އިންޓަނޭޝަނަލް ކްރިމިނަލް ކޯޓް (އައިސީސީ) އަށް އެ ގައުމުގެ އިހްތިސާސް ދީ، ރޯމް ސްޓެޓިއުޓް ތަސްދީގު ކުރުމަށް އާމީނިއާގެ ރައީސް ވަހަގްން ޚަޗަތުރިޔާން ރަސްމީކޮށް ސޮއިކުރައްވައިފިއެވެ.
ރައީސްގެ ވެބްސައިޓުގައި އިއުލާނުކޮށްފައިވާ މި ނިންމުމަކީ 60 އާއި 22 އާ ދެމެދުގެ ވޯޓުން މިމަހުގެ ކުރީކޮޅު އަރްމޭނިއާގެ ޕާލަމެންޓުން ރޯމް ސްޓެޓިއުޓް ތަސްދީގު ކުރުމާ ގުޅިގެން ނިންމި ނިންމުމެކެވެ. އިދިކޮޅު ދެ ފެކްޝަނަކުން އެކަމާ ދެކޮޅު ހެދި އިރު، އަރުމީނިއާ އިން ވަނީ އެ ގާނޫނު ތަސްދީގުކޮށް، އެ ގައުމުގެ ގާނޫނީ އޮނިގަނޑަށް އެޅުނު މުހިންމު ފިޔަވަޅެއް ކަމަށް ބުނެފަ އެވެ.
އަރްމީނިއާ އިން އެންމެ ފުރަތަމަ ރޯމް ސްޓެޓިއުޓްގައި ސޮއިކުރީ 1999 ވަނަ އަހަރު ނަމަވެސް ގައުމީ ގާނޫނު އަސާސީއާ ނުގުޅޭ ކަމަށް ބުނެ 2004 ވަނަ އަހަރު އެ ގާނޫނު ތަސްދީގު ކުރުން މެދުކަނޑާލި އެވެ. އަވަށްޓެރި އަޒަރުބައިޖާނާ އެކު ބޯޑަރު ސަރަހައްދުގައި ހިނގި ނުރައްކާތެރި ކުރިމަތިލުންތަކުގެ ތެރޭގައި 2022 ވަނަ އަހަރުގެ ފަހުކޮޅު އައިސީސީއަށް ވަނުމުގެ މަރުހަލާ އަލުން ވަރުގަދަކޮށް، ދާދި ފަހުން އެ ސަރަހައްދުގައި ހިނގި ހަމަނުޖެހުންތަކުގެ ސަބަބުން ބަކޫއަށް ބޮޑު ކާމިޔާބީއެއް ލިބުމާއި، އަޒަރުބައިޖާންގެ ތާއީދު އޮތް އަޒަރުބައިޖާންގެ ވަކިވެފައިވާ ސަރަހައްދެއް ކަމަށްވާ ނަގޯނޯ-ކަރަބާޚް ރިޕަބްލިކް އުވާލެވުނެވެ.
އަރްމީނިއާގެ ބޮޑުވަޒީރު ނިކޮލް ޕަޝިންޔާން ދެކެވަޑައިގަންނަވާ ގޮތުގައި އަޒަރުބައިޖާނުގެ ”ހަނގުރާމައިގެ ޖަރީމާ“ ގެ މައްޗަށް އަރްމީނިއާގެ ބިމުގައި ދައުވާ ކުރުމުގައި އައިސީސީގެ އިހްތިސާސް ވަރަށް މުހިންމު ވާނެ އެވެ. ޕާޝިންޔަން ވަނީ ރަޝިއާ އިސްވެ އޮވެ އުފައްދާފައިވާ ކޮލެކްޓިވް ސެކިއުރިޓީ ޓްރީޓީ އޯގަނައިޒޭޝަން (ސީއެސްޓީއޯ) އިން އަރްމީނިއާ ހިމާޔަތް ނުކުރާ ކަމަށް ބުނެ ފާޑުކިޔާތީ ހިތްހަމަނުޖެހުން ފާޅުކޮށްފަ އެވެ.
އަރްމޭނިއާ އިން ރޯމް ސްޓެޓިއުޓް ތަސްދީގު ކުރުމުން، އެ ގައުމުގެ އެންމެ ގާތް އެކުވެރިޔާ ރަޝިއާގެ ފާޑުކިއުންތައް އަމާޒުވެފައިވާއިރު، މިއީ ”ވަރަށް ދެކޮޅު ފިޔަވަޅެއް“ ކަމަށް އެ ގައުމުން ދެކެ އެވެ. ކްރެމްލިންގެ ތަރުޖަމާނު ޑިމިޓްރީ ޕެސްކޯވް ވަނީ މި ނިންމުމުގެ ސަބަބުން ދެ ގައުމުގެ ގުޅުމަށް ކުރާ ނޭދެވޭ އަސަރުތަކާ މެދު ޝައްކު އުފެދޭ ކަމަށާއި އެކަމުގެ ސަބަބުން ”މިހާރުގެ އަރުމީނިއާގެ ލީޑަޝިޕަށް އިތުރު ސުވާލުތަކެއް އުފެދޭ“ ކަން ފާހަގަކުރައްވާފައެވެ.
ރަޝިޔާއިން އައިސީސީއާ ދެމެދު ދެބަސްވުންއުފެދިފައިވާ އިރު، އެ މުއައްސަސާއަކީ ހުޅަނގުގެ މަސްލަހަތުތަކުގެ ހައްގުގައި އެ ގައުމުގެ ބާރުގެ ބޭނުން ނަހަމަ ގޮތުގައި ހިފާ ސިޔާސީ ގޮތުން ނުފޫޒު ފޯރުވާ މުއައްސަސާއެއްގެ ގޮތުގައި ރަޝިއާ އިން ދެކެ އެވެ. ރަޝިއާ އާއި އައިސީސީއާ ދެމެދު ނުތަނަވަސްކަން އިތުރުވީ ކިއޭވްއާ އެކު ހިނގި ހަމަނުޖެހުންތަކުގައި ޔޫކްރެއިންގެ ކުޑަކުދިން ”ކިޑްނެޕް“ ކުރި ކަމުގެ ތުހުމަތުގައި ރަޝިއާގެ ރައީސް ވްލަޑިމިއާ ޕޫޓިން ހިމެނޭ ގޮތަށް ރަޝިއާގެ އިސް ދެ އޮފިޝަލަކަށް ކޯޓުން މިދިޔަ މާޗް މަހު އަމުރެއް ނެރުމުންނެވެ. ނަމަވެސް ރަޝިޔާއިން ވަނީ އެ ތުހުމަތުތައް ދޮގުކޮށް، އެދިއްޖެ ހިނދެއްގައި ކުޑަކުދިން އެމީހުންގެ ގާނޫނީ ބެލެނިވެރިންގެ ގާތަށް ގެންދިއުމަށް މަގުފަހިކޮށްދީފައިވާ ކަމަށް ބުނެފަ އެވެ.
