ހުޅުމާލޭ ފޭސް ދޭއްގެ ބަހުގެ ހިދުމަތް ރަސްމީކޮށް ރައީސް އިބްރާހީމް މުހައްމަދު ސޯލިހު އިފުތިތާހުކޮށްދެއްވައިފިއެވެ.
ހުޅުމާލޭ ދެވަނަ ފިޔަވަހީގެ ރައްޔިތުންނަށް ރާއްޖެ ޓްރާންސްޕޯޓް ލިންކްގެ ބަސް ދަތުރުގެ ޚިދުމަތް އިފްތިތާހް ކުރުމަށް ރޭ ބޭއްވި ރަސްމިއްޔާތުގައި ވާހަކަދައްކަވަމުން ރައީސް ވިދާޅުވީ ހުޅުމާލެ ދެވަނަ ފިޔަވަހީގައި ދިރިއުޅޭ ރައްޔިތުންނަށް އެކަށޭނެ އެއްގަމު ދަތުރުފަތުރުގެ ނިޒާމެއް ނެތުމަކީ ރައްޔިތުންގެ ބޮޑު ޝަކުވާއެއްކަމަށެވެ. ނަމަވެސް އާރްޓީއެލްގެ ބަހުގެ ޚިދުމަތާއެކު ދަތުރުފަތުރަށްވެސް ބޮޑު ލުޔެއް ލިބިގެންދާނެކަން ރައީސް ފާހަގަކުރެއްވިއެވެ.
ހުޅުމާލޭ ދެވަނަ ފިޔަވަހި ހިއްކާ ރައްޔިތުންނަށް، ޚާއްސަކޮށް މާލޭގެ ރައްޔިތުންނަށް ބޯހިޔާވަހިކަން ފޯރުކޮށްދޭއިިރު ރައްޔިތުންނަށް ބޭނުންވާ އެންމެ މުހިއްމު ކަންތައްތައް ނުނިންމާ ހުރިކަން ފާހަގަކުރައްވަމުން ރައީސް ވިދާޅުވީ އެމަނިކުފާނު ވެރިކަމާ ހަވާލުވުމަށްފަހު އޭރު ދެވަނަ ފިޔަވަހީގައި ކުރަން ފަށާފައިވާ މަސައްކަތްތައް އަވަހަށް ނިންމުމުގެ މަސައްކަތް ފެށިކަމަށާއި، އެއްބަސްވެފައިވާ މަޝްރޫޢުތަކުގެ ތެރެއިން ރައްޔިތުންނަށް ފައިދާ ކުރާ މަޝްރޫޢުތައްވެސް ލަސްނުކޮށް ކުރިއަށް ގެންދަން ފެއްޓެވިކަމަށެވެ.
ހިޔާ ފްލެޓްތަކުގައި ދިިރިއުޅޭ ރައްޔިތުންގެ ޝަކުވާތަކަށް އަލިއަޅުއްވާލައްވާ ރައީސް ވިދާޅުވީ ހިޔާ ފްލެޓްތަކުގައި މީހުން ދިިރިއުޅެން ފެށިއިރު ވަރަށް ގިނަ ޚިދުމަތްތައް ފޯރުކޮށްދޭން ޖެހިފައި ހުރިކަމަށެވެ. އެގޮތުން ތައުލީމާއި ސިއްޙީ ޚިދުމަތްތަކާއި އެހެނިހެން ޚިދުމަތްތައް ހޯދަން ޖެހުނުނަމަވެސް، އުފުލަންޖެހިފައިވާ ބުރަ ބޮޑު ކަމަށްވެސް ރައީސްގެ ވާހަކަފުޅުގައި ވިދާޅުވިއެވެ.
ރޭގެ މި ރަސްމިއްޔާތުގައި ވާހަކަދައްކަވަމުން އެމްޓީސީސީގެ ސީއީއޯ އާދަމް އާޒިމްވަނީ އެކުންފުނިން ދެމުން އަންނަ ދަތުރުފަތުރުގެ ޢާއްމު ޚިދުމަތް އިތުރަށް ފުރިހަމަކުރުމަށް ކުރަމުންދާ މަސައްކަތްތަކާއި ގުޅޭ މަޢުލޫމާތު ހާމަކުރައްވާފައެވެ. އެގޮތުން މިއަހަރު ނިމުމުގެ ކުރިން ޓެކްނޮލޮޖީގެ އެހީގައި ޕަބްލިކް ޓްރާންސްޕޯޓްގެ ޚިދުމަތް ފޯރުކޮށްދޭ ކޮންމެތާކުން ޚިދުމަތް ލިބޭނެ މަގު ފަހިކުރުމުގެ މަސައްކަތް ކުރަމުންދާ ކަމަށް ސީއީއޯ އާޒިމް ވިދާޅުވިއެވެ. އެހެންކަމުން ބީއެމްއެލްގެ ކާޑުތަކާއި މާސްޓަރ ކާޑު މެދުވެރިކޮށް އަދި ސްމާޓް ފޯނު މެދުވެރިކޮށްވެސް އެމްޓީސީސީގެ ދަތުރުފަތުރުގެ ޚިދުމަތުގެ ޓިކެޓް ނެގޭނެ އިންތިޒާމު ހަމަޖެއްސުމަށް މަސައްކަތް ކުރަމުންދާކަމަށްވެސް އާޒިމް ވިދާޅުވިއެވެ.
ރޭގެ މި ރަސްމިއްޔާތުގައި ރައީސް ސޯލިހާއި ނައިބު ރައީސް ފައިސަލް ނަސީމާއި މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)ގެ ސީއީއޯ އާދަމް އާޒިމްގެ އިތުރުން ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ)ގެ މެނޭޖިން ޑިރެކްޓަރު ސުހެއިލް އަހުމަދާއި އެޑިއުކޭޝަން މިނިސްޓަރު ޑރ. އައިޝަތު އަލީ އާއި ޓްރާންސްޕޯޓް މިނިސްޓަރު އައިޝަތު ނަހުލާ އާއި ފިނޭންސް މިނިސްޓަރު އިބްރާހީމް އަމީރު އަދި ހުޅުމާލޭގެ ދާއިރާގެ ރައްޔިތުން މަޖިލިސް މެމްބަރު އަލީ ނިޔާޒު ބައިވެރިވެވަޑައިގެންނެވިއެވެ.
