ވެންޓިލޭޓަރުތަކުގެ މައްސަލައަކީ ދޫކޮށްލެވޭނެ މައްސަލައެއް ނޫން ކަމަށާއި، އެ ވައްކަމަށް އިންސާފު ހޯދަންޖެހޭކަމަށް ދައުލަތުގެ ވެރިންނަށް ވިދާޅުވެވިދާނެ ކަމަށާއި، އެ ގޮތަށް ވިދާޅުވުމަކީ މިނިވަން މުއައްސަސާތަކަށް ނުފޫޒު ފޯރުއްވެވުމެއް ނޫންކަމަށް ރައްޔިތުން މަޖިލީހުގެ ނައިބު ރައީސް އަދި ގަލޮޅު ދެކުނު ދާއިރާގެ މެންބަރު އީވާ ވިދާޅުވެއްޖެއެވެ.
ކޮވިޑާއި ގުޅިގެން ވެންޓިލޭޓަރު ގަތުމުގައި ހެލްތު މިނިސްޓްރީން ކޮރަޕްޝަން ހިންގިކަމަށް ތުހުމަތުކުރެވޭ މައްސަލައިގައި ދަޢުވާ ނުކުރަން ނިންމުމާއި ގުޅިގެން ސަރުކާރަށް އަމާޒުވި ފާޑުކިޔުންތަކަށް ރައްދުދީ ރައިސް އޮފީހުން ވަނީ ބަޔާނެއް ނެރެފައެވެ.
ރައީސް އޮފީހުން މި މަހުގެ 27 ވަނަ ދުވަހުގެ ރަސްމީ ގަޑި ނިމުނުފަހުން ނެރުނު ބަޔާނުގައި އިތުރަށް ބުނެފައިވަނީ، ދައުލަތުން އުފުލާ ދަޢުވާތަކުގެ ކަންކަމުގައި ޕްރޮސެކިއުޓަރ ޖެނެރަލްއާއި، ދައުލަތުގެ ބަންޑާރަ ނައިބަށް މުސްތަޤިއްލުކަން ޤާނޫނު އަސާސީއިން ދީފައިވަނީ، އެއްވެސް ފަރާތެއްގެ ސިޔާސީ ނުފޫޒެއް އަދި ޒާތީ ތަޢައްސުބެއް ނެތި މިނިވަންކަމާއި، ޢަދުލުވެރިކަމާއެކު ދަޢުވާތައް ކުރުމަށް ފުރުސަތު ދިނުމުގެ ގޮތުން ކަމަށެވެ. އަދި ހަމައެހެންމެ ދައުލަތުގެ އެންމެ އިސްވެރިޔާގެ ހައިސިއްޔަތުން ޤާނޫނު އަސާސީގައި ބަޔާންކޮށްފައިވާ އެ ފަދަ އުސޫލުތައް ނަގަހައްޓައި، ރައްޔިތުންގެ ހައްޤުތައް ރައްކާތެރި ކުރުމަކީ ރައީސުލްޖުމްހޫރިއްޔާއަށް ޤާނޫނު އަސާސީއިން ލާޒިމުކުރާ ކަމެއްކަމަށް ވެސް ބަޔާނުގައި ފާހަގަކޮށްފައިވެއެވެ.
އެހެންކަމުން ދިވެހި ދައުލަތާއި ރައްޔިތުންގެ ހައްޤުތައް ނަގަހައްޓައި، އެ ހަައްޤުތައް ކަށަވަރު ކުރުމުގައި ކަމާބެހޭ މުއައްސަސާތަކުން ކުރާ އެންމެހާ މަސައްކަތްތައް, އެއްވެސް ފަރާތެއްގެ ނުފޫޒެއް ނެތި މިނިވަންކަމާއި މުސްތަޤިއްލުކަމާއެކު ކުރިއަށް ގެންދިއުމަށް މަގުފަހިކުރުމަށް ކުރަންޖެހޭ އެންމެހާ ކަންތައްތައް ކުރައްވާނެކަމުގެ ފުރިހަމަ ޔަޤީންކަން ރައީސުލްޖުމްހޫރިއްޔާ ދެއްވާފައިވާކަމަށް ވެސް ބަޔާނުގައި ބުނެފައިވެއެވެ.
ވެންޓިލޭޓަރުގެ މައްސަލަ އަލުން ބަލަން ގޮވައިލަައްވައި މަޑުއްވަރީ ދާއިރާގެ މެންބަރު އާދަމް ޝަރީފް ޢުމަރު މިއަދު ވަނީ ކުއްލި މައްސަލައެއް ހުށަހަޅުއްވާފައެވެ.
މަޖިލީހުގެ މިއަދުގެ ޖަލްސާގައި ޝަރީފް ހުށަހެޅުއްވި ކުއްލި މައްސަލައަށް ބަހުސްކުރައްވަމުން އީވާ ވިދާޅުވީ ދައުލަތުގެ ތިން ބާރު އޮތީ ވަކިވެފައިކަމަށް ބުނެ މައްސަލަ ދޫކޮށްލެވޭކަށް ނޯންނާނެ ކަމަށެވެ. އަދި އެ ވައްކަމަށް އިންސާފު ހޯދަންޖެހޭކަމަށް ދައުލަތުގެ ވެރިންނަށް ވިދާޅުވެވިދާނެ ކަމަށާއި، އެ ގޮތަށް ވިދާޅުވުމަކީ މިނިވަން މުއައްސަސާތަކަށް ނުފޫޒު ފޯރުއްވެވުމެއް ނޫންކަމަށް ވެސް އީވާ ވިދާޅުވިއެވެ.
އީވާ ވިދާޅުވީ މިކަން ރައްޔިތުންނަށާއި، މަޖިލީހަށާއި، މުއައްސަސާތަކަށް ސާފުވާން ޖެހޭނެ ކަމަށާއި އެއްވެސް ހާލެއްގައި އެއީ މުއައްސަސާތަކުގެ މިނިވަންކަން ގެއްލުވައިލުން ނޫން ކަމަށެވެ.
އީވާ ވިދާޅުވީ މި މައްސަލަ ރަނގަޅަށް ނުބަލައިފިނަމަ، އެއްވެސް ވައްކަމެއް ބަލާނެކަމުގެ އިތުބާރެއް ދެން ރައްޔިތުންނަކަށް ނޯންނާނެ ކަމަށެވެ. އަދި ހަމައެހެންމެ އެ އިތުބާރު ނޯންނާނީ ވަކި ރައްޔިތުންގެ ނޫން ކަމަށާއި ޚުދު އޭނާއަށް ވެސް އެ އިތުބާރު ނޯންނާނެ ކަމަށް އީވާ ވިދާޅުވިއެވެ.
މީގެ އިތުރުން އީވާ ވަނީ ތިންބާރު ވަކިވެފައިކަމަށް ބުނެ ނުވަތަ ކޯލިޝަން ސަރުކާރެކޭ ބުނެ ހުއްޖަތެއް ދެއްކެން ނޯންނާނެ ކަމަށެވެ. އަދި 2018 ވަނަ އަހަރު ރައްޔިތުން އިތުބާރުދިނީ އެމްޑީޕީއަށްކަމަށް ވެސް އީވާ ވަނީ ވިދާޅުވެފައެވެ.
