ސޮމާލިޔާގެ ވެރިރަށް މޮގަދިޝޫގެ އުތުރުގައި އޮންނަ އަސްކަރީ މަރުކަޒަކަށް ހަމަލާދީ، ސިފައިންގެ 11 މީހުން މަރައިލައިފިއެވެ. މި ހަމަލާގެ ފަހަތުގައި ވަނީ އެ ޤައުމުގައި ހަރަކާތްތެރިވާ ހަނގުރާމަވެރި ޖަމާޢަތެއް ކަމުގައިވާ އަލް ޝަބާބް ޖަމާޢަތެވެ.
މި ހަމަލާގައި އަސްކަރިއްޔާގެ އިސް ކޮމާންޑަރެއް ވެސް މަރައިލާފައިވާ ކަމުގައި، ސޮމާލިޔާގެ އަސްކަރިއްޔާއާ ގުޅިފައިވާ ހަނގުރާމަވެރި ޖަމާޢަތަކުން ބުންޏެވެ. އަލް ޝަބާބް ހަނގުރާމަވެރިންގެ ހަމަލާތައް ފަށާފައި ވަނީ އަސްކަރީ މަރުކަޒު ކައިރީގައި ކާރުބޮމެއް ގޮއްވައިލައިގެންނެވެ. އަދި، އެއަށްފަހު ހަނގުރާމަވެރިން ވަނީ އަސްކަރީ މަރުކަޒަށް ވަދެ، އެ ތަނުގައި ތިބި ސިފައިންނަށް ހަމަލާދީފައެވެ.
ހަނގުރާމަވެރިންގެ ހަމަލާތައް ހުއްޓުވަން ސިފައިން ކުރި މަސައްކަތުގައި އަލް ޝަބާބް ޖަމާޢަތުގެ ގިނަ ހަނގުރާމަވެރިންތަކެއް ވަނީ މަރައިލާފައެވެ. އަދި، ސިފައިންގެ އަތްދަށުން ވަގުތު ކޮޅަކަށް އަސްކަރީ މަރުކަޒުގެ ބާރު ގެއްލުނު ނަމަވެސް، އެ ތަން އަލުން ހިފާފައިވާ ކަމުގައި، އަސްކަރިއްޔާއާ ގުޅިފައިވާ ޖަމާޢަތްތަކުން ބުނެއެވެ.
މިއީ، އަލް ޝަބާބް ޖަމާޢަތުގެ ހަނގުރާމަވެރިން މި އަހަރުގެ ތެރޭގައި ދީފައިވާ މި ފަދަ ދެވަނަ ހަމަލާއެވެ. ޖަނަވަރީ 4 ވަނަ ދުވަހު ވެސް އެ ޖަމާޢަތުގެ ހަނގުރާމަވެރިން ވަނީ ކާރުބޮޑުގެ ހަމަލާއެއްދީ، 19 މީހުން މަރައިލާފައެވެ. ދެ ކާރުބޮން ގޮއްވައިލައިގެން ދިން މި ހަމަލާގައި ސިފައިންނާއި ހަނގުރާމަވެރިންގެ އިތުރުން ޢާންމު ރައްޔިތުން ވެސް ހިމެނެއެވެ. އަދި، ގިނަ އަދަދެއްގެ ބަޔަކު ޒަޚަމުވިއެވެ.
ސޮމާލިޔާގެ އަސްކަރިއްޔާއާއި ގުޅިފައިވާ ހަނގުރާމަވެރި ޖަމާޢަތްތައް ގުޅިގެން އަލް ޝަބާބުގެ ހަނގުރާމަވެރިންނާ ދެކޮޅަށް ހުސްވި އަހަރުގެ ތެރޭގައި ވަނީ ކެމްޕޭނެއް ފަށާފައެވެ. އަދި، މި ކެމްޕޭނުގެ ދަށުން ސިފައިން ވަނީ، އަލްޝަބާބް ހަނގުރާމަވެރިން އަތްދަށުގައި އޮތް ސަރަޙައްދުތަކަށް ހަމަލާދެމުންނެވެ. މި ކަމުގެ ރައްދުގައި އެ ޖަމާޢަތުގެ ހަނގުރާމަވެރިން ވެސް ދަނީ ޓެރެރިޒަމްގެ އަމަލުތައް ހިންގަމުންނެވެ.
އަލް ޝަބާބަކީ އަލް ޤައިދާއާ ގުޅުން އޮންނަ ޓެރެރިސްޓު ޖަމާޢަތެކެވެ. ސޮމާލިޔާގެ ސަރުކާރާ ދެކޮޅަށް އަލްޝަބާބް ޖަމާޢަތުން ހަނގުރާމަ ފަށާފައި ވަނީ 2007 ވަނަ އަހަރުއެވެ. އަދި، އެ ޖަމާޢަތުން ވަނީ އެ ޤައުމުގެ ހިރާންއޭ ކިޔާ ސަރަޙައްދުގެ ބޮޑު ސަރަޙައްދެއް އެ ޖަމާޢަތުގެ ބާރުގެ ދަށަށް ގެންގޮސްފައެވެ. ނަމަވެސް، މިދިޔަ އަހަރު ސޮމާލިޔާ ސަރުކާރުން ސިފައިން ވަނީ، އެ ޖަމާޢަތުގެ އަތްދަށުން އެ ސަރަޙައްދު މިނިވަންކޮށްފައެވެ.
ރައީސް ޚަސަން ޝައިޚް މަޙްމޫދުގެ ސަރުކާރުން އަލް ޝަބާބާ ދެކޮޅަށް ހިންގަމުންދާ އަސްކަރީ ކެމްޕޭނުގައި އެމެރިކާގެ އަސްކަރިއްޔާގެ އިތުރުން އެފްރިކާގެ އިއްތިހާދުގެ ސިފައިން ދަނީ ބައިވެރިވަމުންނެވެ. އަދި، އަސްކަރީ ގޮތުން އެހީތެރިކަން ފޯރުކޮށްދެމުންނެވެ. މި ކެމްޕޭންގެ ދަށުން އަލް ޝަބާބްގެ އެތަކެއް ސަތޭކަ ހަނގުރާމަވެރިންނެއް މަރައިލާފައިވާނެ ކަމުގައި މަޙްމޫދުގެ ސަރުކާރުން ބުނެއެވެ.
ނަމަވެސް، އަލް ޝަބާބްގެ ހަނގުރާމަވެރިން ދޭތެރެދޭތެރެއިން ދަނީ ވަރުގަދަ ޓެރެރިސްޓް ހަމަލާތަކެއް ދެމުންނެވެ. މީގެ ތެރޭގައި ވެރިރަށް މޮގަދިޝޫގައި ހުންނަ ސަރުކާރު އޮފީސްތަކާއި ހޮޓާތަކަށް އަމާޒުކޮށް ދީފައިވާ ހަމަލާތައް ފާހަގަކޮށްލެވެއެވެ. އަދި، ސޮމާލިޔާގެ ދާޚިލީ ހަނގުރާމައާއި އެ ޤައުމަށް ކުރިމަތިވެފައިވާ ހަނަފަސްކަމާ ގުޅިގެން ހާލުގައި ޖެހިފައިވާ އެތަކެއް ހާސް ބަޔަކަށް އިންސާނީ އެހީ ފޯރުކޮށްދޭން ކުރަމުންދާ މަސައްކަތްތަކަށް ވެސް އަލް ޝަބާބްގެ ހަނގުރާމަވެރިން ދަނީ ހުރަސް އަޅަމުންނެވެ.
