މޯލްޑިވްސް ކަސްޓަމްސް ސާވިސަސްއާއި ގުޅޭ ގޮތުން ”ސެލްބީ އިންވެސްޓްމެންޓް“ އިން ކޮށްފައިވާ ޕޯސްޓަކީ ހަގީގަތާއި ހިލާފް ވާހަކަތަކެއް އެކުލެވޭ ޕޯސްޓެއްކަމަށް ކަސްޓަމްސްއިން ބުނެފިއެވެ.
ކަސްޓަމްސްއިން ނެރެފައިވާ ބަޔާނުގައި ބުނެފައިވަނީ ސެލްބީ އިންވެސްޓްމެންޓް އިން ކޮށްފައިވާ ޕޯސްޓްގައި ކަސްޓަމްސްގެ އެޗް.އެސް ކޯޑަށް ކުއްލިއަކަށް ބަދަލެއް ގެނެސް ޑިއުޓީ ރޭޓް މަތިކޮށްފައިވާކަމަށް ބުނެފައިވީ ނަމަވެސް އެލްމިނިއަމް ފައްޗަށް 0% އަދި ވިންޑޯ ފްރޭމްއަށް 10% ޖީ.އެސްޓީ ނަގަމުންދަނީ 2020 ވަނަ އަހަރުން ފެށިގެން ކަމަށް ބުނެފައިވެއެވެ.
އަދި ސެލްބީ ކުންފުނިން އެތެރެކުރުމަށް ރާއްޖެއަށް ގެނެސްފައިވާ ޝިޕްމެންޓަށް ހުށަހަޅާފައިވާ ގުޑްސް ޑިކްލެރޭޝަންގައި އެލްމިނިއަމް ފަތިކަމަށް ބަޔާންކޮށްފައި ވީ ނަމަވެސް ހުށަހަޅާފައިވާ ސަޕޯޓިންގް ޑިކްލެރޭޝަންގައި އެ ޝިޕްމެންޓްގައި ހުރީ އެލުމިނިއަމް ޑޯ އަދި ވިންޑޯ ފްރޭމްކަމަށް ބަޔާންކޮށްފައިވާތީ، ޝިޕްމެންޓްގައި ހިމެނެނީ ފަތިތޯ ނުވަތަ ފްރޭމްތޯ ޔަޤީންކޮށް އެޗް.އެސް ކޯޑު އިސްލާހުކުރުމަށް އެކުންފުނީގައި އެދިފައިވާނެކަމަށްވެސް ކަސްޓަމްއިން ނެރެފައިވާ ބަޔާނުގައި ހާމަކޮށްފައިވެއެވެ.
”އަދި މިގޮތަށް ދެންނެވުމުން ކޯޑު އިސްލާހުކޮށް ހުށަހަޅާފައިވަނީ ޑޯ ފްރޭމްގެ ގޮތުގައެވެ. ވުމާއި އެކު ކަސްޓަމްސްގެ މުދަލުގެ ޑިކްލެރޭޝަނުން ނިންމާފައިވަނީ އެކުންފުނީގެ ފަރާތުން ހުށަހަޅާފައިވާ މަޢުލޫމާތުގެ މައްޗަށް ބިނާކޮށެވެ. ދިވެހިރާއްޖޭގެ އެކްސްޕޯޓް އިމްޕޯޓް ޤާނޫނުގައި އެލުމިނިއަމް ވިންޑޯ ފްރޭމް (އެޗް.އެސް ކޯޑު: 7610100014) އަށް ޑީއުޓީގެ ގޮތުގައި 10% ނެގުމަށް ހަމަޖެހިފައިވާއިރު، އެލުމިނިއަމް ފަތި (އެޗް.އެސް ކޯޑު: 7604100012) އަށް ޑިއުޓީގެ ގޮތުގައި ނެގުމަށް ކަނޑައެޅިފައިވަނީ 0% އެވެ. ސެލްބީ އިންވެސްޓްމެންޓްއިން ގެނެސްފައިވާ ޝިޕްމެންޓްއަކީ ކަސްޓަމްސްއިން ބަލައި ފާސްކޮށް ދޫކުރުމުގެ މަރުހަލާ ފުރިހަމަވެފައި ނުވާ ތަކެތިކަމަށް ވާއިރު، މިތަކެތި އަދިވެސް ހުރީ މާލޭ ކޮމާޝަލް ހާބަރުގައި“ ކަމަށް ކަސްޓަމްސްއިން ބުނެފައިވެއެވެ.
