އަދިވެސް އެންމެ ބުއްދިވެރިގޮތަކީ މޮރިޝަސްއަށް ރައީސުލްޖުމުހުރިއްޔާ އިބްރާހިމް މުޙައްމަދު ޞާލިހް މޮރިޝަސްއަށް ފޮނުއްވި ސިޓީފުޅު އަނބުރާ ގެންނެވުންކަމަށް ރައްޔިތުން މަޖިލީހުގެ މަހިބަދޫ ދާއިރާގެ މެންބަރު އަހްމަދު ތާރިގް (ޓޮމް) ވިދާޅުވެއްޖެއެވެ.
ޓޮމް މިފަދައިން ވިދާޅުވީ ފޯޅަވަހީގެ ސިޔާދަތީ ބާރުވެރިކަން ލިބުން އެންމެ ހައްގީ ދިވެހިންނަށްކަމަށް ކުރީގެ ރައީސް އަދި ރައްޔިތުން މަޖިލީހުގެ ރައީސް މުހައްމަދު ނަޝީދު ވިދާޅުވެފައިވާ ޚަބަރެއްގެ ސުރުޚީ ހިއްސާކުރައްވަމުން ކުރެއްވި ޓްވީޓެއްގައެވެ. ފޯޅަވަހީގައި ބަނޑަހަ ޖަހައިގެން މަސްވެރިކަންކޮށް އުޅުނީ ދިވެހިން ކަމަށާއި އެހެންކަމުން އެތަނުގެ ސިޔާދަތީ ބާރު ލިބުން އެންމެ ހައްގީ ރާއްޖެއަށް ކަމަށް ރައީސް ނަޝީދު ވިދާޅުވެފައިވެއެވެ.
މިކަމަށް ރިއާޔަތްކޮށް ރާއްޖޭގެ ރައީސުލްޖުމުހުރިއްޔާއަށް ނިސްބަތް ކުރައްވާ ޓޮމް ކުރެއްވި ކުރެއްވި ޓްވީޓުގައި ވިދާޅުވެފައިވަނީ، އަދިވެސް އެންމެ ބުއްދިވެރިގޮތަކީ މޮރިޝަސްއަށް އެމަނިކުފާނު ފޮނުއްވި ސިޓީފުޅު އަނބުރާ ގެންނެވުންކަމަށާއި އަދި އެޓާނީ ޖެނެރަލް ރިފްއަތުއަށް ދަންނަވައިގެން ކޯޓްގައި ކުރިން ވިދާޅުވިބަސް އަނބުރާ ގެންނެވުމަށް ދެންނެވުންކަމަށެވެ.
އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ ޓްރައިބިއުނަލް (އިޓްލޮސް)އަށް ހުށަހަޅާފައިވާ ރާއްޖެއާއި ޗާގޮސްގެ ކަނޑުގެ ސަރަހައްދު ކަނޑައެޅުމުގެ މައްސަލައިގައި ރާއްޖެއިން މީގެ ކުރިން އަބަދުވެސް ވޯޓު ދީފައިވަނީ އިނގިރޭސިވިލާތާ އެއްކޮޅަށެވެ.
އެގޮތުން އެ މައްސަލަ އިޓްލޮސްއަށް ފޮނުވަން 2017ގައި އދ.ގައި ނެގި ވޯޓުގައި ވެސް ރާއްޖޭން މޮރިޝަސްއާ ދެކޮޅު ހެދި އިރު، މޮރިޝަސްއާ އެއްކޮޅަށް އެ ކޯޓުން 2019 ގައި ކުރި ހުކުމް ބަލައިގަންނަން އދ.ގެ އާންމު މަޖިލީހުން ފާސްކުރި އިރު ވެސް ރާއްޖޭން ވޯޓު ދިނީ އެ ރަށްތައް އިނގިރޭސިވިލާތުގެ ތަނެއްގެ ގޮތުގައި ބާއްވާށެވެ.
އެކަމަކު ރާއްޖޭގެ އެ ސްޓޭންޑު ބަދަލުކޮށްފައިވާކަން ހާމަކޮށް، ބަންޑާރަ ނައިބު ރިފްއަތު ހާމަކުރެއްވީ، ރާއްޖެ އާއި މޮރިޝަސްގެ ކަނޑުގެ ސަރަހައްދު ބައިކޮށް ވަކިކުރުމާ ގުޅޭ ގޮތުން ކަމާ ބެހޭ ބައިނަލްއަޤްވާމީ ޓްރައިބިއުނަލްގައި މިހާރު ކުރިއަށްދާ މައްސަލައިގައި މި މަހުގެ 20 ވަނަ ދުވަހު ވާހަކަ ދައްކަވަމުންނެވެ.
ރިފްއަތު ވިދާޅުވީ މޮރިޝަސް އިން އދ އަށް ހުށަހަޅާފައިވާ މައްސަލާގައި އެގައުމާ އެއްކޮޅަށް ވޯޓު ދެއްވާނެ ކަމަށާއި އެކަން ކުރައްވާނެ ކަމަށް ވިދާޅުވެ ރައީސް އިބްރާހިމް މުހައްމަދު ޞާލިހް، މޮރިޝަސްގެ ބޮޑުވަޒީރަށް ސިޓީފުޅެއް ވެސް ފޮނުވާފައިވާ ކަމަށެވެ.
މިފަދައިން އޭނާ ވިދާޅުވީ މުއައްރިޚެއް ކަމުގައިވާ ނަޖާޙު ދީދީ ކުރެއްވި ޓުވީޓެއް ހިއްސާކުރައްވަމުންނެވެ. ނަޖާހުގެ ޓުވީޓުގައި އޭނާ ވިދާޅުވެފައިވަނީ ކާފިރުވި ޙަސަން ރަސްގެފާނު 1561 ވަނަ އަހަރުގައި ޗާގޮސްއަކީ ރާއްޖޭގެ ބައެއް ކަމަށް ދައުވާކުރެއްވި ކަމަށެވެ.
އަދި ފަރަންސޭސިން ޗާގޮސްގެ މައްޗަށް ވެރިވީ 1700ގެ ތެރޭގައި ކަމަށާއި އިނގިރޭސިންނަށް އެ އަތޮޅު ލިބުނީ 1814 ވަނަ އަހަރުގައި ފަރަންސޭސި އެމްޕަރާ ނަޕޯލިއަން ބޮނަޕާޓް ހަނގުރާމައިން ބަލިވެވަޑައިގަތުމުން ކަމަށެވެ.
ޗާގޮސް މައްސަލައިގައި ސަރުކާރަށް ތާއިދުކުރާ މެންވަރުންނާއި އިދިކޮޅު މެމްބަރުންގެ އިތުރުން އާންމުންވެސް ކަންބޮޑުވުން ފާޅުކުރަމުން އަންނަ ކަން ފާހަގަކޮށްލެވެއެވެ.
