ގޭތެރޭގެ ޒިންމާތައް ވަކި ޖިންސަކަށް ޚާއްސަކުރެވުން މިއީ ޒަމާނުއްސުރެ ދިވެހިންގެ ތެރޭގައި އަށަގެންފައިވާ ނުރަނގަޅު އާދައެކެވެ. ދިރިއުޅުމުގެ ވައްޓަފާޅިއަށް އައިސްފައިވާ ބޮޑެތި ބަދަލުތަކާއި އެކު މި އާދަތައްވެސް ބަލުވާންޖެހެއެވެ. ދިރިއުޅުމުގައި އެންމެންވެސް ހިއްސާވެ އެހީތެރިކަން ފޯރުކޮށްދޭންޖެހެއެވެ.
ކުރިއާއި އަޅަބަލާއިރު މި ކަންކަމަށް ކޮންމެވެސް ވަރެއްގެ ހެޔޮބަދަލެއް އައިސްފައިވީނަމަވެސް އަދިވެސް ރާއްޖޭގެ ބައެއް ސަރަހައްދު ތަކުގައި މިއާދަ ވަރަށް ބޮޑަށް ހަރުލާފައިވާކަން ފާހަގަކުރެވެއެވެ.
ގޭތެރޭގެ ޒިންމާތައް އެއްފަރާތް ކޮށްލަމާހެއްޔެވެ. ފުރަތަމަ ކުއްޖާގެ އަމިއްލަ ކަންތަކެވެ. ކައިފައި ތަށި ދޮވުމާއި، ނިދާ ހޭލާ ތަންމަތި ރީތިކުރުމާއި އުޅޭ ކޮޓަރި ފޮޅާ ސާފުކުރުމަކީ ވަކި އުމުރަކަށް ދިއުމުން ކޮންމެ ޖިންސެއްގެ ކުއްޖަކަށްވިޔަސް އަމިއްލައަށް ކުރެވެންވާނެ ކަންތަކެވެ.
ނަމަވެސް މިފަދަ ކަންކަން ހާއްސަވެފައި އޮންނަނީ ގޭގައި އުޅޭ އަންހެނުންނަށެވެ. އަންހެން ކުދިންނެކޭ އެއްގޮތަށް ފިރިހެން ކުދިންނަށްވެސް އެކުދިންގެ އުމުރާއި ގުޅޭގޮތަށް ޒިންމާތަށް ހަވާލް ކުރަންޖެހެވެ. ޅަ އުމުރުގައި އެކުދިންގެ ޒިންމާތައް އެކުދިންނަށް ދަސްކޮށްދޭން މަސައްކަތްކުރަންޖެހެއެވެ.
ކުދިން ބޮޑުވެ އަމިއްލަ ދިރިއުޅުމެއް ފަށަން ތައްޔާރުވުމުން އަންހެން ކުއްޖާއަށް ދިރިއުޅުމުގެ ކަންކަން ދަސްވެފައި ހުރި މިންވަރާއި މެދު ސުވާލު އުފެދޭ ފަހަރު އާދެވެ. ނަމަވެސް ގޭތެރޭގެ ކަންކަމުގައި ފިރިހެން ކުއްޖާއަށް އެހީވެވޭނެ މިނަވަރާއި މެދު ސުވާލު އުފެދޭނީ މަދު ފަހަރަކުއެވެ.
މި އާދަ އަޅުގަނޑުމެންގެ މުޖްތަމައުގައި އަށަގެންފައިވާ މިންވަރުގެ ސަބަބުން، މިކަން އިސްލާހް ކުރަން ބޭނުންވެ، އެކަމަކު ކުރަން ޖެހިލުންވާ ފަހަރުވެސް އާދެއެވެ. މީހުން ކިޔާފާނެ އެއްޗަކަށް ވިސްނާލާފައެވެ. ފިރިހެން ދަރިއަކު ގޭތެރޭގެ ކަމެއްގައި އުޅެލައިފި ނަމަ އަންހެން ދުޅާ ވީއެވެ. ގޭތެރޭ ކަމެއްގައި އަނބި މީހާއަށް އެހީތެރިވާން ވަގުތު ހުސްކޮށްފި ނަމަ އަނބި ދަށުވީއެވެ. މި ބޯދާ ވިސްނުން ބަލަލުކުރަން ޖެހެއެވެ.
ތަންމަތީގައި ބަލިވެ އޮންނަ މައިން ބަފައިންނަށް އަޅާލުމަކީވެސް މި ފަދަ ޒިންމާއެކެވެ. މި ޒިންމާވެސް ހާއްސަވެފައިވަނީ ގޭގައި އުޅޭ އަންހެނުންނަށެވެ. އަންހުނުންނަށް ނޫނީ އަދާ ނުކުރެވޭ ޒިންމާތައްވެސް ހުރެއެވެ. ހަމަ އެގޮތަށް ފިރިހެނުންނަށް ހާއްސަ މަސައްކަތްތައްވެސް ހުރެއެވެ.
އެހެންނަމަވެސް މުސްކުޅިވެ ގައިބާރު ދެރަވެފައިވާ މައިން ބަފައިންނަށް އަޅާލުމުގައި ދެޖިންސުގެ މީހުންވެސް އެސްވަރަކަށް ޝާމިލްވާން ޖެހެއެވެ. ކާންދިނުމާއި އަތާއި ފައިގެ ނިޔަފަތި ކަނޑާދިނުމާއި ގޮވާގެން ބޭރަށްގޮސްލުމަކީ ފިރިހެނުންނަށްވެސް ކުރެވިދާނެ ކަންކަމެވެ.
މިފަދަ ކަންކަން އިސްލާހްކުރުމަށް އެންމެބޮޑަށް ބާރު އަޅައިދޭ އެއް ކަމަކީ ކުދިންނަށް އެކުދިންގެ ޅަ އުމުރުގައި ދައްކުވައިދެވޭ ރިވެތި ނަމޫނާއެވެ.
ކުދިންނަށް ރަނގަޅުގޮތް ކިޔައި ދިނުމުގެ އިތުރުން އަމަލުންވެސް އެކަން ދައްކުވައިދޭން ޖެހެއެވެ. ކައިފައި ތަށިދޮވުމަކީ މަންމައަށް ފަސޭހަކޮށޮދިނުންކަމުގައި ބުނެދިނުމުގެ ބަދަލުގައި އެއީ އެކުދިން އަދާކުރަންޖެހޭ ޒިންމާއެއްކަން ވިސްނައިދީ، އެކަމުގެ މުހިންމުކަން ބުނެދޭންޖެހެއެވެ. އަދުގެ ވަޒިފާގެ މާހައުލުގައި އަންހެނުންގެ ބައިވެރިވުން އިތުރުވެފައިވާ ފަދައިން، ގޭތެރޭގެ ޒިންމާ ތަކުގައި ފިރިހެނުންގެ ބައިވެރިވުން އިތުރުވާން ޖެހެއެވެ.
