ޅ.ނައިފަރުގެ ހުރިހާ ގެއެއްގައި ޓޭޕް ދަމައި، މޮނިޓަރިންނަށްލަ، ރައްޔިތުން ގޭބަންދުކޮށް، ބިރުވެެރިކަމެއްގެ ތެރޭގައި ބޭތިއްބުމަކީ ހައްލެއް ނޫންކަމަށް ވިދާޅުވެ، އެ ދާއިރާގެ މެންބަރު އަދި ޕީޕީއެމްގެ ނައިބު ރައީސް އަޙްމަދު ޝިޔާމް ކަންބޮޑުވުން ފާޅުކުރައްވައިފިއެވެ.
ނައިފަރުގައި ކޮވިޑު ފެތުރެން ފެށުމުން އެ ރަށް ވަނީ މޮނިޓަރިންގެ ހާާލަތަށް ގެނެސްފައެވެ. އެ ރަށުން މިހާތަނަށް 56 މީހުން ކޮވިޑަށް ޕޮޒިޓިވްވެފައިވެއެވެ. 5000 އަށްވުރެ ބޮޑު އާބާދީއެއް އޮންނަ އެ ރަށުގެ 81 ގެއެއްގައި ވަނީ މީހުން ކަރަންޓީނުކޮށްފައެވެ.
ނައިފަރުގެ ހާލަތާމެދު ކަންބޮޑުވުން ފާޅުކުރައްވައި, ޝިޔާމް ވިދާޅުވީ ނައިފަރަކީ ވަރަށް ބޮޑަށް ތޮއްޖެހިގެން ޢާއިލާތައް ދިރިއުޅޭ ރަށަކަށްވާއިރު, އެޗްޕީއޭއިން މިފަދަ ހާލަތްތަކުގައި ޢަމަލުކުރާ ޢާންމު ގައިޑުލައިނަކީ, ނައިފަރު ކަހަލަ ރަށަކަށް އެންމެ ރަނގަޅު ގައިޑުލައިންތޯ ވިސްނައިލަން ޖެހިފައިވާ ކަމަށެވެ.
ޝިޔާމް ވިދާޅުވީ ނައިފަރުގެ ގެއަކުން ޕޮޒިޓިވް ކޭސްއެއް ފެނިގެން ކޮންޓެކްޓް ޓްރޭސިން ހަދާއިރު އޮންނަނީ މުޅި ހިސާބުގެ ގެތަކުގެ މީހުން އައިސޮލޭޝަނަށް ދާން ޖެހިފައިކަމަށެވެ.
”ހުރިހާ ގެއެއް ޓޭޕްދަމާ މޮނިޓަރިންއަށްލަމުންދަނީ. ގޭބިސީއެއްގައި 10-15 މީހުން ދިރިއުޅޭއިރު މިގޮތަށް ތޮއްޖެހިގެން އާމްދަނީ ހޯދަން ކުރާ މަސައްކަތް ހުއްޓައިލާ ތިބެން ޖެހުމުން ދިމާވާ މައްސަލަތައް މަދެއް ނުވާނެ. މުއައްސަސާތަކުގައި މަސައްކަތް ކުރައްވަން ތިއްބެވި ފަރާތްތަށް އެކީހެން އައިސޮލޭޝަނަށް ދާންޖެހޭ ހިސާބަށް ދިއުމަކީ މިހާރު ނަތީޖާތައް އަންނަގޮތުން ދުރުގައިވާ ކަމެއްނޫން. އެފަދަ ހާލަތެއް މެދުވެރިވެއްޖެނަމަ މުޅި ރަށް އެކީ ހުއްޓުމަކަށް އަތުވެދާނެ.“ ނައިފަރުގެ ހާލަތާމެދު ކަންބޮޑުވުން ފާޅުކުރައްވައި ޝިޔާމް ވިދާޅުވިއެވެ.
