ޗާގޮސް މައްސަލައިގެ މަޢުލޫމާތު ރައްޔިތުންގެ މަޖިލީހާއި ހިއްސާކުރެއްވިކަމަށް ބަންޑާރަ ނައިބު ދައްކަވާ ވާހަކަ މަޖިލީހުގެ އިދާރާއިން ދޮގުކޮށްފިއެވެ.
ރައްޔިތުންގެ މަޖިލީހުން ނެރެފައިވާ ބަޔާނެއްގައި އެ އިދާރާއިން ބުނެފައިވަނީ، ރޭ ރައީސުލް ޖުމްހޫރިއްޔާގެ އޮފީހުން ބޭއްވެވި ނޫސްވެރިންގެ ބައްދަލުވުމުގައި 23 އޮގަސްޓް 2019 ގައި މޮރިޝަސްގެ ފަރާތުން ދިވެހިރާއްޖެއާއި ޗާގޮސްއާއި ދެމެދު އޮތް ކަނޑުގެ ސަރަޚައްދުގެ ތެރެއިން ފުށުއަރާ ސަރަޙައްދާއި ގުޅޭ ގޮތުން އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދ ސީއަށް ޔުނައިޓެޑް ނޭޝަންސް ކޮންވެންޝަން އޮން ދަ ލޯ އޮފް ދަ ސީގެ ދަށުން ހުށަހަޅާފައިވާ މައްސަލައާއި ގުޅޭ މަޢުލޫމާތު ރައްޔިތުންގެ މަޖުލީހާއި ހިއްސާކުރައްވާފައިވާނެކަމަށް އެޓާރނީ ޖެނެރަލް އަލްއުސްތާޛް އިބްރާހިމް އިފްޢަތް ވިދާޅުވެފައިވީ ނަމަވެސް މަޖިލީހާއި އެކަން ހިއްސާކޮށްފައިވާ ނުވާކަމަށެވެ.
އަދި ޗާގިސްގެ މައްސަލައިގައި މޮރިޝަސްގެ ބޮޑު ވަޒީރަށް ރައީސުލްޖުމްހޫރިއްޔާ ފޮނުއްވިކަމަށް ޚަބަރު ލިބޭ ސިޓީއާއި ޗާގޮސް މޮރީޝަސްއާއި ހަވާލުކުރުމަށް ގޮވާލާ ޤަރާރަށް އދ.ގެ ޖެނެރަލް އެސެމްބްލީގައި ދިވެހިރާއްޖެއިން މިހާތަނަށް ނަގަމުން އައި ސްޓޭންޑް ބަދަލުކޮށްފައިވާކަންވެސް ރައްޔިތުންގެ މަޖިލީހާއި މިހާތަނަށް ޙިއްސާކޮށްފައި ނުވާކަމަށް މަޖިލީހުގެ އިދާރާއިން ނެރެފައިވާ ބަޔާނުގައި ބަޔާންކޮށްފައިވެއެވެ.
ޗާގޮސްގެ މައްޗަށް އޮތް މޮރިޝަސްގެ ސިޔާދަތީ ބާރާއި ބެހޭގޮތުން އިންޓަނޭޝަނަލް ކޮޓް އޮފް ޖަސްޓިސް (އައި.ސީ.ޖޭ)އިން 2019ގައި ނިންމި ނިންމުމުގައު އިނގިރޭސިވިލާތުން އެތަން މިރިޝަސްއާއި ހަވާލުކުރަންޖެގޭކަމަށް ނިންމި ނިންމުމާއި ގުޅުވައިގެން އދ.ގެ ޖެނެރަލް އެސެމްބްލީގައި ދޭ ވޯޓުގައި ކުރީ ފަހަރުތަކުގައި ދިވެހިރާއްޖެއިން ޢަމަލުކޮށްފައިވާ ގޮތާއު ޚިލާފަށް ދިވެހިރާއްޖެއިންވެސް މޮރިޝަސްއާއި އެއްކޮޅަށް ވޯޓުލާން ނިންމައި، އެކަން ރައީސުލްޖުމްހޫރިއްޔާގެ ސިޓީފުޅަކުން މޮރިޝަސްގެ ބޮޑު ވަޒީރަށް އަންގަވާފައިވާކަން ޓްރައިބިއުނަލްގައި ހިނގަމުންދާ މައްސަލައިގައި އެޓާރނީ ޖެނެރަލް ފާހަގަކުރައްވާފައިވާއިރު، ޗާގިސްގެ މައްޗަށް އޮތް މޮރިޝަސްގެ ސިޔާތަދީ ބާރާ ބެހޭ ގޮތުން އައި.ސީ.ޖޭއިން ނިންމި ނިންމުން ތަންފީޒުކޮށް ޗާގޮސް މޮރިޝަސްއާއި ހަވާލުކުރުމަށް ގިވާލާ ޤަރާރަށް އދ.ގެ ޖެނެރަލް އެސެމްބްލީގައި ދިވެހިރާއްޖެއިން ތާއިދުކޮށް ވޯޓުލާން ނިންމާފައިވާކަންވެސް އަދި އެގިތަށް ވޯޓުލާން ނިންމި ސަބަބެއްވެސް އަދި އެގޮތަށް ވޯޓުލާން ނިންމާފައިވާކަން ރައީސުލްޖުމްހޫރިޔާގެ ސިޓީފުޅަކުން މިރިޝަސްގެ ބޮޑު ވަޒީރަށް އަންގަވާފައިވާކަމެއްވެސް މިހާތަނަށް ރައްޔިތުންގެ މަޖިލީހާއި ޙިއްސާކުރައްވާފައި ނުވާ ކަމަށް މިޖިލީހުގެ ބަޔާނުގައި ބުނެފައިވެއެވެ.
ނަމަވެސް ފޯޅަވަހީގެ މައްޗަށް އިންގިރޭސީންގެ ސިޔާދަތީ ބާރު ނެތްކަމަށް ކަނޑައަޅުއްވާފައިވާކަމަށް ޚަބަރުތަކުން އިވިފައިވާކަމަށާއި، ސަރުކާރުން މިކަމުގައި ނަގަމުން އައި ސްޓޭންޑް ބަދަލް ވެފައިވާކަމަށް ދެކެވެމުން އަންނަ ވާކަތާކައި ގުޅިގެން މިއީ ދިވެހި ދައުލަތުގެ ސިޔާދަތާއި ގުޅުން ހުރި ކަމެއްކަމަށް ބަޔާންކޮށް އަމިއްލަ ފަރާތަކުން ރައްޔިތުންގެ މަޖިލީހުގެ އިދާރާއަށް ފޮނުވި ސިޓީއަކާއި ގުޅިގެން އެމައްސަލަ ދިރާސާކުރުމަށްޓަކައި އެޓާރނީ ޖެނެރަލްގެ އޮފީހަށް ފޮނުވާފައިވާނެކަމަށް މަޖިލީހުގެ އިދާރާއިން ހާމަކޮށްފައިވެއެވެ.
ރައްޔިތުންގެ މަޖިލީހާއި ބެހޭ ގޮތުން އޮޅުން އަރާފަދަ މަޢުލޫމާތުތައް އެއްވެސް ފަރާތަކުން ނުފެތުރުމަށްވެސް މަޖިލީހުން ވަނީ ގޮވާލާފައެވެ.
