝަނަށް ހުށަހެޅުމުން ކަމަށް ވެސް އެޗްޑީސީން ބުންޏެވެ.
”މިކަމާ ގުޅޭގޮތުން ލިސްޓުގައި ލިމެނޭ ފަރާތްތަކަށް ފޯނުގެ ޒަރީއާއިން 3353535 ނަންބަރުން މި ކޯޕަރޭޝަނުން ގުޅާނެ.“
ނަމަވެސް އެ ނަންބަރުގެ އިތުރުން އެ ކޯޕަރޭޝަނުން އެއްވެސް މޯބައިލް ފޯނު ނަންބަރަކުން ވިނަރެސް ހައުސިންގް މަޝްރޫޢުއާއި ގުޅޭގޮތުން އެއްވެސް ފަރާތަކަށް ނުގުޅާނެ ކަމަށާއި, އެސްއެމްއެސް ނުވަތަ އެއްވެސް ލިންކެން ނުފޮނުވާނެ ކަމަށް އެޗްޑީސީން ބުންޏެވެ.
އެޗްޑީސީން ވަނީ އިތުރު މަޢުލޫމާތު ސާފުކުރެއްވުމަށް އެ ކޯޕަރޭޝނުގެ ހޮޓްލައިން ނަންބަރ 1516 އަށް ގުޅުއްވުމަށް އެދިފައެވެ.
