ރާއްޖެއަށް ކުރިމަތިވެފައިވާ އިގުތިސާދީ އަދި ސިޔާސީ މުސީބާތުގެ ވަރުގަދަކަން މެދުކެނޑުމެއްނެތި އިތުރުވަމުން އެބަ ދެއެވެ.
ރިޔާސީ ޕްރައިމަރީއާ ހެދި އެމްޑީޕީ ވަނީ ދެ ފަޅި ވެފައެވެ. ދެފަރާތުގައި ތިބި އަނގަގަދަ މީސްމީހުން ދަނީ އެއްބަޔަކު އަނެއްބަޔަކަށް ފާޑު ކިޔައި ހަޑިހުތުރު ހާވަމުންނެވެ.
އެމްޑީޕީއަށް ދިމާވެފައިވާ އެންމެ ބޮޑު ދެރައަކީ ޕާޓީގެ ރައީސް، ރައީސް ނަޝީދާއި ގައުމުގެ ރައީސް އިބްރާހީމް މުޙައްމަދު ޞާލިޙް އެއްބޭފުޅަކު އަނެއް ބޭފުޅަކަށް ވިދާޅުވަމުން ގެންދަވާ ފާޑުކިއުންތަކެވެ. އެއީ ޑިމޮކްރަސީގެ ތިން ހަމަ ކަމަށް ދެކެވަޑައިގަންނަވާ ބޭފުޅުންނަށް އެއީ ހަމަ ކަމަށްވިޔަސް އަދި ވަރިހަމަ ކަމަށް ވިޔަސް އެކަމުން ޕާޓީއަށް ބޮޑު ގެއްލުމެއް ނުލިބިއެއް ނުދާނެއެވެ. ޕާޓީގެ އެތައް ހާސް އާންމު މެންބަރުން ތިބީ އެކަމާ ހާސްވެ ފިކުރު ބޮޑުވެފައެވެ.
ރައީސް އިބްރާހީމް މުޙައްމަދު ޞާލިޙުގެ އަރިދަށުގައި ޕްރައިމަރީގައި އެ މަނިކުފާނަށް ވޯޓު ނުދެއްވޭނެ ވަރަށް ގިނަ ބޭފުޅުން އެބަ ތިއްބެވިއެވެ. ރައީސް މައުމޫނާއި އެ މަނިކުފާގެ ސަޕޯޓަރުންނެވެ. ގާސިމް އިބްރާހީމާއި އެ މަނިކުފާނުގެ ސަޕޯޓަރުންނެވެ. ޢިމްރާން އާއި އެ މަނިކުފާނުގެ ސަޕޯޓަރުންނެވެ. އަދި އެމްޑީޕީގެ ރައީސް އަދި ކުރީގެ ރައީސް މުޙައްމަދު ނަޝީދުގެ ސަޕޯޓަރުންނެވެ.
ރައީސް ނަޝީދުގެ އަރިހުގައި ތިއްބެވީ އެމްޑީޕީއަށްޓަކައި މަރުދިން އަދި މަރުދޭން ތިބި މީސްމީހުންނެވެ. އެ މީހުން ގަބޫލު ކުރާގޮތުގައި ރައީސް ޞާލިޙުގެ އަރިހުގައި ތިއްބެވީ އަމިއްލަ އެދުމަށްޓަކައި، ވަޒީފާއަށް ޓަކައި ކުލަބަދަލުކޮށްގެން އުޅޭ ދެފުށް ކެހެރިންނެވެ. އޭގެ ތެރެއިން ވަރަށް ގިނަ ބަޔަކު ރައީސް ނަޝީދަށް ހެއު ފާހަގަ ޖަހާނެއެވެ.
