ރާއްޖެ ޓްރާންސްޕޯޓް ލިންކް (އާރްޓީއެލް) ގެ ދަށުން އެމްޓީސީސީން ވިލިމާލޭގައި ދެމުން އަންނަ އީވީ ބަހުގެ ޚިދުމަތުން މާދަމާއިން ފެށިގެން އަގު ނަގާ ގޮތަށް ނިންމައިފިއެވެ.
އެމްޓީސީސީން ވިލިމާލޭގައި ބަހުގެ ޚިދުމަތް ފެށީ މީގެ ދެ ހަފުތާ ކުރިންނެވެ. އެ މުއްދަތުގައި އޮތީ ހިލޭ ދަތުރުތައް ކުރެވޭ ގޮތަށް ހަމަޖައްސައިފައެވެ. އެ ކުންފުނިން މިއަދު ބުނީ މާދަމާއިން ފެށިގެން އަގު ނަގާނެ ކަމަށެވެ.
ކޮންމެ ދުވަހަކު 24 ގަޑިއިރު ލިބޭނެ ގޮތަށް އިންތިޒާމުކޮށްފައިވާ މި ޚިދުމަތަށް ކަނޑައަޅާފައިވާ އަގަކީ 5 ރުފިޔާއެވެ.
އެމްޓީސީސީން ބުނީ އާރްޓީއެލް މޯބައިލް އެޕް ނުވަތަ ވެބްސައިޓް މެދުވެރިކޮށް ކިޔު.އާރް ޓިކެޓް ނަންގަވައިގެންނާއި، ކޮންކްޓެކްޓްލެސް މާސްޓަރކާރޑް އަދި ވިސާ ޑެބިޓް ކާރޑް ނުވަތަ ކްރެޑިޓް ކާރޑް މެދުވެރިކޮށާއި އަދި ބަހުން ކަރުދާސް ޓިކެޓް ބައްލަވައިގަނެގެން ފައިސާ ދެއްކުމުގެ އިންތިޒާމު ހަމަޖެހިފައިވާ ކަމަށެވެ.
ކަރުދާސް ޓިކެޓް ބައްލަވައިގަތުން ހަމަޖެހިފައިވަނީ ބަހުގެ ތެރެއިންނެވެ. ނަމަވެސް ޓާމިނަލްތަކުން ބަހުގެ ޚިދުމަތުގައި ބޭނުންކުރާ ކަރުދާސް ޓިކެޓް ބައްލަވައިގަނެވޭނެ އިންތިޒާމު ހަމަޖެހިފައި ނުހުންނާނެ ކަމަށް އެ ކުންފުނިން ބުންޏެވެ.
”ބައްލަވައިގަންނަވާ ޓިކެޓުގެ ފައިސާލާނެ ޚާއްސަ ފޮއްޓެއް ބަސް ތެރޭގައި ބެހެއްޓިފައި ހުންނާނެ. ބަސް ތެރޭގައި ފައިސާ މާރު ކުރެވޭނެ އިންތިޒާމު ހަމަޖެހިފައި ނެތުމާއެކު ހުރިހާ ބޭފުޅުން ވެސް ސީދާ ޓިކެޓުގެ އަގު ހަމަވާނެހެން ފައިސާ ގެންނެވުމަށް ދަންނަވަން.“
އެމްޓީސީސީން ބުނީ ބަހުގައި ފައިސާ މާރުކުރެވެން ހަމަޖެހިފައިނުވާ މައިގަނޑު ސަބަބަކީ ކަސްޓަމަރުންގެ ވަގުތު ސަލާމަތް ކުރުމަށާއި, ބަހުގެ ޝެޑިއުލަށް ބުރުލެއް އެރިޔަ ނުދިނުން ކަމަށެވެ. އަދި ކަރުދާސް ޓިކެޓް ގަނެވޭނެ އިންތިޒާމު ހަޖައްސާފައިވުމުގެ މައިގަނޑު މަގުސަދަކީ އިސް ރަށްވެހީންނަށް މި ޚިދުމަތް ބޭނުންކުރުމުގައި ފަސޭހަކޮށްދިނުން ކަމަށެވެ.
”ކިޔު.އާރް. ޓިކެޓް ބައްލަވައިގަންނަވާނެ ގޮތުގެ ވީޑިއޯ އަޅުގަނޑުމެންގެ އާރްޓީއެލް ޔޫޓިއުބް ޗެނަލުންނާއި މީސްމީޑިއާގެ މަންސަތަކުގައި ޝާއިއު ކުރެވިފައި ހުންނާނެ. އަދި އާރްޓީއެލް ޓްރެވަލް އެޕް އެޕަލް އެޕް ސްޓޯރުންނާއި ގޫގުލް ޕްލޭ ސްޓޯރުން ހިލޭ ޑައުންލޯޑް ކުރެވެން ހުންނާނެ. ކިޔު.އާރް. ޓިކެޓް ސްކޭން ކުރުމަށްޓަކައި ބަހަށް އެރުއްވުމަށްފަހު ޓިކެޓް ވެލިޑޭޓްކުރުމަށް ކަނޑައެޅިފައިވާ މެޝިންއަށް ދިމާކުރުމަށްފަހު ސްކޭން ކޮށްލައްވަން ޖެހޭނެ.“ އެ ކުންފުނިން ބުންޏެވެ.
