ރާއްޖޭގެ މަސްވެރިކަމުގެ ސިނާއަތް ކުރިއެރުވުމަށް ޖަޕާން ސަރުކާރުގެ އެހީގައި ޚާއްސަ މަޝްރޫޢެއް ފަށައިފިއެވެ.
މިމަޝްރޫޢުގެ އެންމެ ބޮޑު އަމާޒަކީ ސަރުކާރުގެ ނޫ އިޤްތިސާދުގެ ތެރެއިން މަސްވެރިކަމުގެ ނަފާ ދިވެހި ރާއްޖެއަށް ވީހާވެސް ބޮޑަށް ފުޅާކުރުމެވެ. މިމަޝްރޫޢުގެ ދަށުން ކުރިއަށްގެންދާ ހަރަކާތްތަކަކީ ސަރުކާރުގެ ސްޓްރެޓެޖިކް އެކްޝަން ޕްލޭންގައިވެސް ހިމެނޭ ނޫ އިޤްތިސާދުގެ ސިޔާސަތުތަކުގައި ހިމެނޭ ކަންތައްތަކެވެ.
މި މަޝްރޫޢުގެ މަސައްކަތް ފެށުން ފާހަގަކުރުމަށް މިއަދު ސޮލައިޓުގައިވަނީ ޚާއްސަ ހަފްލާއެއް ބާއްވާފައެވެ. މިހަފްލާގައި މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ޑރ. ހުސައިން ރަޝީދު ހަސަން އާއި ޖަޕާނުން ރާއްޖެއަށް ކަނޑައަޅުއްވާފައި ހުންނަވާ ސަފީރު ތަކެއުޗި މިދޮރި ބައިވެރިވެވަޑައިގެންނެވިއެވެ.
މި ހަފްލާގައި ވާހަކަފުޅު ދައްކަވަމުން ފިޝަރީޒް މިނިސްޓަރ ޑރ. ހުސެއިން ރަޝީދު ވަނީ ރާއްޖޭގެ މަސްވެރިކަމުގެ ސިނާއަތް ކުރިއެރުވުމަށް ޖަޕާން ސަރުކާރުން ވެދޭ އެހީތެރިކަން ފާހަގަކުރައްވާފައެވެ. އަދި މިފަށާ މަޝްރޫޢުގައި ކުރިއަށް ގެންދިޔުމަށް ރާވާފައިވާ ހަރަކާތްތަކާއި އެކު ރާއްޖޭގެ މަހަށް ލިބޭ އަގަށްވެސް ހެޔޮ ބަދަލުތަކެއް އަންނާނެ ކަމަށް ފިޝަރީޒް މިނިސްޓަރ ވިދާޅުވިއެވެ.
މި ޕްރޮޖެކްޓުގެ ދަށުން ކުރިއަށްގެންދާ ހުރިހާ ހަރަކާތްތަކަށް ފަންޑު ހަމަޖައްސައިދޭނީ ޖަޕާން ސަރުކާރުންނެވެ. މިޕްރޮޖެކްޓުގެ ދަށުން ހިންގާ ހަރަކާތްތައް 2024 ގެ ނިޔަލަށް ކުރިއަށް ގެންދިޔުމަށްވަނީ ރާވާފައެވެ.