ޝިޔާމް ވިދާޅުވީ އެންމެ މުހިންމު މުއައްސަސާތަކުގެ ގިނަ ޢަދަދެއްގެ ފަރާތްތަކެއް މިހާރު ވެސް ވަނީ އައިސޮލޭޝަންގައި ކަމަށެވެ. ހަމައެހެންމެ ޅ.އަތޮޅު ހޮސްޕިޓަލުގައި ކޮވިޑް ޓެސްޓު ކުރެވޭނެ ވަސީލަތް މި ވަގުތު ނެތުމަކީ މި ހާލަތު އިތުރަށް ނުތަނަވަސް ކުރުވާ ކަމެއްކަން ވެސް ޝިޔާމް ފާހަގަކުރެއްވިއެވެ.
”ސާމްޕަލް ނަގައި ސާމްޕަލްގެ ނަތީޖާ ނުލިބި އެތައް ދުވަހެއް އިންތިޒާރު ކުރަންޖެހުމަކީ ވަކިވަކި ފަރުދުން އަދި މުޖުތަމަޢު ނަފްސާނީ ހާސްކަމުން ބަލިކަށިކޮށްލާ ކަމެއް. އަދި ރަށުގެ ޙަޤީގީ ހާލަތު ދެނެގަންނަން އޮތް ވަރަށްބޮޑު ގޮންޖެހުމެއް. އަޅުގަނޑު މިދަނީ ސަރުކާރުގެ ކަމާބެހޭ ފަރާތްތަކަށް ގުޅައި ހާލަތު ބަޔާންކޮށްދީ, އަދި ހާލަތު ބަދަލު ކުރުމަށް ރަނގަޅު އަވަސް މަސައްކަތްތަކެއް ކޮށްދެއްވުމަށް އެދެމުން. އަދި މި ނޭވާގައި ވެސް ކަމާބެހޭ ފަރާތްތަކަށް ގޮވާލަން ވީ އެންމެ އަވަސް އެންމެ ރަނގަޅު ފިޔަވަޅުތަކެއް މިކަމުގައި އަޅުއްވައިދެއްވަން. ހުރިހާގެއެއްގައި ޓޭޕް ދަމާ މޮނިޓަރިންނަށްލައި, ރަށުގެ ރައްޔިތުން ގޭބަންދުކޮށް ރައްޔިތުން ބިރުވެެރިކަމެއްގެ ތެރޭގައި ބޭތިއްބުމަކީ ހައްލެއްނޫންކަމުގައި ދަންނަވަން.“ ޝިޔާމް ވިދާޅުވިއެވެ.
ޝިޔާމް ވަނީ ނައިފަރަށް މި ވަގުތު އެހީތެރިކަން އިންތިހާއަށް ބޭނުންވާކަން ފާހަގަކުރައްވައި، ކޮވިޑް ޓެސްޓު ކުރެވޭނޭ ވަސީލަތް ވަގުތުން ޤާއިމުކުރަންޖެހޭކަމަށް ވިދާޅުވެފައެވެ.
ހަމައެއާއެކު ސިއްހީ އިތުރު މަސައްކަތްތެރިން ބޭނުންވާ ކަމަށާއި، ތަންފީޒީ އިދާރާތަކުގެ އިންސާނީ ވަސީލަތް އިތުރުކުރަންޖެހޭކަން ވެސް ޝިޔާމް ފާހަގަކުރެއްވިއެވެ.
މީގެ އިތުރުން ޝިޔާމް ވަނީ މި ދަނޑިވަޅުގައި ނައިފަރުގެ ދަރުމަވެެރިންގެ ފަރާތުން ފެންނަ އާދަޔާ ޚިލާފު ޚިދުމަތްތެރި މަސައްކަތްތައް ފާހަގަކުރައްވައި، އެ މީހުންގެ މަސައްކަތުގައި ބަރަކާތްލެއްވުމަށް އެދި ދަންނަވާފައެވެ. އަދި ކޮވިޑުގެ ބަލިމަޑުކަން ތަހައްމަލު ކުރަމުންދާ ފަރާތްތަކަށް އަވަސް ޝިފާއެއް މިންވަރުކުރައްވައި، އެ ޢާއިލާތަކަށާއި، ރަށުގެ ލޮބުވެތި ރައްޔިތުންނަށް ކެތްތެެރިކަމާއި ރައްކާތެެިކަން ދެއްވުމަށް ވެސް ޝިޔާމް ވަނީ ރައްބުގެ ޙަޟްރަތަށް ދަންނަވާފައެވެ.
