ޓީޖީއެސްޓީގެ ސަބަބުން ރާއްޖޭގެ ފަތުރުވެރިކަމަކަށް ނޭދެވޭ އަސަރެއް ނުކުރާނެކަމަށް ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވެއްޖެއެވެ.
މިއުވާން މިހެން ވިދާޅުވެފައިވަނީ މިއަދު ރައީސް އޮފީހުގައި ކުރިއަށްދިޔަ ނޫސްވެރިންގެ ބައްދަލުވުމުގައި ވާހަކަދައްކަވަމުންނެވެ.
މިއުވާންގެ ވާހަކައިގައި ފަތުރުވެރިކަމުގެ ނެގޭ ޓެކްސް ޓީޖީއެސްޓީ ބޮޑުކުރުމުން ޖުމްލަ ގޮތެއްގައި ރާއްޖޭގެ ފަތުރުވެރިކަމަކަށް މިކަމުގެ ސަބަބުން ނޭދެވޭ އަސަރެއް ނުކުރާނެކަމަށާއި ޓެކްސް ރޭޓަށް ބަދަލު ގެންނަން ޖެހޭކަން އައިއެމްއެފްގެ ރިޕޯޓުން ވެސް އެނގެން އެބައޮތްކަމަށް ވިދާޅުވެ ސަރުކާރުން ފިޔަވަޅުތައް އަޅަނީ އިޤްތިސާދު މެނޭޖްކުރުމަށްކަމަށް ވިދާޅިވިއެވެ.
ސަރުކާރުން ޓެކްސް ބޮޑުކުރީ ކުއްލިޔަކަށް ނޫން ކަމަށާއި ޓެކްސް ބޮޑުކުރީ އިމްޕެކްޓް އެސެސްމަންޓްތަކަކަށްފަހު ކަމަށް މިއުވާން ވިދާޅުވިއެވެ. މިއުވާން ވިދާޅުވީ ކޮވިޑުގެ ހާލަތުން އަރައިގަނެ ރާއްޖޭގެ އިޤްތިސާދު މެނޭޖްކުރުމަށް ފަތުވެރިކަމުގެ ދާއިރާގައި ހަރަކާތްތެރިވާ ފަރާތްތައް އޭރު ދިން އެއްބާރުލުން، މި ދަނޑިވަޅުގައި ރާއްޖޭގެ އިޤްތިޞާދު މެނޭޖްކުރުމަށް ވެސް ބޭނުންވާ ކަމަށެވެ. އަދި އެ އެއްބާރުލުން ހުރިހާ ފަރާތްތަކުން ދިނުމަށް އެދިވަޑައިގެންނެވިއެވެ.
މިއުވާން ވިދާޅުވީ ދައުލަތުގެ ރިޒަރވް ރަނގަޅުކުރުމަށް މިވަގުތަށް އެޅެން ހުރި އެންމެ ރަނގަޅު ފިޔަވަޅަކީ ބޭރު ފައިސާއިން ލިބޭ އާމްދަނީ އިތުރުކޮށް ބޭރު ފައިސާގެ ރިޒަރވް ރަނގަޅުވެގެން ދިއުން ކަމަށެވެ. މި ދަނޑިވަޅުގައި ޓީޖީއެސްޓީ ރޭޓް ބޮޑުކުރުމަކީ ރިޒަރވްއަށް ވެސް އޭގެ ރަނގަޅު ބަދަލުތަކެއް އަންނާނެ ކަމެއް ކަމަށާއި، އަންނަ އަހަރު އެ ބަދަލުތައް ފެނިގެންދާނެ ކަމަށެވެ.
މިއުވާން ވިދާޅުވީ ޖީއެސްޓިއަށް ގެނެވޭ ބަދަލާއެކު އިންފްލޭޝަން 5.5 އިންސައްތައިގައި ހުންނަ އިރު އަވަށްޓެރި އެހެނިހެން ގައުމުތަކާއި އަޅާ ބަލާއިރު ރާއްޖޭގެ އިންފްލޭޝަން ރޭޓު ދަށް ކަމަށެވެ.
ޓެކްސް އަށް ގެނައި އިޞްލާޙުގެ މައިގަނޑު މަޤްޞަދަކީ، ކޮވިޑް-19ގެ ސަބަބުންނާއި ދުނިޔޭގެ ބާޒާރުގައި ތެލުގެ އަގު އުފުލުމާއި ގުޅިގެން ދަޢުލަތުގެ ޚަރަދުތައް މަތިވެ ދަރަނި ބޮޑުވުމާއި ގުޅިގެން ދަރަނި ކުޑަކޮށް ފިސްކަލް ސަސްޓެއިނަބިލިޓީ ކަށަވަރުކުރުމާއި، ޤައުމުގެ ތަރައްޤީއަށްޓަކައި ކުރަންޖެހޭ ޚަރަދުތައްކުރުމަށް ދައުލަތުގެ އާންމްދަނީ އިތުރުކުރުމެވެ.
ޓެކްސް ބޮޑު ކުރުމުގެ ސަބަބުން އަންނަ އަހަރު ފަތުރުވެރިކަމުގެ ދާއިރާގެ އާމްދަނީ ދަށްވާނެ ކަމަށް ބުނެ ދިވެހި ޓްރެވަލް އޭޖެންޓުންގެ ޖަމިއްޔާ (މަޓާޓޯ) އިން ވަނީ ބަޔާނެއް ވެސް ނެރެފައެވެ.
ކުއްލިއަކަށް ޓެކްސް ބޮޑުކުރުމުން، އަންނަ އަހަރުގެ ފުރަތަމަ ކުއާޓަރުގައި ޓޫރިޒަމުން ލިބެން އޮތް އާމްދަނީގެ ތެރެއިން އެކަނިވެސް 50 މިލިއަން ޑޮލަރު މަދުވާނެ ކަމަށާއި ޓެކްސްތައް ބޮޑުކުރުމަށް ސަރުކާރުން ނިންމި ނިންމުން އަލުން މުރާޖައާކުރަންޖެހޭ ކަމަށް އެ ބަޔާނުގައިވެއެވެ.
