ލިވާތު ކުރުމާއި ސިހާގު ކުރުން ބޮޑު ކުށަކަށް ހަދަން ގާސިމް ހުށަހަޅުއްވައިފި

ލިވާތު ކުރުމާއި ސިހާގު ކުރުން ބޮޑު ކުށަކަށް ހަދަން ޖިނާއީ އިޖުރާއަތުގެ ގާނޫނަށް އިސްލާހު ގެންނަން ހުށަހަޅައިފިއެވެ.

މި ދެ ކުށް ޖިނާއީ ބޮޑެތި ކުށުގެ ތެރޭގައި ހިމަނަން އިސްލާހު ހުށައެޅުއްވީ ޖުމްހޫރީ ޕާޓީގެ ލީޑަރު އަދި މާމިނގިލީ ދާއިރާގެ މެމްބަރު ގާސިމް އިބްރާހިމެވެ.

ގާސިމް ހުށަހެޅުއްވި އިސްލާހުގައި ބުނެފައިވަނީ އެއްޖިންސުން ގުޅުންހިންގާ މީހުންނަކީ މުޖުތަމައުއަށް ނުރައްކާތެރި ބައެއް ކަމާއިމެދު ޝައްކު ނުކުރައްވާ ކަމަށާއި، އެފަދަ މީހެއްގެ ފަރާތުން އެކަމުގެ އަސަރު ނުވަތަ އެފަދަ މީހެއްގެ ވަސްވާސް، އެމީހާގެ އާއިލާއަށާއި މުޅި މުޖުތަމައު އަށް ވެސް ފޯރާނެ ކަމަށެވެ.

އެގޮތުން އޭގެކުރިން އެފަދަ މީހުން މުޖުތަމައުއިން އެކަހެރި ކުރުމަކީ މުހިންމު ކަމެއް ކަމަށާއި އަދި މިފަދަ ބޮޑެތި ކުށްތަކަކީ އާދައިގެ ކުއްތަކެއްގެ ގޮތުގައި މުޖުތަމައުގައި އާންމުވެގެންދިއުމުގެ ބިރު އެބައޮތް ކަމަށްވެސް އެ އިސްލާހުގައިވެއެވެ.

މީގެއިތުރުން މިއީ މިފަދަ ފާހިޝް އަމަލުތައް ކުރާ މީހުންނާއި އެމީހުންގެ އަމަލުތަކުން ދިވެހިން ދުރުކޮށް، އެފަދަ މީހުން މުޖުތަމައުއިން އެކަހެރި ކުރުން އެއީ އެންމެ އައުލާކަން ބޮޑު ގޮތް ކަމަށް ދެކޭތީ ހުށަހެޅުއްވި އިސްލާހެއް ކަމަށްވެސް ބުނެފައިވެއެވެ.

ގާސިމް ވަނީ މި އިސްލާހަށް ރައްޔިތުންގެ މަޖިލީހުގެ ހުރިހާ މެމްބަރުންގެ ތާއީދު ކުރެއްވުމަށް އެދިވަޑައިގެންފައެވެ.