ހިމޭން މެންދަމަކުން ނާމާން ފަތިހަކަށް

ގަޑިން ފަތިހު 4:36 ހާއިރެވެ. ފަތިސް ނަމާދަށް ބަންގި ގޮވަނީއެވެ. ބަންގީގެ އަޑު ޖަހަމުންދިޔަ އޭކޭ 47 އާއި ޖީ 3 އާއި އަދިވެސް އެފަދަ ބަޑިތަކުގެ އަޑު ފޫއަޅުވައިލިއެވެ. އިސްލާމީ މަރުކަޒުން ގޮވަމުންދިޔަ ބަންގީގެ އަޑު ނުނިމެނީސް ބަންގީގެ އަޑު ކެނޑިއްޖެއެވެ. އަނެއްކާ ވެސް ކުރިން އިވެމުންދިޔަ ބަޑީގެ އަޑުފައްގަނޑު މާލޭގެ ޖައްވުގައި ގުގުމައިލިއެވެ.

މި ދައްކަނީ ގަދަ ނޫކުލައިގެ އިންޑިއާ ކަނޑުގައިވާ ފެހިކުލައިގެ ކުދި ޖަޒީރާތަކުގެ އަހުލުވެރިން ފަހުގެ ތާރީޚެއްގައި ބިރުން ފިތްކަނޑައިގެން ދިޔަ ދުވަހުގެ ވާހަކައެވެ. އަމާންކަމާއެކު ނިދާފައި ތިބި ރައްޔިތުންނަށް ކުރިމަތިވި ނާމާން ފަތިހުގެ ވާހަކައެވެ. ފަހުގެ ތާރީޚެއްގައި ރާއްޖެއަށް އެންމެ ނުރައްކާތެރި ޢުދުވާނީ ޙަމަލާގެ ވާހަކައެވެ. ނުވަތަ ބަޑިބުރާސްފަތީގެ ވާހަކައެވެ. އާދެ 1988 ނޮވެމްބަރު ތިންވަނަ ދުވަހުގެ ވާހަކައެވެ.

އެ ދުވަހަކީ ދިވެހިރާއްޖޭގެ މިނިވަންކަން ނިގުޅައިގަނެ، މި ލޮބުވެތި ވަޠަނަށް އަރައިގަންނަން ބަޔަކު ކުރި ވިޔާނުދާ އަމަލެއްގައި ކުށެއްނެތް ދިވެހި ދަރީންތަކަކާއި، ހިތްވަރުގަދަ ސިފައިންތަކެއް ޝަހީދުވެގެން ދިޔަ ”ކަޅު“ ދުވަހެކެވެ.

ދިވެހިރާއްޖެއަށް ޚިޔާނާތްތެރި ޚާއިނުންތަކެއް އަވަށްޓެރި ސްރީލަންކާގެ ތަމަޅަ ބާޣީ ގުރޫޕެއް ކަމަށްވާ ”ޕްލޯޓް” ގެ އެހީގައި ރާއްޖޭގެ ވެރިރަށް މާލެއަށް އަރައި ދިވެހިންގެ މިނިވަންކަން ނަގައިލުމަށް މަސައްކަތް ކުރިއެވެ. ނަމަވެސް އެ މީހުންގެ ރޭވުން ”ފެއިލް“ ކޮށްލީ ”އަށްޑަނައަކަށް މަގޭ މޭ“ ހަދާނަމޭ ބުނެ ގައުމު ދިފާއު ކުރުމަށް ނުކުތް ސިފައިންގެ ހިތްވަރުގަދަ ބަތަލުންނެވެ. ފަސްޖެހުމެއް ނެތި ބާޣީންނާއި ޖިހާދު ކުރުމަށް ދިވެހިންގެ ތެރެއިން ހިތްވަރުގަދަ ސިފައިންތަކެއް ނުކުމެ ގައުމު ސަލާމްތަކޮށްދިން އިރު ދިވެހިންގެ ލޯތަށް ވަނީ ކަރުނުން ތެންމައިލާފައެވެ. އެހެނީ އެއްވެސް ކުށެއް ނެތް ސިފައިންގެ އަށް ބޭކަލުން ހިމެނޭހެން 19 ދިވެއްސެއްގެ ލެއިން މާލޭގެ މަގުތަށް ފާއްދައިލުމުންނެވެ.

ނޮވެމްބަރު ތިނެއްގައި ސިފައިން ވެދެއްވި މަތިވެރި ގުރުބާނީއާއި ހިތްވަރުން އަދި ދިވެހި ރައްޔިތުން އެ ދުވަހު ދައްކަވައިދެއްވި އެކުވެރިކަމާއި އެއްބައިވަންތަކަމުގެ ސަބަބުން ދިވެހިންނަށް މިއަދު ވަނީ ނަޞްރު ލިބިފައެވެ. މިއަދު ދިވެހިން ދެކެމުން މިދާ މިނިވަންކަމުގެ ހަޤީޤީ އަސްލަކީ މިގައުމަށްޓަކައި ޝަހީދުވި ޝަހީދުންނެވެ. ނަޞްރުގެ ދުވަހުގެ ގޮތުގައި ނޮވެންބަރު މަހުގެ ތިންވަނަ ދުވަސް ފާހަގަކުރުމުގެ އަސްލަކީ ވެސް އެއީއެވެ.
މިއަދު އެ ބިރުވެރި އަދި ލޭއޮހޮރުވުން ބޮޑު ހަމަލާގެ ހަނދާންތައް ގިނަ ބަޔަކު ނެތަސް 1988 ވަނަ އަހަރުގެ ނޮވެމްބަރު 3 އަކީ ރާއްޖޭގެ މިފަހުގެ ތާރީޚުގައި ސިފައިން ކުރި އެންމެ ބޮޑު ޖިހާދެވެ.

އެއީ އެއްވެސް މީހަކަށް، އެއްވެސް ސުވާލެއް އުފެއްދެން ނެތްހާ ސާފުކޮށް އޮތް ކަމެކެވެ.

އެ ދުވަހު ދިވެހި ސިފައިން ކުރި ހިތްވަރުގެ އަގުވަޒަންކުރަން، މިހާރުގެ ސިޔާސީ ޚިޔާލު ތަފާތުވުމުގައި ބައެއް މީހުން ބޭނުން ނުވިޔަސް އެ ޖިހާދާ މެދު، ދިވެހިން އިއްޔެ ވެސް، މިއަދު ވެސް އަދި މާދަމާ ވެސް ފަޚުރުވެރިވާން ޖެހޭނެ އެވެ. އެ ދުވަސް ދުށް ދިވެހިން އޭރު އޮއްސައިލި ގައުމީ ރޫހާއި އެއްބައިވަންތަކަމާއި ހަމަލާގައި ބައިވެރިވި މީހުން ދެކެ އައި ރުޅިވެރިކަން ތާރީޚުގައި ލިއެފައިވެއެވެ.

ބޭރު ގައުމުތަކުގެ އަތްދަށަށް މި ގައުމު ނުގޮސް މިނިވަންކަން މަތީ ދެމިއޮތުމަށާއި އިސްލާމްދީން ހިމާޔަތްކުރުމަށް މަސައްކަތްކުރުމަކީ އަޅުގަނޑުމެން އެންމެންގެ ޒިންމާއެކެވެ. މި ލޮބުވެތި ވަޠަން މިނިވަންކަންމަތީ އަބަދަށް ދަމަހައްޓަވާންދޭވެ!