އިދިކޮޅު ޕީޕީއެމް/ޕީއެންސީގެ ރިޔާސީ ކެންޑިޑޭޓަކީ ރައީސް ޔާމީން ޢަބްދުލްޤައްޔޫމު ކަމަށާއި ކޯލިޝަނުގެ ވަފާތެރި ލީޑާޝިޕުން އެ މަނިކުފާނަށް ޚިޔާނަތްތެރިއެއް ނުވާނެ ކަމުގައި ކުރީގެ އިސްލާމިކް މިނިސްޓަރު އަދި ޕީޕީއެމްގެ އެޑްވައިޒަރު ޑރ.މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
ދަރުބާރުގޭގައި މިއަދު ފެށި އިދިކޮޅު ޕީޕީއެމް/ޕީއެންސީގެ ”ހޯޕް ކޮންފަރެންސް“ ފެށުމުގެ ރަސްމިއްޔާތުގައި ދެއްކެވި ވާހަކަފުޅުގައި ޑރ.ޝަހީމް ވިދާޅުވީ މިއަދު ޤައުމު ކުރިއަށްދާ މިސްރާާބާމެދު ދިވެހި ކޮންމެ ރައްޔިތަކު ވެސް ތަޢައްސުބުން އެއްކިބާވެ ވިސްނައިލަންޖެހޭ ކަމަށެވެ. އަދި ރައީސް ޔާމީން ކޮށްދެއްވި ވަރުގަދަ ވެރިކަމަށް މިއަދު ބޭނުންވެފައި މިވަނީ ކިހާވަރަކަށްތޯ ވިސްނައިލަންޖެހޭ ކަމަށް ވެސް އެމަނިކުފާނު ވިދާޅުވިއެވެ.
އެ ސުވާލުގެ ޖަވާބު އަމިއްލަފުޅަށް ދެއްވަމުން ވިދާޅުވީ ރައީސް ޔާމީންގެ ޒަޢާމަތަށް މިއަދު ބޭނުންވެފައި ވަނީ މީގެ ކުރިން ބޭނުންނުވާ ދަރަޖައަކަށް ކަމަށެވެ.
ދިވެހި ޤައުމު އުސްމިނަކަށް ގެންދިއުމަށްޓަކައި ރައީސް ޔާމީން ޢަބްދުލްޤަައްޔޫމް ވަރަށް ވަރުގަދަ މަސައްކަތްތަކެއް ކުރެއްވި.“ ދިވެހި ރައްޔިތުން އެކަމަށް ހެކިވާނެކަން ފާހަގަކުރައްވައި ޑރ.ޝަހީމް ވިދާޅުވިއެވެ.
”އެހެންކަމުން އަޅުގަނޑު ދަންނަވާނީ ޕީޕީއެމް ޕީއެންސީގެ ރިޔާސީ ކެންޑިޑޭޓަކީ ރައީސް ޔާމީން ޢަބްދުލްޤައްޔޫމޭ. ޕީޕީއެމް ޕީއެންސީން އެމަނިކުފާނަށް ވަފާތެރި ލީޑާޝިޕުން އެމަނިކުފާނަށް ޚިޔާނަތްތެރިއެއް ނުވާނޭ. ޕީޕީއެމް ޕީއެންސީގެ އެންމެހައި ލޮބުވެތި ރައްޔިތުން މަސައްކަތް ކުރަމުން މި ގެންދަނީ ރައީސް ޔާމީން ޢަބްދުލްޤައްޔޫމުގެ ޒަޢާމަތު އަލުން އަނބުރާ މި ޤައުމަށް ގެނައުމަށޭ.“ ވަރަށް އިތުބާރާއެކު އެޑްވައިޒަރު ވިދާޅުވިއެވެ.
ޑރ.ޝަހީމް ވިދާޅުވީ ރައީސް ޔާމީންގެ ޒަޢާމަތުގެ ބަހާތަކަކީ ދިވެހިވަންތަކަމާއި ދިވެހި ދައުލަތުގެ މިނިވންކަމާއި އިސްތިގުލާލާއި ރައްކާތެރިކޮށް ދެމެހެއްޓުމާއެކުގަ އިގުތިސާދީ މިނިވަންކަން މި ޤައުމުގައި ގާއިމުކުރުމާއި ދިވެހިވަންތަކަމުގެ ސަގާފަތު މި ޤައުމުގައި ދެމެހެއްޓުން ކަމަށެވެ. އަދި އެމަނިކުފާނު ވެރިކަން ފިކުރީ ހަނގުރާމައިގެ އޮއިވަރުތަކުން މި ޤައުމު ސަލާމަތްކޮށް އިސްލާމްދީނުގެ އަސާސްތައް ނެގެހެއްޓެވުމުގެ މައްޗަށް ކަމަށް ވެސް ޑރ.ޝަހީމް ވިދާޅުވިއެވެ.
”އަޅުގަނޑުމެންނަކީ އެމަނިކުފާނުގެ އަރިހުގައި މަސައްކަތް ކުރި މީހުން ވީމާ އެކަމަށް ވަރަށް ސާބިތުކަމާއެކު ހެކިވަން.“
”ރައީސް ޔާމީންގެ ވެރިކަމުން އެންމެ ފާހަގަކޮށްލެވޭ އެއް ކަމަކީ އެމަނިކުފާނަކީ ޒުވާނުންނަށް ފުރުސަތު ދެއްވި ބޭފުޅެއް. އެމަނިކުފާނަކީ ވަކި މީހެއްގެ ޢާއިލާއަކަށް ވަކި މީހެއްގެ އަނބިކަނބަލަކަށް ވަކި މީހެއްގެ ފިރިކަލަކަށް ބަލައިގެން ވަޒީފާ ދެއްވި ބޭފުޅެއް ނޫން. ކިތަންމެ ނިކަމެތި ޢާއިލާއަކަށް ނިސްބަތްވި ނަމަވެސް އެ ޢާއިލާއަކަށް ނިސްބަތްވާ އެ ބޭފުޅެއްގެ ނުވަތަ އެ ޒުވާނެއްގެ ތަޢުލީމް، ގާބިލް ބޭފުޅެއްނަމަ ޤައުމު ހިންގުމުގެ ކަންކަން އެ ބޭފުޅަކަށް ނުވަތަ އެ ކުއްޖަކަށް ހަވާލުކުރުމަށް ފަސްޖެހިވަޑައިގަތް ބޭފުޅެއް ނޫން.“ މި ވަގުތު ޖަލުގައި 11 އަހަރުގެ ޙުކުމެއް ތަންފީޒު ކުރައްވަމުން ގެންދަވާ ރައީސް ޔާމީނާ ގުޅޭ ގޮތުން ޑރ.ޝަހީމް ވިދާޅުވިއެވެ.
އެހެންކަމުން ރައީސް ޔާމީންގެ އެ ދައުރު އަލުން އިއާދަކުރުމަށް މިއަދު ޢަޒުމް އާ ކުރަންޖެހޭ ކަމަށް ވެސް ޑރ.ޝަހީމް ވިދާޅުވިއެވެ.
