މަސްތުވާތަކެތީގެ މައްސަލައެއް ސާބިތުވުމުން ހދ.ހިރިމަރަދޫ، ހިޔާވަހި އަޙްމަދު ނަބީޙު ޢުމުރަށް ޖަލަށްލުމަށް ހައިކޯޓުން މިއަދު ހުކުމްކޮށްފިއެވެ.
މި މައްސަލައިގައި ކަން ހިނގާފައިވާ ގޮތަށް ބަލާއިރު، ހިރިމަރަދޫގައި މަސްތުވާތަކެތި ގެންގުޅެ އެތަކެތީގެ ވިޔަފާރިކުރާ މީހުން ހޯދުމަށްޓަކައި ފުލުހުން ހިންގި ޚާއްސަ އޮޕަރޭޝަނެއްގައި މަސްތުވާތަކެތި ގެންގުޅެ ވިޔަފާރިކުރާކަމަށް ފުލުހުންނަށް ލިބުނު މަޢުލޫމާތަކާއި ގުޅިގެން ނަބީޙް ފުލުހުންގެ ބެލުމުގެދަށަށް ގެންގޮސް 2016 ވަނަ އަހަރުގެ ފެބްރުއަރީ 12 ވަނަ ދުވަހުގެ 00:35 ހާއިރު ސުވާލުކުރިއެވެ.
އެ ގޮތުން ނަބީޙް ވަނީ އެ ރަށު ހުޅަނގުފަރާތު ހޮޅުއަށީގައިހުރި ހޮޅުގަނޑެއްގެ ތެރޭގައި މަސްތުވާތަކެތި
ފޮރުވާފައި ހުންނާނެކަމަށް ފުލުހުންގެ ގާތުގައި ބުނެފައެވެ.
ނަބީޙާއެކު ފުލުހުން އެ ތަނަށްގޮސް ނަބީޙުގެ ހާޒިރުގައި އެތަން ބަލައި ފާސްކުރިއިރު ހޮޅުއަށީގައިހުރި
ހޮޅުތަކުގެ ތެރެއިން، ނަބީޙު ދެއްކި ހޮޅުގަނޑެއްގެ ތެރޭގައި އޮތް ނޫކުލައިގެ ރަބަރު ކޮތަޅެއްގެ ތެރެއިން
ކެނެބިސް ހުރިކަމަށް ބެލެވޭ ހަ ސެލޯފިންކޮޅު ފެނިފައިވެއެވެ. އޭގެ ބަރުދަނު ގައި 0.8204 ގްރާމް ކެނެބިސް ހުރިކަމަށް އެތަކެތީގެ ތަހުލީލު ރިޕޯޓުން ދައްކާފައިވެއެވެ.
ފުލުހުން އިތުރަށް ސުވާލުކުރުމުން ނަބީޙް ވަނީ އެ ރަށު ދެކުނު ފަރާތުގައި ހުރި ގަސްތަކެއްގެތެރޭގައި މަސްތުވާތަކެތި ވަޅުލާފައި ހުންނާނެކަމަށް ބުނެފައެވެ. އެ ގޮތުން އެ ސަރަހައްދަށް ގޮސް ނަބީޙު ދެއްކި ތަން ފުލުހުން ކޮނެގެން ބެލިއިރު، އެ ތަނުން ފެނުނު ޕްރިންގުލްސް ބްރޭންޑްގެ ދެ ޗިޕްސްދަޅުގެ ތެރެއިން އެއްދަޅުން ކެނެބިސް ހުރިކަމަށް ބެލެވޭ 97 ސެލޯފިންކޮޅު ފެނުނެވެ. ތަހުލީލު ރިޕޯޓުން ދައްކާގޮތުން އެ ތަކެތީގައި 9.7025 ގްރާމް ކެނަބިސް ހުއްޓެވެ.
އަނެއް ދަޅުން ކެނެބިސް ހުރިކަމަށް ބެލެވޭ 144ސެލޯފިންކޮޅު ފެނިފައިވާއިރު، އޭގައި 9.9196 ގްރާމް ކެނެބިސް ހުރިކަމަށް އެތަކެތީގެ ތަހްލީލު ރިޕޯޓުން ދައްކައެވެ.
ނަބީޙް ވަނީ އޭނާއަކީ 2015 އިން ފެށިގެން މަސްތުވާތަކެތި ބޭނުންކުރާ މީހެއްކަމަށާއި، ފުލުހުންނަށް ދައްކާފައިވާ މަސްތުވާތަކެއްޗަކީ އޭނާގެ ތަކެތިކަމަށާއި، އިސްވެ ބުނެވުނު މަސްތުވާ ތަކެތި ގަތުމަށް 6000 ރުފިޔާ ރައްޓެއްސެއްގެ އަތުން ލޯނެއްނަގައިގެން ޚަރަދުކޮށްފައިވާނެކަމަށާއި، މަސްތުވާތަކެތި ގެނައީ މާލޭގައިހުރި ރައްޓެއްސަކަށް ރުފިޔާ ފޮނުވައިގެން ބަހާދަރު ބޯޓުން ކުޅުދުއްފުށިން ހިރިމަރަދުއަށްކަމަށް ބުނެ ތަޙްޤީޤުގައި އިޢުތިރާފްވެފައެވެ. ހަމައެހެންމެ ނަބީޙް ވަނީ މަސްތުވާތަކެއްޗަށް ޕޮޒިޓިވްވެފައެވެ.
މި މައްސަލައިގައި ނަބީޙުގެ މައްޗަށް ކެނެބިސް ޓްރެފިކް ކުރުމުގެ ކުށުގެ ދަޢުވާ އުފުލިއިރު، ހިރިމަރަދޫ މެޖިސްޓްރޭޓް ކޯޓުން މައްސަލަ ސާބިތުނުވާކަމަށް ނިންމިއެެވެ. ނަމަވެސް އެ ކޯޓުން ނިންމަވާފައިވަނީ ޝަރުޢީ އަދި ޤާނޫނީ އުސޫލުތަކާ ޚިލާފަށްކަމަށް ބުނެ ޕްރޮސިކިއުޓަރ ޖެނެރަލްގެ އޮފީހުގެ ފަރާތުން އެ މައްސަަލަ ހައިކޯޓުގައި އިސްތިއުނާފުކުރީއެވެ.
ހައިކޯޓުން މިއަދު ވަނީ ހިރިމަރަދޫ ކޯޓުގެ ޙުކުމް ބާތިލްކޮށް ނަބީޙުގެ މައްޗަށް ކެނެބިސް ޓްރެފިކް ކުރުމުގެ ކުށް ޝައްކެއްނެތް މިންވަރަށް ސާބިތުވެފައިވާކަމަށް ނިންމައި، ނަބީޙު އެއް އަހަރަށް ޖަލަށްލުމަށް ޙުކުމްކޮށް 100،000 ރުފިޔާއިން ޖޫރިމަނާކޮށް މައްސަލަ ނިންމާފައެވެ.
