ދިވެހިރާއްޖޭއަށް ތަނަވަސްކަން ހޯދޭނީ އިންޑިއާއާއި ގުޅުން ބަދަހިކޮށްގެންކަމަށް ކުރީގެ ރައީސް އަދި ރައްޔިތުން މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެއެވެ.
ރާއްޖެއާއި އިންޑިއާއާއި ދެ ޤައުމުގެ ދެމެދުގައި އޮތް ގުޅުން ސިފަކުރައްވައި ރައީސް ނަޝީދު މިރޭ ކުރެއްވި ޓްވީޓެއްގައި ވަނީ ރާއްޖެއާއި އިންޑިއާއާއި ދެމެދުގައި އޮތީ ޒަމާންވީ ގުޅުމެއްކަމަށް ވިދާޅުވެފައެވެ. އަދި ރާއްޖޭގެ މިނިވަންކަން ދެމެހެއްޓިފައިމިވަނީ އެ ގުޅުމުގެ ސަބަބުންކަމަށާއި ދިވެހިންނަށް ތަނަވަސްކަން ހޯދޭނީ އިންޑިއާއާއި ގުޅުން ބަދަހިކޮށްގެންކަމަށް ވެސް ރައީސް ނަޝީދު ވިދާޅުވިއެވެ.
މީގެ އިތުރުން ރައީސް ނަޝީދު ވަނީ ރައީސް އިބްރާހިމް މުޙައްމަދު ޞާލިޙާއި އެކަން ކުރައްވާނެކަމަށް އެ މަނިކުފާނުގެ ހިތްޕުޅުގައި އެއްވެސް ޝައްކެއްނެތްކަމަށް ވެސް ވިދާޅުވެފައެވެ.
ރައީސް ނަޝީދު މިފަދައިން ވާހަކަދައްކަވާފައިވާއިރު ސޯޝަލްމީޑިއާގައި ގިނަބަޔަކު އަންނަނީ ރާއްޖެއާއި އިންޑިއާއާއި ދެމެދުގައި އޮންނަ ގުޅުމަށް ފާޑުކިޔާފައެވެ. އެ ފަރާތްތަކުން ފާޑުކިޔައި ޓްވީޓްކުރަމުން އަންނަނީ އިންޑިއާ ސިފައިން ރާއްޖޭގައި ތިބުމުންކަމަށް ލަފާކުރެވެއެވެ.
މި ގޮތުން ސަރުކާރުން އަންނަނީ ރާއްޖެ ވިއްކައިލުމަށާއި އިސްތިޤުލާލު ނަގައިލުމަށްކަމަށް ބުނެ އިދިކޮޅު ކޯލިޝަނުން ވަނީ މުޒާހަރާކޮށް އަޑުއުފުލާފައެވެ.
