ގދ.ކާޑެއްދޫ އެއަރޕޯޓު އަދިވެސް އޮތީ ކުރިން އޮތް ހާލަތުގައި ކަމަށާއި، ގެނެވުނު އެއްވެސް ބަދަލެއް ނެތްކަމަށް ޖުމްހޫރީ ޕާޓީގެ ލީޑަރު އަދި ވިލާ ކުންފުނީގެ ޗެއަރމަން ޤާސިމް އިބްރާހިމް މިއަދު ވިދާޅުވެއްޖެެއެވެ.
ކާޑެއްދޫ އެއަރޕޯޓް ހިންގުން ވިލާ އެއަރއަށް 2013 ވަނަ އަހަރުގައި ދިން ނަމަވެސް، 2017 ވަނަ އަހަރުގައި ސަރުކާރުން ވަނީ އެ ތަން އަތުލައިފައެވެ. އެއަރޕޯޓު އަތުލާފައިވަނީ ސިވިލް އޭވިއޭޝަން އޮތޯރިޓީގެ މިންްގަނޑުތަކާއި ޚިލާފަށް އެތަން ހިންގާކަމަށް ބުނެފައެވެ.
ވިލާ އެއަރއިން މި މައްސަލަ ކޯޓަށް ހުށަހެޅުމުން 2018 ވަނަ އަހަރުގެ ނޮވެމްބަރު މަހުގައި ސިވިލް ކޯޓުން ނިންމީ އެއްބަސްވުން ބާޠިލްކުރީ ޤާނޫނާއި ޚިލާފަށް ކަމަށާއި، އެ ގޮތުން އެއްބަސްވުން އަދިވެސް ދެމިއޮތް ކަމަށެވެ. ހަމައެހެންމެ ހައިކޯޓުން ވަނީ މި ޙުކުމް ދަމަހައްޓައިފައެވެ. އެހެންކަމުން ދައުލަތުން މި މައްސަލަ ސްޕްރީމް ކޯޓުގައި އިސްތިއުނާފުކުރީއެވެ.
ސްޕްރީމް ކޯޓުގައި މިއަދު ބޭއްވި އަޑުއެހުމުގައި ދައުލަތުން ބުނެފައިވަނީ އެއަރޕޯޓު ހިންގަންޖެހޭނީ ސިވިލް އޭވިއޭޝަން އޮތޯރިޓީގެ މިންްގަނޑުތަކާއި އެއްގޮތަށްކަމަށްވިޔަސް، އޭގެ ހަތަރު އަހަރު ފަހުން އެއްބަސްވުން ބާޠިލްކުރުމާއި ހަމައަށް ވިލާ އެއަރލައިނުން އެ ކަންތައްތައް ފުރިހަމަކޮށްފައިނުވާ ކަމަށެވެ. ދައުލަތުން ބުނީ ކާޑެއްދޫ އެއަރޕޯޓު ހިންގަން ވިލާ އެއަރލައިނަށް ސިވިލް އޭވިއޭޝަން އޮތޯރިޓީން ދޫކުރީ ވަގުތީ ލައިސަންސެއް ކަމަށާއި، އެ ގޮތަށް ޢަމަލުކުރީ މިންގަނޑުތަކަށް އެ ތަން ނުފެތޭތީ ކަމަށެވެ. އެ ގޮތުން އެފަދަ ހާލަތެއްގައި އެއްބަސްވުން ބާޠިލުކުރުމުގެ ބާރު ދައުލަތަށް އޮންނާނެކަމަށެވެ.
މީގެ އިތުރުން އެއަރޕޯޓު ހުއްޓައިލަން ސިވިލް އޭވިއޭޝަން އޮތޯރިޓީން ކުރިން އަންގާފައިނެތީ އެ ސަރަހައްދުގެ ވައިގެ ދަތުރުފަތުރުތައް މުޅިން ހުއްޓިގެން ދިޔަ ނުދިނުމަށްޓަކައި ކަމަށާއި، އެ ގޮތުން އެއަރޕޯޓު ހިންގުން ހުއްޓައިލަން އަންގާފައިނުވުމަކީ މިންގަނޑުތަކަށް އެތަން ފެތޭނެކަމަށް ބެލެވޭނެކަމެއް ނޫން ކަމަށެވެ.
ދައުލަތުން ދެއްކި ވާހަކަތަކާއި ގުޅިގެން ޤާސިމް ވިދާޅުވީ އެ ސަރަހައްދުގެ ވައިގެ ދަތުރުފަތުރުތައް މުޅިން ހުއްޓިގެން ދިޔަ ނުދިނުމަށްޓަކައި ކަމަށް ބުނެ، މިންގަނޑުތަކާއި ޚިލާފު އެއަރޕޯޓެއް ހިންގުމަށް ސިވިލް އޭވިއޭޝަން އޮތޯރިޓީން ހުއްދައެއް ނުދޭނެ ކަމަށެވެ.
