ހައިކަލް އުފެއްދި ގޯ ކާޓްގެ ވީލު އިން ދޭހަކޮށްދެނީ އަމިއްލަ އުފެއްދުމެއް ވުޖޫދަށް ނެރެވިދާނެކަން

މިއީ އދ.ދަނގެއްޗައް އުފަން ހައިކަލް ހަސަން އޭނާގެ އަމިއްލަ ވިސްނުމަށް ތައްޔާރުކުރި އެއްގަމު އުޅަނދެކެވެ. ދަނގެތި ސްކޫލްގެ ގްރޭޑް 10 ގައި ތައުލީމް ހާސިލް ކުރަމުންދާ ހައިކަލް ބުނިގޮތުން އޭނާ އެންމެ ކުޑައިރުންސުރެ މިފަދަ މަސައްކަތްތަކަށް ޝައުގުވެރިކަން ހުރެއެވެ. އެއީ ހައިކަލްގެ އާއިލާ އެންމެނަކީ މިފަދަ މަސައްކަތް ކުރާ ބަޔަކަށްވާތީކަމަށް އޭނާ ބުނެއެވެ. ހައިކަލްގެ ބައްޕައަކީ އިންޖިނިއަރެކެވެ. އިންބޯޑް އިންޖީނު ރާއްޖެ އެތެރެކޮށް ވިއްކާވެސް ފަރާތެއްމެއެވެ. ކަފާއަކީވެސް އިންޖީނުގެ މަސައްކަތް ކުރާފަރާތެކެވެ.

ކާފަ އާއި މާމަ ގާތުގައި ދިރިއުޅޭ ހައިކަލް ބުނީ މި ކާރުގެ ޑިޒައިން އެންމެ ވައްތަރު ވަނީ ”ގޯ ކާޓް“ އަކާއި ކަމަށެވެ. ދެމީހަކަށް އެރޭ ގޮތަށް ހަދާފައިވާ މި އުޅަނދު ހެދުމަށް ބޭނުން ކުރީ ފެން ޕަންޕެއްގެ އިންޖީނަކާއި، ބަރޯއެއްގެ ފޮރޮޅަކާއި ނުހެދިފައި ހުރި ސައިކަލެއްގެ ގިއަރު ބޮކްސްއެކެވެ. އަބަދުވެސް އަމިއްލަ އުފެއްދުމެއް ވުޖޫދަށް ނެރެން ބޭނުންވާ ހައިކަލް ހެދި ގޯ ކާޓްގެ ވީލު ހަދާފައިވަނީ ކުޑަކުދިން ދުއްވާ 10 އިންޗި ބައިސްކަލެއްގެ ފުރޮޅެއް ބޭނުންކޮށްގެންނެވެ. ގެގަނޑު ހަދާފައިވަނީ އެސްއެސް ހޮޅިންނެވެ. ކާރުގެ އެހެނިހެން ބައިތައް ހަދާފައިވަނީ ދަނގަޑު ހޮޅި ބޭނުންކޮށްގެންނެވެ.

ގްރޭޑް 10 ގައި ކިޔަވަމުންދާތީ ސީދާ މި އުޅަނދު ހެދުމަށް އޭނާއަށް ގިނަވަގުތު ނުދެވުނުކަމަށާއި، މި މަސައްކަތައް އެކަނި ވަގުތު ހުސްކޮށްގެން ކުރިނަމަ ހަފްތާއެއްހާ ދުވަސްތެރޭގައި މިކަން ނިންމާލެވޭނެކަމަށް ހައިކަލް ބުނެއެވެ.

ހައިކަލް މިކާރު ހެދީ 3 ހަފްތާއިންނެވެ. ފަސް ގިއަރު ހިމެނޭ މި އުޅަނދު ގަޑިއަކު 30 މޭލަށް ދުވާކަމަށް ހައިކަލް ބުންޏެވެ. ހައިކަލް ބުނީ ފަސްވަނަ ގިއަރަށް ލައިގެން ދުއްވާލެވޭވަރުގެ ހަމަހަމަ މަގެއް ދަނގެތީގައި ނެތްކަމަށެވެ.

ސޯޝަލް މީޑިއާގައި ދައުރުވަމުންދާ ހައިކަލްގެ ފޮޓޯތަކާ ވީޑިއޯތަކަށް ތައުރީފްގެ ބަސްތައް ދަނީ އޮހޮރެމުންނެވެ. ހައިކަލް ހެދި މިކާރުން އޭނާގެ ހުނަރު ހުރިކަން ސާބިތުކޮށްދީފިއެވެ. ހައިކަލްގެ އަމާޒަކީ މިއަށްވުރެ ރަނގަޅު އުފެއްދުމެއް ހެދުމެވެ. ހައިކަލް ބުނީ މިފަހަރު ހެދި ކާރުގައި މީޓަރު ނެތަސް ދެން ހަދާ މިފަދަ އުފެއްދުމެއްގައި މީޓަރާ ޝޮކްވެސް ހިމަނައި، މަގުތަކުގައި ދުއްވާ، މުދާ އުފުލޭވަރުވާނެކަމަށެވެ.

އިންޖިއަރިންގެ ދާއިރާއަށް ޝައުގުވެރިކަން އުފެދުނު ގޮތް ކިޔައިދެމުން ހައިކަލް ބުނެފައިވަނީ ކުޑައިރު އޭނާގެ ބައްޕަ އަބަދުވެސް ވޯކްޝޮޕްގައި އިންޖީނެއް ރޫޅައިގެން މަސައްކަތް ކުރާކަމަށާއި، އެތަނަށްގޮސް އުޅޭއިރު އިންޖީނުގެ ބައިތަކާއި ރާވާގޮތާއި، ބޯލްޓާ ނަޓު އެޅުވުން ފަދަ ކަންކަން ކާފަ އާއި ބައްޕަ ކިޔައިދޭކަމަށެވެ. އަމިއްލައަށް ވެލްޑިން ކުރަން އެނގޭ ހައިކަލް ބުނީ ކާރުގެ ކުޑަކުޑަ މަސައްކަތް ފިޔަވައި ހުރިހާ މަސައްކަތެއް ކުރީ އޭނާ އަމިއްލައަށްކަމަށް ބުނެފައިވެއެވެ.