ގުޅީފަޅު ހިއްކުމުގެ ދެވަނަ ފިޔަވަހީގެ މަސައްކަތް ނެދަލޭންޑްސްގެ ބޮސްކާލިސް ކުންފުންޏާ ހަވާލުކޮށްފިއެވެ. މި މަސައްކަތް ބޮސްކާލިސްއާއި ހަވާލުކޮށްފައިވަނީ 2 ބިލިއަނަށްވުރެ ގިނަ ރުފިޔާއަށެވެ.
ގުޅީފަޅު ހިއްކުމުގެ ދެވަނަ ފިޔަވަހި ޚާއްޞަކުރަނީ ސަރުކާރުން ގުޅީފަޅުގައި ތަރައްޤީކުރާ ސަރަޙައްދީ ބަނދަރުގެ މަސައްކަތަށެވެ. މިއީ މާލޭގައި ހިންގަމުންދާ ބައިނަލްއަޤްވާމީ ވިޔަފާރި ބަނދަރުގެ ޚިދުމަތް ގުޅީފަޅަށް ބަދަލުކުރުމަށް ނިންމާފައިވާ މަޝްރޫޢުއެވެ.
ނެދަލޭންޑްސްގެ ބޮސްކާލިސް ކުންފުންޏަކީ ރާއްޖޭގެ ތަރައްޤީގައި މީގެ ކުރިން ކާމިޔާބު މަސައްކަތްތަކެއް ކޮށްފައިވާ ކުންފުންޏެކެވެ. އެގޮތުން ބޮސްކާލިސްއަކީ 2010ވަނަ އަހަރު ގުޅީފަޅުގެ ފުރަތަމަ ފިޔަވަހިވެސް ހިއްކި ކުންފުންޏެވެ. އަދި 2019ވަނަ އަހަރު ގުޅީފަޅުގެ ގޮނޑުދޮށް ޙިމާޔަތްކުރުމާއި ގުޅޭ މަސައްކަތްތައް ކުރިއަށްގެންގޮސް އެކުންފުނިންވަނީ، ގުޅީފަޅުގެ ފުރަތަމަ ފިޔަވަހީގެ މަސައްކަތް މުޅިން ނިންމާފައެވެ. މީގެތެރޭގައި ގްރޭޓަރ މާލެ ކަނެކްޓިވިޓީ ބްރިޖު، ގުޅީފަޅާއި ގުޅުވާލުމަށް ނިންމާފައިވާ ސަރަޙައްދުވެސް އެ ކުންފުނިން ހިއްކާފައިވެއެވެ.
މިހާރު މިވަނީ ގުޅީފަޅުން އިތުރަށް ބިން ހިއްކާ، އަދި ހިއްކާ ސަރަޙައްދުގައި ރިވެޓްމަންޓްޖަހާ ޙިމާޔަތްކުރުމުގެ މަސައްކަތްވެސް ބޮސްކާލިސްއަށް ދިނުމަށް މިނިސްޓްރީ އޮފް ނެޝަނަލް ޕްލޭނިން ހައުސިން އެންޑް އިންފްރާސްޓްރަކްޗަރއިން ނިންމާފައެވެ.
މި ޕްރޮޖެކްޓް ކުރިއަށްގެންދިއުމަށް ބޮސްކާލިސްއާއެކު އެއްބަސްވެފައިވަނީ 120 މިލިއަން ޑޮލަރު ނުވަތަ 2ބިލިއަނަށް ވުރެ ގިނަ ރުފިޔާއަށެވެ.
ގުޅީފަޅު ދެވަނަ ފިޔަވަހި ހިއްކުމަށް 18މިލިއަން ކިއުބިކް މީޓަރުގެ ވެލި ފަޅަށް އަޅާނެއެވެ. އަދި ހިއްކާ ސަރަޙައްދު ވަށައިގެން ބޮޑުހިލައިގެ ރިވެޓްމަންޓް ޖަހާނެއެވެ. ނަމަވެސް މި މަޝްރޫޢުގެ ދަށުން ހިއްކަނީ ކިހާ ސަރަހައްދެއްކަމެއް އެކުންފުނިން ބުނެފައެއް ނުވެއެވެ.
އެ ކުންފުނިން ބުނެފައިވަނީ މި މަޝްރޫޢުއަށް ބޭނުންވާ ސަރވޭގެ މަސައްކަތް ފަށާފައިވާކަމަށެވެ. އެގޮތުން ތިމާވެއްޓަށް ލިބޭ ގެއްލުން ބެލުމަށް ހަދާ ދިރާސާތައް ހަދާފައިވާކަމަށް އެކުންފުނިން ބުންޏެވެ. އަދި މި ޕްރޮޖެކްޓް ކުރިއަށްގެންދާނީ ތިމާވެއްޓަށް ވީހާވެސް ގެއްލުން ކުޑަވާނެ ގޮތްތަކަށް ބަލައިގެންކަމަށްވެސް އެކުންފުނިން ބުންޏެވެ. އެގޮތުން އެ ސަރަޙައްދުގެ ފަރުގެ މުރަކަ އެހެން ސަރަޙައްދަކަށް ބަދަލުކުރުމާއި، ލޮނުގަނޑުގައި ކިސަޑުކަން ފެތުރޭ މިންވަރު ކުޑަކުރުމާއި، އެ ސަރަޙައްދުގެ މޫދު ލޮނުގެ ކޮލިޓީއަށް އަންނަމުންދާ ބަދަލުވެސް ޤަވާއިދުން ބަލަމުންދާނެކަމަށް ބޮސްކަލިސްއިން ބުންޏެވެ.
ގުޅީފަޅަކީ މާލެއާއި ގާތްގަނޑަކަށް 4 ކިލޯމީޓަރު ދުރުގައި ތަރައްޤީކުރާ ފަޅެކެވެ. 2010ވަނަ އަހަރު ފުރަތަމަ ގުޅީފަޅު ހިއްކި ބޭނުމަކީ އެތަނުގައި މީހުން އާބާދުކޮށް، މާލޭގެ ތޮއްޖެހުން ކުޑަކުރުމެވެ. ނަމަވެސް 2013ވަނަ އަހަރު އޭރުގެ ސަރުކާރުން ވަނީ އެ މަސައްކަތް ހުއްޓާލާފައެވެ. އަދި އެ ފަސް އަހަރު ގުޅީފަޅުގެ ތަރައްޤީއަށް އެއްވެސް މަސައްކަތެއް ކޮށްފައެއް ނުވެއެވެ. ގުޅީފަޅު މަޝްރޫޢު އޭރު ހުއްޓާލިއިރު، އެތަނުގައި ހަދަން ފަށާފައިވާ ގިނަ ހައުސިން ޔުނިޓް އިމާރާތްތައްވެސް ހުއްއްޓެވެ.
ނަމަވެސް މި ސަރުކާރުން މިވަނީ ގުޅީފަޅު ތަރައްޤީކުރުމުގެ ޕްލޭން އަލުން އެކުލަވާލާ އެމަގުން މަސައްކަތްތައް ފަށާފައެވެ. އެގޮތުން ގުޅީފަޅަށް މާލޭގެ ވިޔަފާރި ބަނދަރު ބަދަލުކުރުމާއި، އެތަނުގައި މީހުން އާބާދުކުރުމަށް ވަނީ ނިންމާފައެވެ.
މި ސަރުކާރުން ވަނީ ގުޅީފަޅުން 2000 ގޯތި މާލޭގެ ރައްޔިތުންނަށް ދޫކުރުމަށް ނިންމާފައެވެ.