އިމްޕޯޓް އެކްސްޕޯޓް މުދާ ކްލިއާރކުރުމުގެ މަސައްކަތް ހިނގާ ގޮތަކީ މުދަލުގެ މަޢުލޫމާތު ހިމެނޭ ގޮތަށް ވެރިފަރާތުން މުދާ ޑިކްލެއާރ ކުރުމުން، ޑިކްލެއާރ ކުރާ ގތަށް ބަލައި ކަނޑައެޅިފައިވާ ޑިއުޓި ރޭޓުން ޑިއުޓީ ދެއްކުމުން މުދާ ދޫކުރެވޭނެއެވެ. އަދި މިގޮތުން މުދާ ދޫކުރުމަށް ބަލައިފާސްކުރާއިރު، ކުރިން ގުޑްސް ޑިކްލެރޭޝަންގައި ބަޔާންކޮށްފައިވާ މަޢުލޫމާތު ފުށުއަރާކަމަށް ވާނަމަ، އެ އަންނަ އުނި/އިތުރާއި އެއްގޮތަށް ޑިކްލެރޭޝަން އިސްލާހުކުރެވޭނެއެވެ. މިގޮތަށް ސެލްބީ އިންވެސްޓްމެންޓްގެ ފަރާތުން ރާއްޖެއަށް ގެނެސްފައިވާ މުދާ ޝިޕްމެންޓް ބަލައިފާސްކޮށް ދޫކުރާއިރު، ޝިޕްމެންޓްގައި ހިމެނެނީ އެލްމިނިއަމް ފަތިކަމަށްވާނަމަ، އެފަރާތުން ޑިއުޓީގެ ގޮތުގައި އިތުރަށް ދައްކާފައިވާ ފައިސާ ރީފަންޑުކުރެވޭނެކަމަށްވެސް ކަސްޓަމްސްއިން ބުނެފައިވެއެވެ.
އެކްސްޕޯޓް އިމްޕޯޓް ޤާނޫނުގައި ބަޔާންކޮށްފައިވާ ޑިއުޓީ ރޭޓްތަކަށް ރިޔާޢަތްކޮށް މުދާ ކްލެސިފައިކުރެވެނީ ދުނިޔޭގެ ކަސްޓަމްސް ޖަމިއްޔާގެ ހާމަނައިޒްޑް ސިސްޓަމްސް (އެޗް.އެސް) ކޮންވެންޝަންގައި ބަޔާންކޮށްފައިވާ ގޮތުގެ މަތިންކަމަށްވާއިރު، މިގޮތުން މުދަލަށް ކަނޑައެޅިފައިވާ ކޯޑަކީ ކުއްލިއަކަށް ބަދަލު އަންނާނެ އެއްޗެއް ނޫނެވެ. ބަދަލެއް ގެނެވުނު ނަމަވެސް އެ ބަދަލެއް މައިގަނޑު ގޮތެއްގައި އަންނާނީ އެކްސްޕޯޓް/އިމްޕޯޓް ޤާނޫނަށް ގެނެވޭ އިސްލާހަކާއި ގުޅިގެނެވެ. މިގޮތުން އެލުމިނިއަމް ފައްޗަށް 0% ވިންޑޯ ފްރޭމްއަށް 10% ނަގަމުން ގެންދަނީ 2020 ވަނަ އަހަރުގެ އެކްސްޕޯޓް/އިމްޕޯޓް ޤާނޫނަށް ގެނެވުނު އިސްލާހަކާއި ގުޅިގެންނެވެ. އެލުމިނިއަމް ފައްޗަކުން 0% ނެގުމަށް ކަނޑައެޅުމުގެ މައިގަނޑު މަޤްސަދަކީ އެލްމެނިއަމް މަސައްކަތް ކުރާ ސިނާއަތުގައި ރާއްޖޭގައި ތަރައްގީކޮށް ކުރިއެރުވުމަށް ކަމުގައި މިފުރުސަތުގައި ދަންނަވާކަމަށް ކަސްޓަމްސްގެ ބަޔާނުގައި ބުނެފައިވެއެވެ.
ސެލްބީ އިންވެސްޓްމަންޓް ފަދަ ރާއްޖޭގައި ދިގު މުއްދަތަކަށް ފުޅާދާއިރާއެއްގައި އިމްޕޯޓްކުރުމުގައި ހަރަކާތްތެރިވާ ކުންފުންޏަކުން ރައްޔިތުންނަށް ހަޤީގަތް އޮޅޭ ގޮތަށް މިފަދަ ބަޔާނެއް ނެރެފައިވާތީ ކަސްޓަމްސްގެ ފަރާތުން އެކަން އެންމެ ހަރުކަށި އިބާރާތުން ކުށްވެރި ކުރާކަމަށް ބުނެފައިވެއެވެ. އަދި ރާއްޖެއަށް އިމްޕޯޓްކުރާ މުދަލިގެ ލިޔެކިޔުންތައް ނިންމުމާއި މުދާ ކްލިއަރކުރުމުގެ އުސޫލު ރަނގަޅަށް އެނގިތިބެ ރައްޔިތުންނަށް އޮޅޭ ގޮތަށް ބަޔާންތައް ނެރެ ތަކެތީގެ އަގު އުފުލުމަށް މަގުފަހިވާގޮތަށް ކުރެވޭ މިފަދަ މަސައްކަތްތައް މިހާރުން މިހާރަށް ހުއްޓާލުމަށްވެސް ކަސްޓަމްސްއިން ވަނީ ސެލްބީ އަށް އިލްތިމާސްކޮށްފައެވެ.
އަދި މިފަދަ އަމްލތައް ހިންގާ ފަރާތްތަކާއި މެދު ޤާނޫނީ ގޮތުން އަޅަންޖެހޭ ފިޔަވަޅުތައް އެއްވެސް ފަސްޖެހުމެއް ނެތި އަޅާނެކަމުގެ ޔަޤީންކަން ދިވެހި އެންމެހާ ލޮބުވެރތި ރައްޔިތުންނަށް އަރުވާކަމަށްވެސް ކަސްޓަމްސްއިން ބުނެފައިވެއެވެ.
