ވެރިކަމަކީ ހަމައެކަނި މާލޭ މީހުން ކުރަން އޮތް ކަމެއްނޫން ކަމަށް ވިދާޅުވެ ކުޅިވަރާބެހޭ ވަޒީރު އެމްޑީޕީގެ ރައީސް މުޙައްމަދު ނަޝީދަށް ވަރަށް ބޮޑަށް ފާޑުވިދާޅުވެއްޖެއެވެ.
އާޓިފިޝަލް ބީޗުގައި މިރޭ ބޭއްވި ރައީސް އިބްރާހިމް މުޙައްމަދު ޞާލިޙްގެ ކެމްޕޭން ޖަލްސާގައި ދެއްކެވި ވާހަކައިގައި ރައީސް ނަޝީދަށް ފާޑުވިދާޅުވެ ދެއްކެވި ވާހަކަފުޅުގައި މަހްލޫފް ވިދާޅުވީ މައްސަލައަކީ ތިމާމެން އެންމެ ބޭނުންވާ މީހާ މި ވަގުތު ވެރިކަމުގަ ނެތުން ކަމަށެވެ.
މަހްލޫފް ވިދާޅުވީ ”އަޅުގަނޑުމެން އެންމެން އެންމެ ހިތްއެދޭ އެންމެ ބޭނުންވާ ކަންތައް ފަހަރެއްގަ ނުވެ ހުރެދާނެ“ ކަމަށާއި އެކަންކަން ގަބޫލުކުރަންޖެހޭ ކަމަށެވެ.
”އެ ރިއަލިޓީ ގަބޫލުކުރަން އެބަޖެހޭ.“
”މައްސަލައަކީ ރާއްޖޭގެ ކުޑަ ރަށެއްގެ ރައްޔިތަކު ބޭފުޅަކު އައިސް ރާއްޖޭގެ ވެރިކަން ކުރާތީ. ހަމައެކަނި މާލޭ މީހުން ކުރަން އޮތް ކަމެއް ނޫނޭ ވެރިކަމަކީ.“ މަހްލޫފް ވިދާޅުވިއެވެ.
ރައީސް ނަޝީދަށް ޢިޝާރަތް ކުރައްވައި މަހްލޫފް ވިދާޅުވީ މައްސަލައަކީ ވަކި ބޭފުޅަކު ވިދާޅުވާ ގޮތަށް ކެބިނެޓަށާއި ސިޔާސީ ހުރިހާ މަޤާމުތަކަށް މީހުން އައްޔަން ނުކުރެއްވުން ކަމަށެވެ. އަދި މައްސަލައަކީ ވިދާޅުވާހައި ގޮތަކަށް ރައީސް ޞާލިޙް “ޕަޕެޓެއްހެން ވެރިކަން ކުރަމުން ނުގެންދިއުން“ ކަމަށާއި ހުރިހާކަމެއް ވިދާޅުވާ ގޮތަކަށް ނުކުރެއްވޭނެ ކަމަށެވެ. އަދި މައްސަލައަކީ ވެރިކަން ތިމަންނާއަށް ދެއްވީ ވެސް ތިމަންނާ އެކަނި ކަމާ ވެރިކަމުން ބާލާނީ ވެސް ތިމަންނާ އެކަނި ކަމަށް ގަބޫލު ކުރެވޭ ކުރުން ކަމުގައެވެ.
ވެރިކަމަށް ވާދަކުރެއްވުމަކީ ވެސްވެރިކަމަށް ޝައުގުވެރިވުމަކީވެސް ކޮންމެ މީހަކަށް އޮތް ޙައްޤެއް ކަމަށް ވެސް މަހްލޫފް ވިދާޅުވިއެވެ.
”ނަމަވެސް އަޅުގަނޑުމެންގެ ޕާޓީތެރެއިން ވެރިކަމަށް އަންނަން އެ މަސައްކުރާ ކުރުމަކީ އަމިއްލަ ޕާޓީތެރޭގަ އޮޅުވާލުމާއި ދޮގު ހެދުމާއި މަކަރު ހެދުމުގެ ތެރެއިން ކުރާ ކަމަކަށްވާނަމަ އަޅުގަނޑު އެކަމާ ވަރަށް ދެރަވޭ. އަމިއްލަ ޕާޓީގެ ފަރާތުން ރައީސުލްޖުމްހޫރިއްޔާ ކަމުގެ މަގާމުގައި ހުންނެވި ރައީސުލްޖުމްހޫރިއްޔާއާ އަދި ސަރުކާރާ ވައްކަމުގެ ތުހުމަތާއި ބޮޑެތި ޖަރީމާތަކުގެ ތުހުމަތު އަޅުވަމުން ގެންދާކަމީ ހަމަ އެހެންމެ ބެސްޓް ފްރެންޑް ހަތުރަކަށް ބަދަލުވެގެންދާ ގޮތަށް ކަންތައް ބަދަލުވެގެންދާކަމީ އަޅުގަނޑު ހިތާމަކޮށް ދެރަވާ ކަމެއް. ޕްރައިމަރީ ކާމިޔާބު ނުކުރެވިއްޖެނަމަ އެހެން ކެންޑިޑޭޓަކަށް ތާއީދުކުރާނެ ވާހަކަ ނޫންނަމަ ގޮސް ހުންނަވާނީ ގޭގައިކަމަށް ވިދާޅުވާ ވާހަކައަކީ އަޅުގަނޑުމެންނަށް އަޑުއަހަން ޑިމޮކްރަސީއާ ބީރަށްޓެހި ވާހަކައެއް.“ މަހްލޫފް ވިދާޅުވިއެވެ.
ދާދިފަހުން ނ.ކެނދިކުޅުދުއަށް ވަޑައިގެން ސަޕޯޓަރަކު ކުރި ސުވާލަށް ޖަވާބ ދެއްވަމުން ނަޝީދު ވިދާޅުވެފައިވަނީ ޕްރައިމަރީން ނާކާމިޔާބުވެވަޑައިގެންފިނަމަ ރައީސް ޞާލިޙާއެކު ނުހުންނަވާނެ ކަމަށެވެ.
”އަހަރެން އެކަނި ގޮސް ގޭގަ ހުރީމަ ނިމުނީނު.“ ނަޝީދު އެ ދުވަހު ވިދާޅުވިއެވެ.