”ދައުލަތުން އެ ވިދާޅުވަނީ ސިވިލް އޭވިއޭޝަނުން ގދ.އަތޮޅު ހިސާބުގެ ރައްޔިތުންނަށް ފަސޭހައަކަށްޓަކައި، މަތިންދާ ބޯޓު ލޭންޑްކުރަން ބޮޑު ރިސްކެއް ނަގައި އެކަން ކުރައްވާފައިވާކަމަށް. އަޅުގަނޑު ދަންނަވާނީ އެއްގޮތަކަށް ވެސް ސިވިލް އޭވިއޭޝަން އޮތޯރިޓީން އެކަހަލަ އެންމެ ރިސްކެއް ނަންގަވާކަށް ފުރުސަތެއް ނުދެއްވާނެކަން އިނގޭތޯ. އެ ބޭފުޅުންގެ ވަރަށް ބޮޑު މިސް އަންޑަސްޓޭންޑިންގއެއްކަމަށް އަޅުގަނޑު ދެކެނީ. ސިވިލް އޭވިއޭޝަންގަ ކޮމްޕްރޮމައިޒެއް ނުކުރާނެ ސޭފްޓީއެއް.“ ޤާސިމް ވިދާޅުވިއެވެ.
ހަމައެހެންމެ އެއަރޕޯޓު އަދިވެސް އޮތީ ކުރިން އޮތް ހާލަތުގައި ކަމަށާއި، އެތަން ރަނގަޅުކުރަން ގެނެވުނު އެއްވެސް ބަދަލެއް ގެނެވިފައިނުވާތީ ދައުލަތުން ދައްކާ ވާހައިގައި އަގެއް ނުވަތަ ބުރަދަނެއް ނެތްކަން ސާބިތުވާކަމަށް ވެސް ޤާސިމް ވިދާޅުވިއެވެ.
”އެހެންވީމަ މިއަދު ވެސް އަޅުގަނޑުމެން ދޫކޮށްލިއިރު އޮތް ގޮތަށް އެ ރަންވޭ އޮޕަރޭޓްކުރަމުން އެދަނީ. އަޅުގަނޑުމެން ދޫކޮށްލިއިރު، އެ ތަން އޮތަގޮތަށް އެއަރޕޯޓު ހިނގަމުން އެ ދަނީ. އެހެންވީމަ އެ ދައްކަވާ ވާހަކަފުޅުއެއީ… ސަރުކާރުގެ ފަރާތުން ދައުލަތުގެ ފަރާތުން އެ ދައްކަވާ ވާހަކަފުޅުއެއީ މާ ބޮޑު އަގެއްހުރި ވާހަކައެއްނޫންކަން އަދި ބުރަދަނެއް ހުރި ވާހަކައެއް ނޫންކަން ސާބިތުކޮށްދެނީ އަޅުގަނޑުމެން އެތަނުން ނެރެ، މިއަދާ ހަމައަށް ވެސް އެ އެއަރޕޯޓު ރަނގަޅުކުރުމަށްޓަކައި ސްޓްރަކްޗަރަށް ނުވަތަ އެހެންކަމަކަށް ވެސް ގެނައި ބަދަލެއް ނެތް އިނގޭތޯ.“ ޤާސިމް ވިދާޅުވިއެވެ.
މި މައްސަލައިގެ އަޑުއެހުންތައް މިއަދު ނިންމައިލައިފައިވާއިރު އިތުރުކަމެއް ސާފުކުރަން ނުޖެހޭނަމަ، ދެން އޮންނާނީ ޙުކުމްކުރެއްވުމުގެ މަޖިލީސްކަމަށް ފަނޑިޔާރުންގެ ބެންޗުން ވިދާޅުވިއެވެ.
އެއީ ދައުލަތުގެ އެއްވެސް އަގެއް ނެތްކަން. އެއީ ދައުލަތާ ގުޅިގެން ކުރާ ވައްކަން. މި ސަރުކާރަކީ ވައްކަމުގެ އައްޕަ.
ގާސިމޫ އެކަމާ ދެން ނޫޅޭ އެތަން އެއޮތީ މިހާރު އިންޑިއާ އަށް ދީފަ.
ދައުލަތުގެ އަގުހުރިކަމުގެ ހެއްކެއް ނޫންބާ ޅައަންބަކާއެކު ރަށުގަބަހައްޓާފަ ދައުލަތުން މުސާރަދެމުންއެދަނީ!