ރާއްޖެ ރިޔާސީ އިންތިޚާބުގެ ކުރިން ސިޔާސީ ހަމަނުޖެހުމެއްގެ ތެރެއަށް ގައުމު ފުރޮޅިގެން ގޮސްފައި ވަނީ އެމްޑީޕީން ރިޔާސީ އިންތިޚާބަށް ނެރޭނެ ކެންޑިޑޭޓަކު ހޮވުމަށް ބާއްވާ ޕްރައިމަރީ ބޯމަތިވެ ވާދަވެރިކަން ބޮޑުވުމުންނެވެ. ހަމައެޔާއެކު ޕީޕީއެމްގެ ރިޔާސީ ކެންޑިޑޭޓު ކުރީގެ ރައީސް ޔާމީން ޢަބްދުލްޤައްޔޫމް ކޮރަޕްޝަންގެ މައްސަލައެއްގައި ޖަލަށް ލެވުމުންނެވެ. އެ މަނިކުފާނު ޖަލުން މިނިވަންކުރުމަށް ޕީޕީއެމްގެ ވަފާތެރިން ގައުމާއި ގައުމުން ބޭރުގައި ދަނީ ބުރަ މަސައްކަތް ކުރަމުންނެވެ.
ރާއްޖޭގެ އެތެރެއާއި ބޭރުގެ ދަރަނި އިންތިހާއަށް އިތުރުވެ، އިގުތިސާދީ ކުރިއެރުމުގެ މަރުހަލާ ކުރިއަށް ގެންދިއުމަށް ވަރަށް ބޮޑަށް ބޭނުންވެފައިވާ ދަނޑިވަޅެއްގައި ވެރިކަންކުރާ ކޯލިޝަންގައި ހިމެނޭ އެންމެ ބޮޑު ޕާޓީ އެމްޑީޕީ، ދެބައިވެ އެއްބަޔަކު އަނެއްބަޔަކަށް ގުދޯގުދޯ ގޮވަން ފަށައި ކެމްޕޭނުގެ ފޯރީ ގަދަވާން ފެށުމުން މުޅި ގައުމުގެ ސަމާލުކަން ހުއްޓިފައި ވަނީ މި މަހު 28ގައި ބާއްވާ ޕްރައިމަރީގެ ނަތީޖާއަށެވެ.
ސިޔާސީ ހަލަބޮލިކަމާއި ޔަގީންކަން ނެތް މާހައުލެއް އުފެދި ސިޔާސީ ނުތަނަވަސްކަން މުޅިގައުމަށް ފެތުރި އެއްބަޔަކު އަނެއް ބަޔަކަށް އިތުބާރު ނެތްކަމުގެ މައްސަލަތައް ދަނީ ފެންމަތިވަމުންނެވެ. އެކަމުގެ ސަބަބުން ސިޔާސީ ތޫފާނެއް އުފެދި އޭގެ ނުރައްކާ މުޅި ގައުމަށް ފެތުރިގެން ހިނގައިދާނެއެވެ. މިއީ ގައުމީ ފެންވަރުގައި ވިސްނަންޖެހޭ ކަމެކެވެ.
ސިޔާސީ ނުތަނަވަސްކަން ނިމުމަކަށް ގެނެސް، ސިޔާސީ އަދި އިގުތިސާދީ ހަމަޖެހުމުގެ މަގުގައި ގައުމު ކުރިއަށް ގެންދެވޭނެ ހައްލެއް ހޯދުމަށް ސަރުކާރާއި ދައުލަތުގެ މުއައްސަސާތައް ހިމެނޭ ގޮތަށް ހަރުދަނާ މަސައްކަތްތަކެއް ކުރަން ޖެހެއެވެ.
މިއީ ސިޔާސީ ލީޑަރުންނާއި ދައުލަތުގެ މުއައްސަސާތަކުން ވިސްނުންތެރިކަމާއި ރޭވުންތެރިކަމާއެކު އުކުޅުތަކުގެ ބޭނުންކޮށްގެން ހަރުދަނާ ފިޔަވަޅުތަކެއް އަޅަންޖެހޭ ދަނޑިވަޅެވެ. ގައުމުގައި ދަނީ ސިޔާސީ ހަލަބޮލިކަން އިތުރުވެ ސިޔާސީ ނުތަނަވަސްކަން ފެތުރެމުންކަން ހެއު ހިތުން ގަބޫލުކުރަން އެބަ ޖެހެއެވެ. މި ސިޔާސީ ދަތިކަމުން އަރައި ގެނެވޭނެ ގޮތެއް ހޯދުމަކީ ސިޔާސީ ލީޑަރުންގެ ޒިއްމާއެކެވެ. އެމީހުންނަށް ކުރިމަތިވެފައިވާ އިމްތިހާނެކެވެ.
