ދުނިޔޭގެ ފުޓްބޯޅައިގެ ބޮޑު ބާރެއްކަމަށްވާ އަދި ކޮންމެ އަހަރަކު ވަރުގަދަ ލީގެއް ބާއްވާ ޖަރުމަން، މި އަހަރުގެ ވޯލްޑް ކަޕުގައި ކުޅުނު ފުރަތަމަ މެޗުގައި ޖަޕާނުން ވަނީ މުޅިދުނިޔެ ހައިރާންކޮށް ޖަރުމަން 2-1 ލަނޑުން ބަލިކޮށްފައެވެ. އެ ބަލީގެ ވޭނާއި ހިތްދަތިކަން އިހުސާސް ކުރަމުން އައި ޖަރުމަނަށް މިރޭ 12.00ގައި ކުރިމަތިލާން ޖެހިފައި ވަނީ ވަރުގަދަ ސްޕޭނާއެވެ.
ހަރަކާތް އަވަސް އަދި ބަހާލައިގެން ބޯޅަ ކުޅޭ ސްޕޭނާ ވާދަކުރުމަކީ ޖަރުމަނަށް ކުރިމަތިލާންޖެހޭ ވަރަށް ބޮޑު އިމްތިހާނެކެވެ. ފުރަތަމަ މެޗުން ޖަޕާން އަތްދަށުވެފައިވާ ޖަރުމަނަށް ކުރިމަތިލާން ޖެހިފައިވާ ސްޕެއިން ޓީމަކީ ފުރަތަމަ މެޗުގައި ކޮސްޓަރިކާ އަތުން 7-0 އިން މޮޅުވެ އިތުބާރާއި ޔަގީންކަން ހޯދާފައިވާ ޓީމެކެވެ.
މިރޭގެ މެޗުން ބަލިވުމަކީ ފޮށިތަންމަތި ބަނދެގެން ރަށަށް ފުރުންކަން ޖަރުމަން ޓީމުގެ ކޮންމެ ކުޅުންތެރިއަކަށް ވެސް އެނގޭނެއެވެ. އަދި ގްރޫޕް ސްޓޭޖުން ކަޓައިގެން މުބާރާތުން ވަކިވާން ޖެހުމަކީ އެޓީމަށް މުޅިން އައު ކަމެއް ވެސް ނޫނެވެ. ވޯލްޑް ކަޕް ފުޓްބޯޅަ މުބާރާތުގެ ޗެމްޕިއަންކަން 2014ގައި ހޯދި ޖަރުމަން 2018ގައި ގްރޫޕް ސްޓޭޖުން ބަލިވެގެން ގައުމަށް އެނބުރި ދާންޖެހުނެވެ.
ޖަރުމަނަށް ކުރިމަތިވެފައިވާ ޕްރެޝަރުގެ އެންމެ ބޮޑު އުދާސް ކުރިމަތިވެފައި ވަނީ ހެޑް ކޯޗު ހަންސީ ފްލިކް އަށެވެ. އޭނާގެ ކޯޗިން ހަޔާތުގައި ކުރަންޖެހިފައި އޮތް އެންމެ ބޮޑު މަސައްކަތަކީ މިރޭ ސްޕޭނުގެ މައްޗަށް ކާމިޔާބު ހޯދުމެވެ. އަދި އޭނާ ގަބޫލުކުރާ ގޮތުގައި އެއީ ކުރެވިދާވަރުގެ ކަމެކެވެ.
”ޓީމަށް އަދި ޓީމުގެ ކޮންމެ ކުޅުންތެރިއަކަށް ވެސް އަބަދުވެސް ކުރިއެރުން ހޯދޭނެ. ޓީމުގައި ފެންވަރު އެބަހުރި. އެފެންވަރު އަދި އެ ހުނަރު ނުދެއްކެނީ.“ ކޯޗު ބުންޏެވެ. ”އަހަރެން ގަބޫލުކުރާ ގޮތުގައި އަހަރުމެންގެ ފެންވަރު ރަނގަޅު. އަހަރެން ޓީމަށް އިތުބާރު ކުރަން.“
ޖަރުމަނަކީ ފުޓްބޯޅައިގެ ކާމިޔާބު ތާރީޚެއް އޮތް އަބަދުވެސް އެންމެ މަތީ ފަންތީގައި ގުނާލެވޭ ގައުމެކެވެ. އެ ގައުމުން ވަނީ 1954، 1974، 1990، އަދި 2014 ވަނަ އަހަރު ވޯލްޑް ކަޕް ކާމިޔާބުކޮށްފައެވެ. އަދި 1966، 1982، 1986 ގެ ފައިނަލްގައި ވެސް ޖަރުމަނު ކުޅެފައި ވެއެވެ.
