އިކޮނޮމިކް މިނިސްޓްރީއާއި އިސްލާމިކް މިނިސްޓްރީ ގުޅިގެން ހިންގާ ޒަކާތު ނަފާ ޕްރޮގްރާމްގެ ފުރަތަމަ ފިޔަވައްސާއެކު 96 ރަށަކުން ފަގީރުކަން ނައްތާލެވޭނެކަމަށް އިކޮނޮމިކް މިނިސްޓަރ ފައްޔާޒު އިސްމާއިލް ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ޒަކާތު ނަފާ ޕްރޮގްރާމް ޓްރައި ޕާޓީ ފަހުމުނަމާގައި ސޮއިކުރެއްވުމާއި މި ޕްރޮގްރާމާ ގުޅޭ މައުލޫމާތު ނޫސްވެރިންނަށް ދެއްވުމަށް މިއަދު ބޭއްވި ބައްދަލުކުރެއްވުމުގައެވެ.
އިކޮނޮމިކް މިނިސްޓަރ ފައްޔާޒު އިސްމާއިލް ވިދާޅުވީ ޒަކާތު ނަފާ ޕްރޮގްރާމް ފެށުމަށް އިކޮނޮމިކް މިނިސްޓްރީއާއި އިސްލާމިކް މިނިސްޓްރީ ގުޅިގެން މަސައްކަތްކުރާތާ މިހާރު އަހަރަކަށްވުރެ ގިނަ ދުވަސްވެއްޖެކަމަށެވެ. އަދި މިކަމުގައި ވިސްނުން ބެހެއްޓީ ޒަކާތު ފަންޑުގެ ފައިސާ ފަގީރުންނަށް ދިނުމުގައި މިހާރަށްވުރެ ބިނާކުރަނިވި ގޮތަކަށް މިކަން ކުރުމަށްކަމަށްވެސް މިނިސްޓަރ ވިދާޅުވިއެވެ.
”ފައްޔާޒު ވިދާޅުވީ މިކަމުގައި އެންމެ ބޮޑަށް ބެލީ ރާއްޖޭގައި އޮތް ފަގީރުންގެ ލިސްޓުން މީހުން މަދުކުރެވޭނެ ގޮތެއް ހޯދުމަށްކަމަށެވެ. ދެ މިނިސްޓްރީއާއި، އިކޮނޮމިކް މިނިސްޓްރީގެ ދަށުން ހިނގާ އެގްރޯނެޓްގެ ޓީމާއި ބީސީސީއާއި، އެހެނިހެން ކުންފުނިތަކާއި އެއްކޮށް މަސައްކަތްކުރަމުން މިދިޔައީ ދިވެހިރާއްޖޭގައި ފަގީރުންގެ އެ ލިސްޓު އެއްކޮށް ހުސްކޮށްލެވޭނެ ގޮތަކީ ކޮބައިތޯ؟ ފަގީރުން ރާއްޖޭގައި ނުތިބޭނެ ގޮތެއް ހޯދުމަކީ އަޅުގަނޑުމެންގެ އަމާޒަކީ. އެހެންވީމަ އެކަމުގައި ދައުލަތަށް ކީއްތޯ ކުރެވޭނީ އަދި ޒަކާތު ފައިސާ އެކަން ހާސިލުކުރަން ބޭނުންކުރާނީ ކިހިނެތްތޯ“ ފައްޔާޒު ވިދާޅުވިއެވެ.
ފައްޔާޒު ވިދާޅުވީ ރަށްރަށުގައި ތިބި ފަގީރުންނަށް އެހީތެރިވެދީ، އެމީހުން އަމިއްލަ ފައި މައްޗަށް ތެދުވާން އެހީތެރިވުމަށް ކުރެވޭނެ ކަންކަމާއި ގުޅޭގޮތުން ކައުންސިލްތަކާއިވެސް މަޝްވަރާކުރެއްވިކަމަށެވެ. އަދި ސަރުކާރުގެ މައިގަނޑު ބޭނުމަކީ ފައިސާއެއް ދީފައި އެހާހިސާބުން ދޫކޮށްލުން ނޫންކަމަށާއި ފައިސާ ދީފައި އޭގެ އަސްލު ބޭނުމާއި ހަމައަށް ދެވެންދެން އެކަމުގައި ސަރުކާރުން އެހީތެރިވެދޭނޭކަމަށެވެ.
ފައްޔާޒު ވިދާޅުވީ ފަގީރުކަމަކީ އިޖްތިމާއީ ގިނަ މައްސަލަތަކަކާއި ގުޅިފައިވާކަމެއްކަމަށެވެ. އަދި ފަގީރުކަން ނައްތާލެވެނީ އިޤްތިޞާދީގޮތުން ފުދުންތެރިކަން އައިސްގެންކަމަށްވެސް އެމަނިކުފާނު ވިދާޅުވިއެވެ.
”އަޅުގަނޑުމެން ކަނޑައެޅި 10 ގޭބީސީއަށްވުރެ އިތުރުނުވާ ގޮތަށް ހުރި ރަށްރަށް ފާހަގަކޮށް މި ޕްރޮގްރާމް ފަށަން. އޭރުން 96 ރަށެއް އެބަ ކަވަރކުރެވޭ. އަމާޒަކީ ފުރަތަމަ ފިޔަވަހީގައި މި 96 ރަށަށް އަމާޒުކޮށްގެން މި ޕްރޮގްރާމް ހިންގާ ނިމޭއިރު 96 ރަށުގައި ފަގީރުންނެއް ނުތިބޭނެ. ދެވަނަ ފިޔަވަހީގައި 46 ރަށަކަށް އަމާޒުކުރާނެ. މައިގަނޑު ބޭނުމަކީ އެފަދަ ފަރާތްތަކަށް ދައުލަތުގެ ހުރިހާ ވަސީލަތްތަކެއް ބޭނުންކޮށްގެން ފަގީރުން އެ ހާލަތުން އެހެން ހާލަތަކަށް ގެންދިއުން“ ފައްޔާޒު ވިދާޅުވިއެވެ.
ފައްޔާޒު ވިދާޅުވީ ޒަކާތު ނަފާ ޕްރޮގްރާމަކީ އިސްލާމިކް މިނިސްޓްރީއާއި އިކޮނޮމިކް މިނިސްޓްރީ ގުޅިގެން ވަރަށް ބުރަކޮށް ކުރި މަސައްކަތަކުން ޤާއިމްކުރެވުނު ޕްރޮގްރާމެއްކަމަށާއި އަމާޒަކީ ވީހާވެސް އަވަހަށް މިކަން ފެށި، މިކަމުގެ ފައިދާކުރުންކަމަށެވެ. އަދި މި ޕްރޮގްރާމްގެ ތެރެއިން ހާލަތު ރަނގަޅު ހިސާބަކަށްދާ ފަރާތްތަކަށް ސަރުކާރުން ވިޔަފާރިވެރިންނަށް ހިންގާ ސްކީމެއްގެ ތެރެއިން އިތުރަށް ވިޔަފާރީގެ ދާއިރާއިން ކުރިއަށްދިއުމަށް އެހީތެރިވެދޭނެކަމަށްވެސް ފައްޔާޒު ވިދާޅުވިއެވެ.
