ދުއްވާ ފައި ދިޔަ ކާރެއްގައި ބެލްޓް ނައަޅުއްވައި އިންނެވުމުގެ ސަބަބުން އިނގިރޭސި ބޮޑުވަޒީރު ރިޝީ ސޮނިކް ޖުރިމަނާ ކޮށްފިއެވެ. ޖޫރިމަނާ ކުރުމުގެ ކުރިން ބޮޑު ވަޒީރު ވަނީ އޭނާއަށް ކުރެއްވުނު ކުށަށް މާފަށް އެދިވަޑައިގެންފައެވެ.
އިނގިރޭސި ފުލުހުން ގައުމުގެ ބޮޑު ވަޒީރު ޖުރިމަނާކުރީ ހުކުރު ދުވަހުގެ މެންދުރު ފަހުގެ ވަގުތެއްގައެވެ.
ބޮޑުވަޒީރުގެ އޮފީހުން ނެރުނު ބަޔާނެއްގައި ބުނެފައި ވަނީ ބޮޑު ވަޒީރު ރިޝީ ސޮނިކް ސީޓް ބެލްޓް ނައްޓާލެއްވީ ކުރު ވީޑިއޯ ކްލިޕެއް ހަދަން ކަމަށެވެ. ނަމަވެސް އެއީ ހެއްދެވުނު ގޯހެއްކަމަށް ބުނެފައިވެއެވެ. ވީޑިއޯއިން ސާފުކޮށް ފެންނަނީ ބޮޑު ވަޒީރު ބެލްޓު ނައަޅުއްވައި ކެމެރާއާ ދިމާއަށް ބައްލަވަން އިންނެވިތަނެވެ.
”ބޮޑު ވަޒީރު އެމަނިކުފާނަށް ގޯހެއް ހެއްދެވުނުކަމަށް އިއުތިރާފުވެވަޑައިގެން، އެކަމަށް މައާފަށް އެދިވަޑައިގެންފައިވޭ.“ ބަޔާނުގައިވެ އެވެ. ”ކޮންމެ މީހަކުވެސް ސީޓް ބެލްޓު އަޅަން ޖެހޭނެ.“
އެ ހާދިސާއާ ގުޅޭ ގޮތުން އެ ސަރަހައްދުގެ ފުލުހުން ނެރުނު ފުރަތަމަ ބަޔާނުގައި ބޮޑުވަޒީރުގެ ނަން ލިޔެފައި ނެތަސް އޭނާގެ އުމުރާއި ދިރިއުޅޭ ތަން ފާހަގަކޮށްފައިވެ އެވެ.
ފުލުހުން އެ މައްސަލަ ބެލީ މީސްމީޑިއާގައި އާންމުކުރި ވީޑިއޯއެއް ބަލައި ތަހުގީގު ކުރުމަށްފަހުގައެވެ.
އިނގިރޭސިވިލާތުގައި ގާނޫނާ ހިލާފުވުމުގެ އެގޮތަށް ޖޫރިމަނާ ކުރާ މީހަކު ޖޫރިމަނާ 28 ދުވަހުގެ ތެރޭގައި ދައްކަން ޖެހެއެވެ. ނޫންނަމަ ކޯޓަށް އެ މައްސަލައެއް ހުށަހަޅަންޖެހޭނެއެވެ.
އިނގިރޭސި ގާނޫނު ބުނާ ގޮތުން ސީޓް ބެލްޓު ނާޅާތީ ފުލުހުން ކުރާ ޖޫރިމަނާ ކަނޑައެޅިފައިވާ މުއްދަތުގެ ތެރޭގައި ނުދައްކައިފި ނަމަ އެ މީހާ 500 ޕައުންޑާ ހަމައަށް ޖޫރިމަނާ ކުރެވޭނެ އެވެ.
ފުލުހުން ނެރުނު އަމުރަށް ފަހު މާގިނައިރުތަކެއް ނުވެ ބޮޑު ވަޒީރު ރިޝީ ސޮނިކްގެ އޮފީހުން ނެރުނު ބަޔާނެއްގައި ބުނެފައި ވަނީ ބޮޑު ވަޒީރު އޭނާއަށް ކުރެއްވުނު ކުށަށް ފުރިހަމައަށް އިއުތިރާފުވެވަޑައިގަންނަވާ ކަމަށާއި އެކަމަށް މައާފަށް އެދިވަޑައިގެންފައިވާ ކަމަށެވެ. އަދި ކަނޑައެޅިފައިވާ ޖޫރިމަނާ ދައްކަވާނެކަމަށެވެ.
އެ ހާދިސާގެ ސަބަބުން އަނެއްކާވެސް އިދިކޮޅު ފަރާތްތަކަށް ބޮޑު ވަޒީރަށް ފާޑުކިޔުމުގެ ފުރުސަތު ލިބިގެން ހިނގައްޖެއެވެ. އިދިކޮޅު ލޭބަރ ޕާޓީގެ ޑެޕިއުޓީ ލީޑަރު އެންޖެލާ ރެއިން ސޮނިކް ސިފަކުރެއްވީ ބޮޑު ބުރައެއްގެ ގޮތުގަ އެވެ.
ލަންކާޝަޔަރގެ ކޮންޒަވޭޓިވް މެމްބަރު ސްކޮޓް ބެންޓަން ވިދާޅުވީ އޭނާގެ ދާއިރާއަށް އަސަރުކުރާ ބޮޑެތި ޖަރީމާތައް ތަހުގީގު ކުރުމަށް ލަންކާޝަޔަރ ޕޮލިހުން އިތުރު ވަގުތާއި ސަމާލުކަން ދޭނެ ކަމަށް ޔަގީން ކުރައްވާކަމަށެވެ.
ބޮޑުވަޒީރު ސޮނާކްއާ ދެކޮޅަށް ހުށަހެޅި ޝަކުވާއާއި ޖުރިމާނާއަކީ ސިޔާސީ ކަމެއް ކަމަށް ބައެއް މީހުން ސިފަކުރަމުން ދާއިރު އަނެއް ބަޔަކު ބުނަމުން ދަނީ އެއީ ވަރަށް ބޮޑަށް އިންސާފުން ކުރެވުނު ކަމެއް ކަމަށެވެ.
މީގެ ކުރިން ވެސް ރިޝީ ސޮނިކް ޖުރިމާނާ ކޮށްފައިވެއެވެ.
