ސިޔާސީ ޕާޓީތަކުގެ ގަވައިދާއި ހިލާފުވެފައި ވާތީ ކަމަށްބުނެ، އިލެކްޝަން ކޮމިޝަނުން، އިދިކޮޅު ޕްރޮގްރެސިވް ޕާޓީ އޮފް މޯލްޑިވްސް ޖޫރިމަނާ ކުރިއިރު، ދައުލަތުން އެޕާޓީއަށް ދޭން ޖެހޭ ފައިސާ ހަމައަށް ދީފައި ނުވާކަމަށް، ރައްޔިތުންގެ މަޖިލީހުގެ ނައިފަރު ދާއިރާގެ މެމްބަރު އަދި ޕީޕީއެމްގެ ނައިބު ރައީސް އަހުމަދު ޝިޔާމް، އިލެކްޝަން ކޮމިޝަންގެ ރައީސް އަހުމަދު ޝަރީފް އަށް ވަރަށްބޮޑަށް ފާޑުވިދާޅުވެއްޖެއެވެ.
އީސީގެ ރައީސް އަހުމަދު ޝަރީފް ވަނީ، އިދިކޮޅު ޕީޕީއެމްއިން ޖަވާބުދާރީވުމަށް، ހުށައެޅި ހުށައެޅުން ބަލައި ނުގަންނަކަމަށް ބުނެ، އެޕާޓީ 75000 ރުފިޔާއިން ޖޫރިމަނާ ކޮށްފައި ވާކަމަށް ބުނެފައެވެ.
މިކަމާއި ގުޅިގެން ޝިޔާމް ކުރެއްވި ޓުއީޓެއްގައި ވިދާޅުވީ، މިދިޔަ އަހަރުވެސް ދައުލަތުން ޕީޕީއެމް އަށް ދޭންޖެހޭ ފައިސާކޮޅުވެސް ހަމަޔަށް ދީފައި ނުވާކަމަށާއި، އަދި މި އަހަރުވެސް އެއްވެސް ފައިސާއެއް ނުދީ، އިންތިހާބާއި ދިމާކޮށް، ސަރުކާރާއި، ވާދަވެރި ޕާޓީއަށް ދަތިކުރަމަށް އީސީގެ ރައީސް އަހުމަދު ޝަރީފް ވެސް ހުންނެވީ، ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ހެން ފޫގަޅުވައިގެން ކަމަށް ވިދާޅުވެފައެވެ.
އިދިކޮޅު ކޯލިޝަނުން އަންނަނީ، ކުރިއަށް އޮތް ކައުންސިލް އިންތިހާބުގައި، ހަމަހަމަ ކަމާއި އެކު ކެމްޕެއިން ކުރުމަށް ސަރުކާރުން ހުރަސްތައް ކުރިމަތި ކުރުވަމުން ކަމަށްބުނަމުންނެވެ. އަދި ކޯވިޑް 19 ގެ ހާލަތާއި ގުޅިގެން އެޗްޕީއޭއިން އެކުލަވާފައިވާ ގައިޑްލައިންއިންވެސް ހަމައެކަނި ފިޔަވަޅު އަޅަނީ، ޕީޕީއެމް އަށް ކަމަށްބުނެފައެވެ.
އަދި މިއީ ސީދާ ސަރުކާރާއި، އީސީ އާއި އަދި މިނޫންވެސް މުވައްސަސާތައް ގުޅިގެން އެޕާޓީއަށް ހުރަސްތައް ކުރިމަތި ކުރުވުމަށް، ކުރަމުން ގެންދާ ކަމެއް ކަމަށްވެސް ޕީޕީއެމް އިން ވަނީ ބުނެފައެވެ.