މީގެ އިތުރުން ދުނިޔޭގެ ކޮންމެ ބޭންކެއްގެ ވެސް ކޮންޓެކްޓްލެސް މާސްޓަރކާރޑް އަދި ވިސާ ބްރޭންޑުގެ ޑެބިޓް ނުވަތަ ކްރެޑިޓް ކާޑެއް އަތުގައި އޮވެއްޖެނަމަ އާރްޓީއެލް ވިލިމާލެ ބަހުގެ ޚިދުމަތުގައި ވެސް ޓެޕް އެންޑް ޕޭ މެތަޑުން ފައިސާ ދެއްކޭނެ ކަމަށް އެމްޓީސީސީން ބުންޏެވެ. އަދި މާސްޓަރކާރޑާއި, ވިސާ ބްރޭންޑުގެ ކޮންޓެކްޓްލެސް ކާޑު މެދުވެރިކޮށް ޓިކެޓަށް ފައިސާ ދެއްކުމަށް ބޭނުންވާ ވެލިޑޭޓަރ ވިލިމާލޭގެ ހުރިހާ ބަހެއްގައި ވެސް ހަރުކުރެވިފައި ހުންނާނެ ކަމަށާއި, ބަހުގެ ޚިދުމަތަށް ފައިސާ ދެއްކުމަށް ވިސާ ބްރޭންޑުގެ ކޮންޓެކްޓްލެސް ކާޑު, ބަހުގައި ހަރުކުރެވިފައިވާ ވެލިޑޭޓަރގެ ސްކޭނަރގައި ޓެޕްކޮށްލުމުން ނުވަތަ ޖައްސައިލުމުން ވަގުތުން ފައިސާ ދެއްކޭނެ ކަމަށެވެ.
”ޓްރައިއަލް މުއްދަތަށްފަހު ޓިކެޓް ނަންގަވައިގެން ދަތުރުކުރަން ފެށުނަސް މި ޚިދުމަތް 65 އަހަރުން މަތީގެ މީހުންނަށާއި, 3 އަހަރުން ދަށުގެ ކުޑަކުދިންނަށް އައިޑީކާޑު ދެއްކެވުމުން ހިލޭ ލިބިވަޑައިގަންނަވާނެ. ހަމައެހެންމެ ޚާއްސަ އެހީއަށް ބޭނުންވާ ފަރާތްތަކުން އެންސްޕާއިން ދީފައިވާ ކާޑު ދެއްކުމުން ވެސް ހިލޭ ދަތުރު ކުރެވޭނެ. މީގެ އިތުރުން ޔުނިފޯމުގައި ތިބޭ ސްކޫލް ކުދިންނަށްވެސް ބަހުގައި ހިލޭ ދަތުރު ކުރެވޭނެ.“
އެމްޓީސީސީން ބުނީ ވިލިމާލޭ ބަހުގެ ރޫޓް މެޕް އާރްޓީއެލް ވެބްސައިޓް އަދި ޓްރެވަލް އެޕް މެދުވެރިކޮށް ކަސްޓަމަރުންނަށް ބައްލަވައިލެވެން ހުންނާނެ ކަމަށެވެ.
”އާރްޓީއެލް ބަހުގެ ޚިދުމަތް ވިލިމާލޭގައި ފެށިގެން މިވޭތުވެދިޔަ ދެ ހަފުތާ ތެރޭގައި ކަސްޓަމަރުންގެ ފަރާތުންނާއި ވިލިމާލޭގައި ދިރިއުޅުއްވާ ރައްޔިތުންގެ ފަރާތްޕުޅުން ލިބުނު ބޮޑު ތަރުހީބާއި އެއްބާރުލެއްވުމަށް ޝުކުރުދަންނަވަން. ރާއްޖޭގައި ދަތުރުފަތުރުގެ ޚިދުމަތް ފޯރުކޮށްދޭ އެންމެ ބޮޑު ކުންފުނީގެ ހައިސިއްޔަތުން އަޅުގަނޑުމެންގެ މަގުސަދަކީ އެކަށީގެންވާ އަގެއްގައި ވީހާވެސް ލުއިފަސޭހަކަމާއެކު ދަތުރުފަތުރުގެ ޚިދުމަތް ރައްޔިތުންނަށް ފޯރުކޮށްދިނުންމަތީ ދެމިތިބުން“ އެމްޓީސީސީން ބުންޏެވެ.
