މިއީ ލާމަރުކަޒީ ނިޒާމަށް ސަރުކާރުން ގެނައި ބަދަލުތަކުގެ، ލާބަޔާއި މަންފާ، ކައުންސިލުތަކުން ރައްޔިތުންނަށް ހޯދައިދޭންވީ ވަގުތުކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.
ކައުންސިލަރުން ހުވައި ކުރެއްވުމާއި، އަންހެނުންގެ ކޮމިޓީތަކުގެ މެންބަރުން އިޤްރާރުވުމުގެ މުނާސަބަތުގައި ރައީސް މިރޭ ދެއްކެވި ވާހަކަފުޅުގައި ވިދާޅުވީ ރައްޔިތުންގެ ބައިވެރިވުން ކުރިއަށްވުރެ މާ ބޮޑަށް ޝާމިލުވާ ގޮތަށް، ލާމަރުކަޒީ ނިޒާމަށް މި ސަރުކާރުން ގެނައި ބަދަލުތައް ތަންފީޒުކުރަން ފެށުމަކީ މިއަދު ލިބިވަޑައިގަންނަވާ ވަރަށް ބޮޑު ހިތްހަމަޖެހުމެއް ކަމަށެވެ.
”މިއަދަކީ ރާއްޖޭގެ ލާމަރުކަޒީ ނިޒާމުގެ ތާރީޚުގައި ރަން އަކުރުން ފެވިގެންދާނެ ދުވަހެއް. ސަބަބަކީ މިއަދަކީ ހަޤީޤީ ލާމަރުކަޒީ ނިޒާމުން އަތޮޅުތަކާއި،ސިޓީތަކާއި ރަށްތައް، ހިންގަން ފެށުނު ދުވަސް ކަމަށްވާތީ. އަދި މިއަދަކީ ފުރަތަމަ ފަހަރަށް ރައްޔިތުންގެ ޢާންމު ވޯޓަކުން އިންތިޚާބުކުރި އަންހެނުންގެ ތަރައްޤީއަށް މަސައްކަތްކުރާ ކޮމިޓީތައް ޤާނޫނީ ހައިސިއްޔަތާއެކު މަސައްކަތްކުރަން ފެށި ދުވަސް ކަމަށްވާތީ. ހަމައެހެންމެ ފުރަތަމަ ފަހަރަށް ރައްޔިތުންގެ ޢާންމު ވޯޓަކުން އިންތިޚާބުކުރި ރަށު ކައުންސިލްތަކުގެ ރައީސުންނާއި އަތޮޅު ކައުންސިލްތަކުގެ ރައީސުންނާއި، ސިޓީތަކުގެ މޭޔަރުން، އެ ބޭފުޅުންގެ މަޤާމުގެ ޒިންމާތަކާއި ހަވާލުވެވަޑައިގެންނެވި ދުވަސް ކަމަށްވާތީ.“ ރައީސް ވިދާޅުވިއެވެ.
ރައީސް ވިދާޅުވީ އެ ހުރިހާ ކަމަކުން ވެސް ދޭހަވަނީ ލާމަރުކަޒީ ނިޒާމު ހިންގާނެ މީހުން ކަނޑައެޅުމުގައި ރައްޔިތުންގެ ބައިވެރިވުން ހިމެނިފައި އޮތް މިންވަރު ކަމަށެވެ. އެހެންކަމުން މިއަދު މި ހިނގަން ފަށާ ކައުންސިލްތަކުން އެންމެ ބޮޑު އިސްކަމެއް ދޭންޖެހޭނީ ޤައުމީ ތަރައްޤީގެ ޕްލޭނާ އެއްގޮތަށް، ރައްޔިތުންނަށް އެންމެ ފައިދާހުރި ގޮތަށް ސިޓީތަކާއި ރަށްތައް ތަރައްޤީކޮށްދިނުމަށްކަމަށް ވެސް ރައީސް ވިދާޅުވިއެވެ.
ރައީސް ވިދާޅުވީ ލާމަރުކަޒީ ޤާނޫނަށް ގެނައި ބަދަލުތައް ގެނައުމުގެ ކުރިން ވަރަށް ފުޅާ ދާއިރާއެއްގައި، ރައްޔިތުންގެ ޚިޔާލާއި މަޝްވަރާ ހޯއްދެވި ކަމަށެވެ. އަދި ރައްޔިތުންގެ މަޝްވަރާއާއި އެއްގޮތަށް ޤާނޫނު އިސްްލާހުކޮށް ލާމަރުކަޒީ ނިޒާމަށް ބަދަލުތައް ގެންނެވީ ރައްޔިތުންގެ ވިންދު ހުރީ އެ ބަދަލުތަކާއިގެން ކުރިއަށް ދިޔުމަށް ކަމަށްވާތީކަމަށް ވެސް ރައީސް ވިދާޅުވިއެވެ.
”މީގެ ކުރިން މަރުކަޒީ ސަރުކާރުގައި ހުރި އިދާރީ ވަރަށް ގިނަ ޒިންމާތަކާއި މަސްއޫލިއްޔަތުތަކެއް މިހާރު އެހުރީ ކައުންސިލްތަކާ ހަވާލުކުރެވިފައި. ކައުންސިލަރުންނަށާއި ކައުންސިލްތަކަށްވެސް ޤާނޫނީ ބާރު ދީ، ރަށްރަށުގެ އިޚްތިސާސް މިހާރު އެހުރީ ކަނޑައަޅައިފައި. ތިޔަބޭފުޅުން މިއަދު ކައުންސިލް އިދާރާތައް ހިންގެވުމާ ތިޔަ ހަވާލުވެވަޑައިގަންނަވަނީ ހަމައެކަނި ވަޒީފާއެއް އަދާކުރެއްވުމުގެ ހައިސިއްޔަތަކުން ނޫން. ތިޔަބޭފުޅުންގެ ކޮނޑުފުޅުގައި މިއަދު އެޅިގެންދާ ޤައުމީ ވާޖިބާއި ޒިންމާ އެއަށްވުރެ މާބޮޑު. ތިޔަބޭފުޅުންގެ އެންމެ ބޮޑު ޒިންމާއަކީ ތިޔަ ބޭފުޅުންނާ ހަވާލުކުރެވޭ ރައްޔިތުންގެ އަމާނާތަށް ފުރިހަމައަށް ރައްކާތެރިވެ، ތިޔަ ބޭފުޅުންގެ ރަށާއި، އަތޮޅާއި ސިޓީ ތަރައްޤީކޮށްދެއްވުން. މިއީ މަސައްކަތްކޮށް ނަތީޖާ ނެރެންވީ ވަގުތު. މިއީ ލާމަރުކަޒީ ނިޒާމަށް މިގެނައި ބަދަލުތަކުގެ ލާބަޔާއި މަންފާ ރައްޔިތުންނަށް ހޯދައިދޭންވީ ވަގުތު.“ ރައީސް ވިދާޅުވިއެވެ.
ރައީސް ވަނީ ލާމަރުކަޒީ ނިޒާމަށް ގެނައި މުހިންމު ބަދަލުތަކާއެކު ރަށްރަށަށް ހަލުވި ތަރައްޤީއެއް އަންނާނެ ކަމަށް އުންމީދުކުރައްވާކަމަށް ވެސް ވިދާޅުވެފައެވެ.
