ދިވެހިންނަށް ވެސް ޔާމީން ”އޯކޭއެއް ނޫން“ : ރޮޒައިނާ

ދިވެހިންނަކަށް ވެސް ކުރީގެ ރައީސް ޔާމީން ޢަބްދުލްޤައްޔޫމް ”އޯކޭއެއް ނޫން“ ކަމަށް އައްޑޫ މީދޫ ދާއިރާގެ މެންބަރު ރޮޒައިނާ އާދަމް މިއަދު ވިދާޅުވެއްޖެއެވެ.

އާޓިފިޝަލް ބީޗުގައި ރޭ ބޭއްވި ކެމްޕޭން ޖަލްސާގައި ދެއްކެވި ވާހަކަފުޅުގައި ރައީސް ޞާލިޙް ވަނީ ކުރީގެ ރައީސް ޔާމީނާއެކު ކުރައްވާނެ ސިޔާސީ އެއްވެސް މަސައްކަތެއް ނޯންނާނެ ކަމަށާއި އެ މަނިކުފާނު އޯކޭއެއް ނޫން ކަމަށް ވިދާޅުވެފައެވެ.

އެކަމަށް ރައްދު ދެއްވައި މަޑުއްވަރީ ދާއިރާގެ މެންބަރު އާދަމް ޝަރީފް ވިދާޅުވީ ރައީސް ޞާލިޙާއި ބައެއް އެހެން މީސްމީހުންނަށް ރައީސް ޔާމީން އޯކޭ ނުވަނީ އެމްއެމްޕީއާރްސީގެ ޚިޔާނާތުގެ ފައިސާ ގެންދިޔަ މީހުން ރައީސް ޔާމީނަށް އެނގިވަޑައިގަންނަވާތީ ކަމަށެވެ. ތުހުމަތު ކުރެވުނު ގިނަ މީހުންނަށް އޭރުން ފިޔަވަޅު އެޅޭނެ.

”އެމްއެމްޕީއާރްސީގެ މައްސަލަ ދެން ވެސް ބެލޭނީ ރައީސް ޔާމީންގެ ވެރިކަމެއްގައި ޕީޕީއެމްގެ ސަރުކާރުން.“ ޝަރީފް ކުރެއްވި ޓުވީޓެއްގައި ވިދާޅުވިއެވެ.

ޝަރީފްގެ ވާހަކައާ ގުޅިގެން ރޮޒައިނާ ވިދާޅުވީ ދިވެހިންނަކަށް ވެސް ކުރީގެ ރައީސް ޔާމީން އޯކޭއެއް ނޫން ކަމަށާއި އާދަމް ޝަރީފަށް ވެސް ޔާމީން އޯކޭ ނޫން ކަން އެނގިވަޑައިގަންނަވާ ކަމުގައެވެ.

”ތިހެންދޯ އަބަދުވެސް މި ކިޔަނީ. ޔާމީނަށް އެނގެޔޭ. ބޮޑުބައި ދިޔައީ ޔާމީންގެ އެކައުންޓުތަކަށޭ. އެމްޕީ އާދަމް ޝަރީފް ވެސް އެކަން ގަބޫލުކުރައްވައި ޕަބްލިކްގައި ތިހެން ވިދާޅުވިކަމަށްޓަކައި ޝުކުރިއްޔާ.“ ޝަރީފަށް ރައްދު ދެއްވައި ރޮޒައިނާ މިއަދު ކުރެއްވި ޓުވީޓެއްގައި ވިދާޅުވިއެވެ.

”ބޮޑުބައި“ ދިޔައީ ޔާމީންގެ އެކައުންޓުތަކަށް ކަމަށް ރޮޒައިނާ ވިދާޅުވިއިރު، އެމްއެމްޕީއާރްސީ މެދުވެރިކޮށް ދައުލަތަށް ލިބެންޖެހޭ ފައިސާ އެސްއޯއެފްގެ އެކައުންޓަކަށް ޖަމާވުމުން އެ ކުންފުނިން ރައީސް ޔާމިންގެ އެކައުންޓަކަށް ފައިސާ ޖަމާކުރި މައްސަލައިގައި ރައީސް ޔާމިންގެ މައްޗަށް ކްރިމިނަލް ކޯޓުން ޙުކުމް އިއްވީ 2019 ވަނަ އަހަރުގެ ނޮވެމްބަރު މަހުގެ 28 ގައެވެ.

އެސްއޯއެފްއިން ޔާމީންގެ އެކައުންޓަށް ޖަމާވި އެއް މިލިއަން ޑޮލަރަކީ ވޮޑަމުލާ ކުއްޔަށް ދޫކޮށްގެން އެމްއެމްޕީއާރްސީއަށް ވަން ފައިސާކަމަށް ދައުލަތުން ބުނެފައިވެއެވެ. އަދި އެ ފައިސާގެ އަސްލު އޮޅުވާލައްވައި އެއިން ޔާމީން މަންފާ ހޯއްދެވިކަމަށް ވެސް ބުނެފައިވެއެވެ.

ނަމަވެސް ސްޕްރީމް ކޯޓުން ވަނީ އެ މައްސަލައިގައި ކުރި ޙުކުމް ބާތިލުކޮށްފައެވެ.

މީގެއިތުރުން އެމްއެމްޕީއާރްސީ މެދުވެރިކޮށް ވ.އާރަށް ކުއްޔަށް ދޫކޮށްގެން ރިޝްވަތުގެ ގޮތުގައި އެއް މިލިއަން ޑޮލަރު ނަންގަވައި އެ ފައިިސާ ލޯންޑާ ކުރެއްވިކަން ސާބިތުވި މައްސަލައިގައި ރައީސް ޔާމީންގެ މައްޗަށް މިދިޔަ މަހުގެ 25 ވަނަ ދުވަހު ވަނީ 11 އަހަރުގެ ޖަލު ޙުކުމެއް އިއްވާފައެވެ.

ހަމައެއާއެކު އެމްއެމްޕީއާރްސީ މެދުވެރިކޮށް ރިސޯޓެއްގެ ގޮތުގައި ތަރައްޤީކުރަން ރ.ފުއްގިރި ކުއްޔަށް ދޫކުރުމުގެ މުޢާމަލާތާއި ގުޅިގެން މަޤާމުގެ ނުފޫޒު ބޭނުންކުރައްވައި ރިޝްވަތުގެ ގޮތުގައި 1،117،000 ޑޮލަރު ނެންގެވި ކަމުގެ ތުހުމަތުގައި ރައީސް ޔާމިންގެ މައްޗަށް އުފުލާފައިވާ ދެ ދަޢުވާގެ ޝަރީޢަތް ވެސް ކްރިމިނަލް ކޯޓުގައި ދަނީ ކުރިއަށެވެ.