ގއ. މާމެންދޫއާއި ނިލަންދޫ ހެލްތު ސެންޓަރުގެ އެކްސްޓެންޝަން މަސައްކަތްތައް އަންނަ އަހަރު ކުރީކޮޅަށް ނިންމުމަށް މަސައްކަތް ކުރަމުންދާކަމަށް ހެލްތު މިނިސްޓަރ އަޙްމަދު ނަސީމް ވިދާޅުވެއްޖެއެވެ.
ހެލްތު މިނިސްޓަރ މިހެން ވިދާޅުވީ، މި ދެ ރަށުގެ ހެލްތު ސެންޓަރުގެ އެކްސްޓެންޝަނާއި ލެބޯރަޓަރީގެ މަސައްކަތްތައް ހުއްޓިފައި ހުންނަތާ ގިނަ ދުވަސްތަކެއްވެފައިވާތީ، އެ މަސައްކަތްތައް އަލުން ފެށޭނެ ތާރީޚެއް އޮޅުންފިލުވުމަށް ރައްޔިތުންގެ މަޖިލީހުގެ ދާންދޫ ދާއިރާގެ މެންބަރު ޔަޢުޤޫބު ކުރެއްވި ސުވާލަށް ޖަވާބު ދެއްވަމުންނެވެ.
ރައްޔިތުންގެ މަޖިލީހުގައި ވާހަކަފުޅުދައްކަވަމުން ހެލްތު މިނިސްޓަރ އަޙްމަދު ނަސީމް ވިދާޅުވީ، ގއ. މާމެންދޫ ހެލްތު ސެންޓަރުގެ އެކްސްޓެންޝަން އިމާރާތަކީ ލާމަރުކަޒީ ޤާނޫނުގެ ދަށުން ކައުންސިލާ ޙަވާލުކޮށްގެން ކުރިއަށްގެންދެވުނު ޕްރޮޖެކްޓެއްކަމަށެވެ. ނަމަވެސް އެ ޕްރޮޖެކްޓް ނުނިމި ގިނަ ދުވަސްވުމުގެ ސަބަބުން އެ ކޮންޓްރެކްޓް ބާޠިލުކޮށް، އެހެން ބަޔަކާ މިހާރު މަސައްކަތް ޙަވާލުކޮށްފައިވާކަމަށެވެ. އަދި އެ މަސައްކަތް އަންނައަހަރުގެ ފެބްރުއަރީއަށް ނިންމާލެވޭނެކަމަށް މިނިސްޓަރ ވިދާޅުވިއެވެ.
”މާމެންދޫ ހެލްތު ސެންޓަރުގެ އެކްސްޓެންޝަން އިމާރާތުގެ ނުނިމިހުރި މަސައްކަތްތައް ކުރުމާ ލެބޯޓްރީ ޤާއިމުކުރުމަށް އަޅަންޖެހޭ އިމާރާތް އެޅުމަށް ކޮންޓްރެކްޓަރަކާ ޙަވާލުކުރެވި މި ދެ ޕްރޮޖެކްޓުގެ މަސައްކަތް އަންނަ އަހަރުގެ ފެބްރުއަރީއަށް ނިންމާލެވޭނެކަމަށް އަޅުގަނޑުމެންނަށް ލަފާކުރެވެނީ“ ހެލްތު މިނިސްޓަރ ނަސީމް ވިދާޅުވިއެވެ.
ހެލްތު މިނިސްޓަރ ނަސީމް ވިދާޅުވީ، ގއ. ނިލަންދޫ ހެލްތު ސެންޓަރުގެ މަސައްކަތަކީވެސް ކައުންސިލާ ޙަވާލުކޮށްގެން ކުރިއަށްގެންދިޔަ ޕްރޮޖެކްޓެއްކަމަށާއި، އެ ޕްރޮޖެކްޓުވެސް ނުނިމި ދިގުލައިގެން ދިއުމުގެ ސަބަބުން ކޮންޓްރެކްޓް ބާޠިލުކޮށް، ނުނިމިހުރި މަސައްކަތްތައް ބަޔަކާ ޙަވާލުކުރުމުގެ މަސައްކަތް ކުރަމުންދާކަމަށެވެ. މިނިސްޓަރ ވިދާޅުވީ، އަންނަ އޭޕްރީލްމަހަށް މި މަސައްކަތް ނިންމާލުމަކީ އަމާޒެއްކަމަށެވެ.
”ނިލަންދޫ ހެލްތު ސެންޓަރުގެ އެކްސްޓެންޝަން އިމާރާތުގެ ނުނިމިހުރި މަސައްކަތް ކުރުމާއި ލެބޯޓްރީ ޤާއިމުކުރުމަށް އަޅަންޖެހޭ އިމާރާތް އެޅުމަށް ދެ ފަހަރު އިޢުލާންކުރުމުންވެސް ހުށަހަޅާފައިވާ ބިޑްތައް މާ ބޮޑަށް އަގުބޮޑުކަމަށްވާތީ އަލުން އިޢުލާން ކުރުމަށް ވަނީ ހަމަޖެހިފައި. މި ޕްރޮޖެކްޓުގެ މަސައްކަތް އަންނަ އަހަރުގެ އޭޕްރީލްމަހަށް ނިންމާލެވޭނެކަމަށް އަޅުގަނޑުމެން އުއްމީދުކޮށްގެން މި ހުންނަނީ. އިރާދަކުރެއްވިއްޔާ އެ ޓާގެޓަށް އަޅުގަނޑުމެން މަސައްކަތް ކޮށްދޭނަން“ ހެލްތު މިނިސްޓަރ ވިދާޅުވިއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ބައެއް މެންބަރުން ކުރެއްވި ސުވާލުތަކަށް ޖަވާބުދެއްވަމުން ހެލްތު މިނިސްޓަރ ނަސީމް ވިދާޅުވީ، ކުދި ރަށްރަށުގައި ބޭނުންކުރުމަށް ބަގީ އެމްބިއުލާންސްތަކެއް ހޯދުމުގެ މަސައްކަތް ކުރަމުންދާކަމަށެވެ. އެގޮތުން ފިނޭންސް މިނިސްޓްރީ މެދުވެރިކޮށް ޗައިނާގެ ޕާޓީއަކާ އެކަމާގުޅޭގޮތުން މަޝްވަރާތައް ކުރަމުންދާކަމަށް މިނިސްޓަރ ވިދާޅުވިއެވެ. ނަމަވެސް މިކަމުގެ މާބޮޑު ތަފްޞީލެއް މިނިސްޓަރ ދެއްވާފައެއްނުވެއެވެ. މިނިސްޓަރ ނަސީމް ވިދާޅުވީ، ޞިއްހީ ދާއިރާގެ އިންފްރާސްޓްރަކްޗަރއަށް މިހާރު ކުރިއަށްދާ މަޝްރޫޢުތަކުގެ އިތުރުން، އަންނަ އަހަރުގެ ބަޖެޓުގައިވެސް ރަށްރަށުގެ ހެލްތު ސެންޓަރުތަކާ ހޮސްޕިޓަލުތަކާ ގުޅޭ މުހިއްމު މަސައްކަތްތަކެއް ހިމަނާފައިވާނެކަމަށެވެ.