ކޯޗު ބުނި ގޮތުގައި ސްޕޭނާ ކުރިމަތިލާނީ ރަނގަޅު އަމާޒަކަށް ދަތުރުކުރުމަށެވެ. ރަނގަޅު ނަތީޖާއެއް ހޯދުމަށެވެ. އޭނާ ގަބޫލުކުރާ ގޮތުގައި ޖަރުމަން ޓީމު ރަނގަޅު މިސްރާބަކަށް ގެންދެވޭނެއެވެ.
ތާރީޚަށް ބަލާއިރު ގަބޫލުކުރަންޖެހޭ ހަގީގަތަކީ ވޯލްޑް ކަޕެއްގެ ފުރަތަމަ ދެ މެޗުން ސްޕެއިން މޮޅުވީ އެންމެ ތިން ފަހަރު ކަމެވެ. ނަމަވެސް މި ފަހަރު މުބާރާތުގައި ވާދަކުރަނީ ސްޕެއިންގެ ޒުވާން ޓީމަކަށް ވުމުން އަދި ކޯޗު ލުއިސް އެންރިކޭގެ އިރުޝާދުގެ ދަށުން އިންތިހާއަށް އެއްބައިވަންތަ ގުޅުން ބަދަހި ހުނަރުވެރި ވަރުގަދަ ޓީމެއްގެ ގޮތުގައި ސްޕޭން ފާހަގަވެފައިވެއެވެ.
ސްޕޭނަށް ވޯލްޑް ކަޕް ލިބިފައި ވަނީ 2010ގައި އެކަންޏެވެ. ނަމަވެސް އެގައުމުގެ ފުޓްބޯޅަ ލީގަކީ ދުނިޔޭގެ އެންމެ ވަރުގަދަ އެއް ލީގުކަމަށް ވުމުން ފުޓްބޯޅައިގައި ސްޕޭނަކީ އަބަދުވެސް ދުނިޔޭގެ ނަޒަރު ހުއްޓިފައިވާ ގައުމެކެވެ.
ސްޕޭން-ޖަރުމަން މެޗަކީ ވަރަށް ވާދަވެރި ވަރަށް ފޯރީގަދަ އަދި ކުޅުންތެރީންގެ ބުރަ މަސައްކަތާއި ހިތްވަރު ވަރަށް ބޮޑަށް ފެނިގެން ދާނެ މެޗެކެވެ. މެޗުން ބަލިވެއްޖެނަމަ ޖަރުމަނަށް މުބާރާތުގެ ގަދަ 16 އަށް ދަތުރު ކުރުމުގެ ހުރިހާ ދޮރެއް ބަންދު ވާނެއެވެ. އަދި ސްޕޭންއަށް ގަދަ 16 ޔަގީން ކުރެވޭނީ މެޗުން މޮޅުވުމުންނެވެ.
މެޗުގައި ގިނަ އިރު ބޯޅަ ހިފަހައްޓައި ގިނަ ޕާސް ކުރާނީ ލުއިސް އެންރީކޭގެ ކޯޗުކަމުގެ ދަށުން ކުޅޭ ސްޕޭނެވެ. އަދި މެދުތެރެއިން ހުނަރުވެރި ޒުވާން ޕެޑްރީގެ ޕާސްތައް ދަނޑުގެ އެކި ސަރަހައްދުތަކުގައި އުޅޭ ސްޕޭން ޓީމުގެ ކުޅުންތެރިންނަށް ވަރަށް ފުރިހަމައަށް ލިބެމުން ދާނެ އެވެ. ނަމަވެސް އޭގެ މާނައަކީ މެޗުން މޮޅުވުމުގެ ހުރިހާ ފުރުސަތެއް ޖަރުމަނަށް ގެއްލުމެއް ވެސް ނޫނެވެ.
