ވޯލްޑް ކަޕްގެ ފުރަތަމަ މެޗުގައި ސާބިއާ އަތުން 2-0 އިން ބްރެޒިލް މޮޅުވި މެޗުގައި ބްރެޒިލްގެ ފޯވާޑު ނޭމާގެ ކަނާތު ފައިގެ ކުޑަހުޅަށް ލިބުނު ގެއްލުމަކާ ގުޅިގެން އޭނާއަށް ކުޅެވޭނެ ދުވަހެއް ނޭނގި ދަނޑު ބޭރުގައި ހުންނަން ޖެހިއްޖެއެވެ.
ސްކޭންތަކުން ދައްކާ ގޮތުގައި ނޭމާގެ ކުޑަ ހުޅުގެ މަސްގަނޑަށާއި ކަށިގަނޑަށް ވަނީ އަނިޔާ ވެފައެވެ. އަދި ގްރޫޕް ސްޓޭޖުގައި ބްރެޒިލް, ސްވިޒަލޭންޑާއި ކެމަރޫންއާ ދެކޮޅަށް ކުޅޭ މެޗުގައި ނޭމާއަށް ނުކުޅެވޭނެކަން ވަނީ ޔަގީން ވެފައެވެ.
ނޭމާއަށް އަނިޔާވީ ސާބިއާގެ ނިކޮލާ މިލެންކޮވިޗް ނޭމާގެ ކަނައަތު ފައިގެ ކުޑަހުޅަށް މެޗުގެ 79 ވަނަ މިނިޓުގައި ދިން ވަރުގަދަ ހަމަލާއަކާ ގުޅިގެންނެވެ. ބްރެޒިލް ޓީމުގެ ސިއްހީ ޓީމުން ހާމަކުރިގޮތުގައި އޭނާގެ ކުޑަ ހުޅުގެ މަސްގަނޑަށާއި ކަށިގަނޑަށް ވަނީ ވަރަށް ބޮޑަށް އަނިޔާވެ ތަދުވެފައެވެ. ނޭމާގެ ފަޔަށް ދިން ހަމަލާއާ ގުޅިގެން އޭނާގެ ކުޑަހުޅު ވަރަށް ބޮޑަށް ދުޅަވެފައިވާ މަންޒަރު ދައްކައިދޭ ފޮޓޯތަކެއް ފަހުން ވަނީ އާއްމުވެފައެވެ. ނޭމާއަށް އަނިޔާވެގެން ދަނޑުން ބޭލުމުގެ ކުރިން އޭނާގެ ފަޔަށް ނުވަ ފަހަރު އިދިކޮޅު ޓީމުގެ ކުޅުންތެރިން ހަމަލާ ދީފައިވެއެވެ. ޤަޠަރު ވޯލްޑް ކަޕްގައި ނޭމާއަށް ހަމަލާދިން ވަރަށް އަދި އެހެން ކުޅުންތެރިއަކަށް ހަމަލާ ދީފައެއް ނުވެއެވެ. ނޭމާގެ ކުޅުން ހުއްޓުވުމަށް އިދިކޮޅު ކުޅުންތެރީންނަށް ޖެހެނީ ނޭމާ ކަނޑާ ވައްޓާލާށެވެ.
މެޗު ނިމެން ދިހަ މިނެޓަށް ވެފައިވަނިކޮށް ނޭމާ ދަނޑުން ބޭލުމުގެ ކުރިން އޭނާއަށް ދަނޑު މަތީގައި އެތައް ފަރުވާއެއް ދިނެވެ. ނަމަވެސް ކުޅުން އިތުރަށް ކުރިއަށް ގެންދެވޭވަރު ނުވެގެން އޭނާ ޖެހުނީ ބާލާށެވެ.
ބްރެޒިލް ވޯލްޑް ކަޕްގައި ކުޅެން ޖެހޭ ދެވަނަ އަދި ތިންވަނަ މެޗުގައި ނޭމާއަށް ނުކުޅެވޭނެ ކަމަށާއި ނަމަވެސް ފައިގެ ކުޑަހުޅަށް ލިބުނު އަނިޔާއަށް ފަރުވާ ދިނުމުގައި އޭނާ ސްކޮޑުގައި ދެމިހުންނާނެ ކަމަށް ޓީމުގެ ޑޮކްޓަރު ހުކުރު ދުވަހު ބުނެފައިވެއެވެ.
އަނިޔާވެ މެޗުން ވަކިވާން ޖެހުނަސް ނޭމާ ވަނީ ޓީމު ހޯދި ކާމިޔާބީއާ މެދު ފަޚުރުވެރި ވެފައެވެ.
”ސާބަސް ޓީމު!“ އޭނާ ބުނެފައި ވެއެވެ.
ނޭމާ ބުނި ގޮތުގައި އުނދަގުލުން ނަމަވެސް މެޗުން މޮޅުވީތީ އުފާކުރަން ޖެހެއެވެ.
”ފުރަތަމަ ފިޔަވަޅު ކާމިޔާބު. އިތުރު ހަ ފިޔަވަޅަށް ދާން ޖެހޭ.“ އޭނާ ބުނެފައިވެއެވެ.
ސާބިއާ މެޗުގައި ބްރެޒިލްއިން ދެއްކީ ނޭމާ ކުޅުނަސް، ނުކުޅުނަސް ތަށި ހޯދުމުގެ ފެންވަރު ޓީމުގައި އެބަ ހުރިކަމެވެ. އަދި ވޯލްޑް ކަޕް 2022 ގައި ޤަޠަރުގައި ވެރިކަން ކުރަނީ ބްރެޒިލް ކަމެވެ. ވާގޮތެއް ބަލަން އިންތިޒާރު ކުރަމާ ހިނގާށެވެ!
ބައެއް ޓީމުތަކުން ނޭމާއަށް އަނިޔާވާން އެދުނަސް ފުޓްބޯޅައަށް ލޯބިކުރާ އެތައް މިލިއަން ބަޔަކު ބޭނުން ވަނީ ދަނޑުމަތީގައި ނޭމާ ޖާދޫ ހަދާތަން ދެކޭށެވެ. އެ މީހުން ގަބޫލު ކުރަނީ ނޭމާއަށް ލިބުނީ މާ ސީރިއަސް އަނިޔާއެއް ނޫންކަމަށެވެ. ޚާއްސަކޮށް ފުރަތަމަ މެޗުގައި ނޭމާ ދެއްކި ކުޅުން ތަމްސީލުކޮށްދޭނެ އެހެން ކުޅުންތެރިއަކު ނެތިއްޔާ މެޗަކަށްފަހު މެޗެއް ބެލުމުގެ އޮތީ ކޮން އުފަލެއް ހެއްޔެވެ؟
