ރާއްޖެއިން އިނގިރޭސިވިލާތަށް އެކްސްޕޯރޓް ކުރާ ކަނޑުމަހާއި މަހުގެ އުފެއްދުންތަކުން ނަގަމުންދާ 20 އިންސައްތައިގެ ޑިއުޓީ މައާފުކޮށްދިނުމަށް އެދިއްޖެއެވެ.
ރާއްޖޭގެ ޚާރިޖީ ވަޒީރު ޝާހިދު، އިނގިރޭސިވިލާތަށް މިހާރު ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިން އެ ގައުމުގެ ސެކްރެޓަރީ އޮފް ސްޓޭޓް ފޯ ފޮރިން، ކޮމަންވެލްތް އެންޑް ޑިވެލޮޕްމަންޓް އެފެއާޒް، ޖޭމްސް ކްލެވަލީ އާއި ބައްދަލުކުރައްވައިފިއެވެ. މި ބައްދަލުވުމުގައި މިނިސްޓަރ ޝާޙިދު ވަނީ ފޮރިން ސެކްރެޓަރީ ގެ މަގާމަށް ޖޭމްސް އަލުން އައްޔަންކުރެވުމާއި ގުޅިގެން އެމަނިކުފާނަށް ތަހުނިޔާ ދަންނަވާފައިއެވެ. އަދި މި ބައްދަލުވުމުގައި މިނިސްޓަރު ޝާހިދު ދެއްކެވި ވާހަކަފުޅުގައި ދެގައުމުގެ މަސްލަހަތު ހުރި އެކި ދާއިރާތަކުގައި އިނގިރޭސިވިލާތާއެކު ރާއްޖޭގެ ސަރުކާރުން މަސައްކަތް ކުރައްވާނެކަމުގެ ޔަޤީންކަން ވެސް ވަނީ ދެއްވާފައިއެވެ.
މިބައްދަލުވުމުގައި މިނިސްޓަރ ޝާހިދާއި ސެކްރެޓަރީ ކްލެވަލީ ވަނީ ދެގައުމުގެ ދެމެދުގައި މިހާރު ގުޅުން އޮތް ދާއިރާތައް މުރާޖަޢާކޮށް، ވިޔަފާރިއާއި ފަތުރުވެރިކަމުގެ ދާއިރާތަކުން އެއްބާރުލުން އިތުރަށް ފުޅާކުރުމަށް މަގުތައް ބައްލަވައި މަޝްވަރާކުރައްވާފައެވެ.
މިގޮތުން، ދެގައުމުގެ ވިޔަފާރިއާއި އިންވެސްޓްމަންޓް އިތުރުކުރުމުގެ މުހިންމުކަމާ ބެހޭގޮތުން މަޝްވަރާކުރައްވާފައިވެއެވެ. ވަކިން ޙާއްސަކޮށް ދިވެހި ކަނޑު މަހާއި މަހުގެ އެކި އުފެއްދުންތައް އިނގިރޭސިވިލާތަށް އެތެރެ ކުރާ އިރު ޑިއުޓީ މައާފުކޮށްދިނުމަށް މިނިސްޓަރ ޝާޙިދު ޙާއްސަ މަޝްވަރާތަކެއް ކުރެއްވިއެވެ.
ރާއްޖެ އަކީ އިނގިރޭސިވިލާތަށް އެންމެ ގިނައިން ކަންނެލި އެތެރެކުރާ އެއް ގައުމަކަށް ވާއިރު، އިނގިރޭސިވިލާތަށް އެތެރެކުރާ މަހުން 20 އިންސައްތައިގެ ޑިއުޓީއެއް މިވަގުތު ނަގައެވެ.
ފޮރިން ސެކްރެޓަރީގެ އިތުރުން، މިނިސްޓަރ ޝާޙިދު ވަނީ އިނގިރޭސިވިލާތުގެ މިނިސްޓަރ އޮފް ސްޓޭޓް ފޯ ދަ މިޑްލް އީސްޓް، ސައުތް އޭޝިއާ އެންޑް ޔުނައިޓެޑް ނޭޝަންސް އަދި ޖިންސީ އަނިޔާ ހުއްޓުވުމަށް އިނގިރޭސިވިލާތުގެ ބޮޑުވަޒީރު ހަމަޖައްސަވާފައިވާ ޙާއްސަ މަންދޫބު ލޯރޑް ތާރިޤް އަޙްމަދާއި؛ މިނިސްޓަރ ފޯ އޭޝިއާ، އެނާރޖީ، ކްލައިމެޓް އެންޑް އެންވާރަމެންޓް ލޯރޑް ގޯލްޑްސްމިތް އާއި؛ ކޮމަންވެލްތް އެންޑް ޑިވެލޮޕްމެންޓް އޮފީހުގެ މިނިސްޓަރ ފޯ ޑިވެލޮޕްމެންޓް އެންޑްރިއު މިޗެލް އާއި ވެސް ބައްދަލުކުރައްވާފައެވެ. މި ބައްދަލުވުންތަކުގައި މިނިސްޓަރު ޝާހިދު ރާއްޖެ އާއި އިނގިރޭސިވިލާތާއި ދެމެދު ޒަމާނުއްސުރެ އޮންނަ ގުޅުމަށް އަލިއަޅުވާލައްވަމުން، ދެގައުމުގެ ދެމެދުގައި އޮތް ގުޅުމުގެ އިތުރުން މަލްޓިލޭޓަރަލް ދާއިރާއިންވެސް އެއްބާރުލުން އިތުރަށް އިތުރުކުރުމަށް ރާއްޖޭގެ ސަރުކާރުގެ ޝައުގުވެރިކަން ހުރިކަން ވަނީ ފާޅުކުރައްވާފައެވެ.
ހަމަ އެއާއެކު ކޮމަންވެލްތް އެންޓަޕްރައިސް އެންޑް އިންވެސްޓްމަންޓް ކައުންސިލް (ސީޑަބްލިޔުއީއައިސީ) ގެ ޑެޕިއުޓީ ޗެއާރމަން ސަރ ހޫގޯ ސްވެޔަރ އާއި؛ އިނގިރޭސިވިލާތުގެ މަޖިލީހުގެ މެންބަރުންނާއި ވެސް މިނިސްޓަރ ޝާޙިދު ވަނީ މިދަތުރުފުޅުގައި ބައްދަލުކުރައްވާފައެވެ. އަދި މިނިސްޓަރ ޝާޙިދުގެ މި ދަތުރުފުޅުގައި އޮކްސްފޯޑް ޔޫނިއަން ސޮސައިޓީގައި ލެކްޗަރ އެއް ދިނުމަށް ވެސް ވަނީ ހަމަޖެހިފައެވެ.
މި ބައްދަލުވުމުގައި މިނިސްޓަރ ޝާޙިދާއިއެކު ސްޓޭޓް މިނިސްޓަރ އަޙްމަދު ޚަލީލް އާއި، އިނގިރޭސިވިލާތަށް ދިވެހިރާއްޖެއިން ކަނޑައަޅާފައި ހުންނަ ސަފީރު ޑރ.ފަރަހަނާޒް ފައިސަލް އާއި ޖޮއިންޓް ސެކްރެޓަރީ ޝިއުނީން ރަޝީދު ގެ އިތުރުން އިނގިރޭސިވިލާތުގައި ހުންނަ ރާއްޖޭގެ ހައިކޮމިޝަނުގެ ކައުންސެލަރ މޫސާ ޔާމީން ޝާޙިދު ވެސް ވަނީ ބައިވެރިވެވަޑައިގެންފައެވެ.
